Qytaıdaǵy Qazaqstan elshiligi túrmede otyrǵan Aqjarqyn Turlybaıǵa qandaı kómek kórsetip jatqandaryn aıtty, dep jazady Qamshy.kz aqparat agenttigi Sputnik Qazaqstan saıtynyń deregine súıenip.

Qytaıdaǵy Qazaqstan Respýblıkasy elshiliginiń qyzmetkerleri Aqjarqyn Turlybaıǵa óz qaltasynan aqsha shyǵaryp kómektesip jatyr. 

Beıjińdegi QR Tótenshe jáne ókiletti elshisi Shahrat Nuryshev elshilik qyzmetkerleriniń Aqjarqyn Turlybaımen únemi baılanysta ekenin aıtady.

"Mysaly, konsýl Bolat Syrlybaev eki aı saıyn qyzben júzdesip, óz qaltasynan aqsha shyǵaryp, oǵan qajettiniń bárin alyp beredi. Oqýlyqtaryn satyp alyp berdi ótkende, óıtkeni qazir Aqjarqyn aǵylshyn tilin tereńdetip oqyp jatyr.

Odan bólek kúndelikti tutynysyna qajetti usaq-túıek zattaryn da ápergen. Bizde mundaı shyǵyndar búdjette qarastyrylmaǵan. Sondyqtan keıde osyndaı jaǵdaıda ishimizden aqsha jınap, mundaı shyǵyndardy ózimiz kóterip alamyz", - deıdi ol.

Esirtki tasymaldady dep aıyptalǵan qazaq qyzynyń isi áli tolyqqandy qaralyp bitken joq. Elshiliktegiler qosymsha tergeý jumystary áli júrgizilip jatqanyn aıtady. Tergeýshiler qazir Aqjarqyndy Qazaqstannan shyǵaryp salǵan adamdardy tekserip jatyr eken. Osy faktiler ábden zerdelengen soń ǵana Qytaı soty sheshim shyǵarmaq. 

Aqjarqyn Turlybaıdyń taǵdyry

Qazaqstan azamaty Aqjarqyn Turlybaı 2014 jyly naýryzda Gýanchjoý áýe-jaıynda ustalǵan bolatyn. Oǵan shekaradan 4,5 keli esirtkini alyp ótpek boldy degen aıyp taǵyldy. Al Aqjarqyn ony ózine bildirtpeı bireýler tyǵyp jiberdi deýmen keledi.

Qytaı soty ony ómir boıyna bas bostandyǵynan aıyrǵan bolatyn. Alaıda keıinnen sot sheshimi joıylyp, isti qaıta qaraýǵa keri jibergen.

Usynǵan: Nazerke Labıhan