«Jahandaǵy zamanaýı qazaqstandyq mádenıet» jobasy aıasynda BUU-nyń 6 tiline aýdarylǵan qazirgi qazaq ádebıeti antologıasynyń alǵashqy kitaby basylyp shyqty. Bul kitaptar Almatyda Dostyq úıinde tanystyryldy.

Poezıa jáne proza jınaqtarynyń tanystyrylymyna osy jobaǵa qatysqan Ulybrıtanıa, Ispanıa, Fransıa, Reseı, Qytaı jáne Egıpet aýdarmashylary men ádebıetshileri, aýdarma jáne baspa uıymdarynyń basshylary, shyǵarmalary qazirgi qazaq ádebıeti antologıasyna engen avtorlar qatysty.

QR Prezıdenti ákimshiligi İshki saıasat bóliminiń meńgerýshisi, «Jahandaǵy zamanaýı qazaqstandyq mádenıet» jobasyn iske asyrýǵa jaýapty jumys tobynyń jetekshisi Aıda Balaeva qazaq ádebıetiniń úzdik úlgilerin BUU-nyń 6 tiline aýdaryp, taratý - ult tarıhyndy buryn-sońdy bolmaǵan, qazaq mádenıetin álemge tanystyrý turǵysynan teńdesi joq bastama ekenin aıtty.

«12 sáýirde «Rýhanı jańǵyrý»  baǵdarlamasynyń bastalǵanyna eki jyl toldy. Osy eki jyl ishinde Elbasy naqtylaǵan 6 joba boıynsha qyrýar jumys atqaryldy. Basty maqsat - qazaq mádenıetin shetelge tanystyrý. Onyń ishinde ádebıettiń orny bólek. Ádebıet - ónerdiń shyńy, mádenıettiń qazyǵy. Sondyqtan ár halyqtyń negizgi bolmysyn, dúnıetanymyn  ádebıet arqyly tanýǵa bolady. Eki jyl ishinde bizde táýelsizdik kezeńinde bolmaǵan úlken qadam jasaldy. Ulttyq mádenıetimizdiń bar jetistigin álemdik mádenıettiń altyn qoryna qosýdyń alǵashqy qadamy ádebıetten bastalyp otyr. Qazaq ádebıetiniń eń ozyq týyndylaryn BUU 6 tilinde sóıletýge óris ashyldy.

Qazaq aqyn jazýshylarynyń 2 tomdyq antologıasy aǵylshyn, orys, arab, ıspan, fransýz, qytaı tilderine aýdaryldy», - dedi Aıda Balaeva.

Onyń aıtýynsha, 160 qazaqstandyq avtordyń tańdamaly shyǵarmalary bir mezette álemniń eń iri 6 tiline aýdarylyp, sol tilderde jumys isteıtin eń bedeldi baspalardan shyǵyp, 5 qurlyqtaǵy 90-nan asa eldiń joǵary oqý oryndary, kitaphanalary men ǵylymı ortalyqtaryna jetedi.

Jalpy sany 2 mıllıard 600 mıllıon halyq qazirgi qazaq ádebıetiniń jaýharlarymen tanysýǵa múmkindik alady. Sondaı-aq, jıynda «Rýhanı jańǵyrý» baǵdarlamasyn júzege asyrý jónindegi Ulttyq komısıa músheleri, Qazaqstan Respýblıkasy Mádenıet jáne sport mınıstrliginiń ókilderi, Qazaqstan Jazýshylar odaǵy men «Ulttyq aýdarma búrosy» qoǵamdyq qorynyń ókilderi boldy.

Aıta keteıik, «Jahandaǵy zamanaýı qazaqstandyq mádenıet» jobasy aıasynda qazirgi qazaq ádebıetiniń antologıalaryn BUU-nyń 6 tiline aýdarý jumysy qolǵa alynǵan bolatyn.

Antologıanyń aǵylshyn tilindegi nusqasyn Ulybrıtanıanyń Kembrıdj ýnıversıtetiniń baspasy ázirledi. Antologıanyń ıspan tilindegi nuqasyn shyǵarýdy osy eldiń mádenıet mınıstrligi qoldady. Áıgili Servantes ınstıtýty keńesshi retinde tartylyp otyr. Al 40 jyldyq tarıhy bar «Vızor» baspa úıi antologıany basyp, Ispanıanyń ózinde jáne Latyn Amerıkasynda ıspan tilinde sóıleıtin 20 shaqty elge taratady.

Fransıada Parıj qalasynyń merıasynyń nusqaýymen Fransıanyń ulttyq kitap ortalyǵy jáne Parıjdegi baspa úıi aýdarma jumysyn uıymdastyryp, Qazaq ádebıetiniń antologıasyn Fransıa, Shveısarıa, Belgıa jáne fransýz tilinde sóıleıtin taǵy 30 shaqty elge taratady. Mıhaıl Lomonosov atyndaǵy Máskeý memlekettik ýnıversıteti orys tilindegi nusqany ázirlese, Qytaı Halyq Respýblıkasynyń Ulttar baspasy eki jınaqtyń qytaı tilindegi nusqalaryn daıarlaıdy. Al arab tilindegi nusqany daıarlaý mindetin Mysyr Arab Respýblıkasynyń mádenıet jáne bilim ortalyǵy óz moınyna alyp otyr.

Bul joba Qazaqstan Respýblıkasy Tuńǵysh Prezıdenti - Elbasy Nursultan Nazarbaevtyń bastamasymen júzege asyp jatqan «Rýhanı jańǵyrý» baǵdarlamasy baǵyttarynyń biri. Ol táýelsizdik jyldaryndaǵy qazaq ádebıeti men mádenıeti, mýzykasy men beıneleý ónerin, horeografıa, kıno jáne teatr salasyndaǵy jetistikterin álemge tanytýdy maqsat etedi.

Joǵaryda atalǵan seriktes-uıymdar aýdarma, basyp shyǵarý, taratý-nasıhattaý jumystaryna jalpy sany 70-ten asa mamandy jumyldyrdy. Joba QR Mádenıet jáne sport mınıstrliginiń tapsyrysy boıynsha «Ulttyq aýdarma búrosy» qoǵamdyq qorynyń úılestirýimen júzege asýda.

Usynǵan: Nazerke Labıhan