Ózbek basshysy Shavkat Mırzıeev taǵy da jurt nazarynda! 

Bu joly kórshi el prezıdenti sheneýnikterge ózine qoshemet kórsetip, qolpashtap otyrýǵa tyıym saldy. 

Ári bul onyń maqtaý men madaqty sýqany súımeıtindigin bildirgen alǵashqy áreketi emes!

Daýdyń basy osydan birneshe aı buryn ózbek ánshisi Dılfýza Ismoılovanyń prezıdentke arnaǵan beıneklıpinen bastalǵan edi.Ol onda Shavkat Mırzıeevti álemniń sultanyna teńeıdi. Alaıda, ánshiniń bul áreketi ózine unaǵanymen, prezıdentke jaqpaı qalǵan kórinedi. Óıtkeni bul beıneklıpten keıin Memleket basshysyna  maqtaý men madaq aıtqan bulbuldardyń budan bylaı lısenzıalary tartyp alynatyndyǵy aıtyldy.

«Mırzıeevtiń  bul málimdemesi jalpy osy Ózbekstannyń jańa prezıdentiniń bılikke kelgennen bastap júrgizip kele jatqan jańa bir saıası ekonomıkalyq kýrsynan habar beredi. Sebebi  bılikke kelgen kúnnen bastap  Shavkat Mırzıeev kelesideı lozýngti usynǵan bolatyn. Memlekettik organdar, halyq memlekettik organdarǵa jumys jasamaý kerek, memlekettik organdar halyqqa jumys jasaý kerek degen. Jáne osy baǵytta kóptegen málimdemeler jasaldy», - QR tuńǵysh prezıdenti qory janyndaǵy ÁESI sarapshysy Jumabek Sarabekov. 

Esesine, maqtaýdyń kókesin qazir memlekettik  qyzmet isteri jáne jemqorlyqqa qarsy is-qımyl agenttigi estip jatyr! Jigitter paraqorlyqpen  kúresýdiń tıimdi tetigin tapqan kórinedi.

"Osyndaı jańa jobany oılap tabýdaǵy basty maqsatymyz turmystyq jemqorlyqty túbegeıli joıý. Qazir osyndaı logotıpter arqyly jumysyn júzege asyratyn jobalyq keńse búkil Respýblıka boıynsha iske qosyldy. Jumysyn istep jatyr. Jobanyń aýmaqty qyzmetin qamtamasyz etý úshin bizdiń agenttik jeke brend retinde qalyptastyrýǵa sheshim qabyldady", - dedi QR Memlekettik qyzmet isteri jáne jemqorlyqa qarsy is-qımyl tóraǵasynyń keńesshisi Nurlan Jaqsymbetov.

Dese de, habarlyndyrýlardy emodjılarmen jazý arqyly jemqorlyqty azaıtamyz degen olardyń bul paıymyna ózderinen basqa eshkim senbeıtin sıaqty.

«Bilmeımin endi. Smaılıkti túsinetin adam bar, túsinbeıtin adam bar. Bizderge qalaı ol?»
«Barlyq adamdar túsinbeıdi. Mysaly, qart adamdar túsinbeýi múmkin de».

«Bul smaılıkterdi qoıý arqyly jemqorlyqty jeńý múmkin emes dep esepteımin birinshi kezekte. Sebebi korrýpsıany jeńýdiń joly múldem basqa. Korrýpsıanyń durys emes ekenin jetkizý joldarynyń ishinde jastarǵa arnalyp tańdalyp jatsa endi bul qandaı mamandarmen kelisilgen endi ol psıhologtarmen kelisilip alyndy ma? Biraq bul jańashyldyqtyń qazirgi zamannyń talaby dep qabyldaǵan shyǵar dep oılaımyn», - deıdi áleýmettanýshy Saıat Baımuratov.

Usynǵan: Gúlim Jaqan