Biraz ýaqyt buryn eki jyl ystyq sýsyz ómir súrdim. Asúıde saryldap aǵyp tur. Al jýynatyn bólmede syzdyqtap turady. Vanany toltyryp alý úshin jarty saǵat kútesiń. Tańerteń ne keshke jýynǵyń keledi. Árbirimiz bir jarym saǵatymyzdy jýynýǵa arnaımyz. Árıne, ystyq sý aqpaı turǵanyn kórgende men kúıeýime santehnık shaqyraıyq dedim. «Shirip ketken qubyr, jaldamaly páter, santehnıktiń kelgeninen ne shyǵar deısiń? Eski úıge jóndeý jumystaryn jasamaıtyn shyǵarmyz. Osylaı kúnelte turaıyq» dedi. Kúnelte berdik. Eki jyl zýlap óte shyqty. Birde nege ekenin umyttym, shydamym taýsylyp, jaryldym. Aıqaı-shý shyǵardym. Sodan keıin santehnık shaqyrtyldy. Bes mınýttan keıin isin bitirip shyǵyp ketti. Túk shyqpady eken dep oılaǵanmyn. Sýdy ashsam, saryldap tur. Bilesiz be, qubyrǵa qaq turyp qapty. Sony burandasymen bir qoıǵanda sý saryldaı jónelgen. Sýdy aǵyzbaı turǵan kedergi alyndy. Eki jyl ystyq sýsyz otyrǵanym – bir qońyraýmen sheshildi.
Bunyń bári ózimizdiń nemquraıly bolǵandyǵymyzdan ekenin moıyndaımyn. Biraq mundaıdy aınalamnan da kóp kórem.
Dostarymyz on jyl qurqyltaıdyń uıasyndaı tar páterde turdy. Artyq zat alaıyn dese, aınalatyn oryn joq. Ózderi páterlerin sondaı jek kóretin. Árlep-syrlamady da. On jyl degende tózimderi taýsylyp, basqa úıge kóshti. Tek turatyn aýdandaryn qımaıtyn. Zattaryn jınaı bastaıdy. Qarasa, uqyptap shabadandarǵa jınalǵan kıim-keshekten, antresoldaǵy jóndeýge arnalǵan asaı-múseıler, sóredegi ashylmaǵan kitap toly qoraptar, odan bólek qoldan jasalǵan kádesyılar men saıahattan ákelgen estelikter, buryshtaǵy ájesi syılaǵan, aqyry tóselmegen kilem, jaıma tósek pen synyp qalǵan kir jýatyn máshińkege deıin kereksiz ekenin túsinedi. Burysh-buryshtyń bárinde baıaǵyda tastaıtyn zattar jınalyp tura bergen. Eshkim úńilmegen, tazalamaǵan. Kóshetin adam qusap ómir súrgen. Ózderine keregi úsh sómkege syıdy, qalǵan on segizin qoqysqa tastady. Sol sátte bara qalǵan edim, qurbym jylap otyr. Sońǵy on jyl áldeqaıda ádemi ómir súrýime bolar edi, bári ózime baqytty sátterdi qımaǵandyqtan ǵana tar úıdi tamashalap ótippin deıdi. Dál sondaı jaǵdaıda ózimen ózi bolyp ómir súretin adamdar barshylyq.
Aýyrady. Basy aýyrady. Neshe jyldan beri kele jatqan dert. Bastyń saqınasy emdelmeıdi dep ózimizdi shekteımiz. Bir kúni aıaq astynan dárigerge bara qalsa, emdelip ketedi. Sonsha jyl qınalmasa da bolǵandaı eken.
Psıhologıalyq jaǵdaı da sondaı. «Álem sondaı», men de kemshiliksiz emespin degennen aspaıtyn ýaıym beker ekenin túsinesiń. Sol ýaıymnyń bárin de «antıdepressant» qıyndatyp qoımaı, birshama «sapaly ómir keshýge» sebepker de bolady eken.
«Sapaly ómir» degen óte mańyzdy sózder. Qansha tabys taýyp, qaıda demalatynyńdy túsindiretin sózder emes. Tózimiń qanshaǵa jetetini týraly. Nege kóngeniń, qanshama ret erik-jigerińdi judyryqqa túıip qap, aınalańdaǵy baqytsyzdyqqa kóz jumǵanyń týraly. Bári túzelgenshe ishten tynǵanyń. Seniń tánińdegi dert pe, saqtap qalýǵa tyryspyn dep ózińdi kámil sendiretin baqytsyz qarym-qatynas pa, baspananyń nasharlyǵy bolsyn, bári de tózimińdi kemiretin jegi qurttaı maza bermeıdi. Bir kúni qarasań, ómir súrgenińnen tózgen kúniń kóp bop shyǵady. Bir jamany, sol tózgenińniń bári aqyrynda esh paıda bermeıdi, tipti jaı ǵana ýaqyt urlaǵan bop qalatyny janǵa batady. Eger aılap sanap jatsań meıli eken, jyldarǵa sozylatyn kesirlikti qaıda qoıarsyń?
Aınalaıyndar, qamalyp otyrǵan shekteýdiń tórt qabyrǵasy qanshalyqty myqty ekenin baıqap júrińder. Jabyq turǵandaı kóringen ár esikti julqyp ashyp, tekserińder. Sheshimi joq túıtkildiń bárin tiske sap, tistep kórińder. Túıinin taýyp qalarsyń. Keıde shirip ketken tusaýdyń ózi temir kisennen myqty ustap turatyn ádeti bar.
Tym uzaqqa sozylatyn qıyndyqtyń bári, olardy sheshýdiń jolyn tabýdan da soraqysy – sonyń bárine tózýdiń tekke ótkenin túsiný. Sol tózip, kónip ótken ýaqyttyń bárinde baqytty ótkizýge bolar edi. Sonsha jyl tekke ketpes edi. Ómirdiń sol sátsiz, baqytsyz tusyn basqa boıaýǵa bolatynyn bilgende, ishińdi ókinish kerneıdi. Al sen sony bilmegensiń. Ýystan sýsyp ketken ýaqytty keıin qaıtara almaısyń. Solaı...
Avtory: Marta Ketro
Aýdarǵan: Shynar Ábildá
Usynǵan: Maqpal Sembaı
Pikir qaldyrý