Túrkistan oblysy, Jetisaı qalasynda oryn alǵan ógeı shesheniń qatigezdik máselesi endi qudalar arasyndaǵy daýǵa ulasatyn túri bar. 
Osy oqıǵa boıynsha aqparat taratqan tilshi úsh qyzdyń bir jyldan astam ýaqyt ógeı shesheden teperish kórip júrgenin Dinmuhamed Qoıymbetov osyǵan deıin de qudalarǵa aıtqanyn jazady. Dinmuhamed Qoıymbetov - úsh qyzdyń ákesiniń aǵasy, dep jazady Qamshy.kz aqparat agenttigi Ernur.kz portalyna silteme jasap.

2019 jyldyń 11 sáýirinde apaly-sińilili Salıma, Mánshúk jáne Mılana aýrýhanaǵa túsken kúni qudasyna qyzynyń qylyǵyn aıtyp, Dinmuhamed qońyraý shalǵan. Qyzyn alyp ketýge kelgen Juldyzdyń ákesi jeke sóılesemiz dep qyzyn shetkerirek shyǵarady. 

«Shetkerirek baryp ekeýiniń áńgimesine qulaq túrsem, ákesi qyzyn urysyp, aıyptaýdyń ornyna, «Qyzym, nege sonsha urdyń qyzdardy. Aıtyp edim ǵoı, ura berme dep. Ursań da kógermeıtin, eshkimge kórsete almaıtyn jerlerinen urmaısyń ba? Úsheýin birdeı aýrýhanaǵa túsirdiń, ne boldy endi? Bir-bireýlep urmadyń ba sonsha urǵyń kelip tursa» degenin estigende, ózimdi ustaı almaı, ekeýin de úıden qýyp shyqtym», - deıdi Dinmuhamed Qoıymbetov.

Ógeı shesheniń jaqyndary taǵylǵan aıyppen kelispeıdi

Osy oqıǵaǵa baılanysty mán- jaıdy anyqtaý maqsatynda, ERNUR.KZ tilshisi qazir aıyp taǵylyp otyrǵan ógeı sheshe Juldyz Kóbeevanyń otbasymen tildesken. Jetisaı aýdanynda kámeletke tolmaǵan apaly-sińlili úsh qyzdy uryp-soǵyp, uzaq ýaqyttan beri qınap keldi dep aıyptalǵan 

Juldyz Kóbeevanyń týystary ózderine taǵylǵan aıyptarmen tolyq kelispeıtinin aıtady.

Sonymen qatar, Juldyzdyń ákesi Pernebaı Kóbeev úsh qyzdy óz qyzdaryndaı qabyldaǵandaryn, olardyń apta saıyn qydyryp keletinin alǵa tartyp: «Ata biz úıge barmaı-aq, osynda qala salaıyqshy. Úıge Juldyz mamam kelgenshe biz Dımash (Dinmuhambet Qoıymbetov) aǵa men ájemniń úıinde bólek-bólek júrdik. Úı sharýasyn bárimiz birge emes tek biz ǵana isteımiz» degen Sabınanyń sózinen sekem alyp qalyp edim. Biraq, aqyr sońy mundaı bolady dep esh oılamadym», - deıdi. 

Pernebaı Kóbeev óz qyzyn aqtamaıtynyn da jetkizdi 

«Osy oqıǵa baılanysty qyzym múldem kinásiz dep aqtap otyrǵan joqpyn. Onyń da aıyby bar. Oqıǵa bolǵan kúni, ıaǵnı, 11 sáýirde Juldyzdyń qyzdarǵa urysqany ras. Biraq, kempiraýyzben qınap, tyrnaq pen ettiń arasyna ıne tyǵyp jaýyzdyq tanytpaǵan. Úıdegi qural-saımandar otbasyna ortaq dúnıeler. Nurmash únemi kóshede bolǵan soń úıdegi er azamattyń maıda-shúıde jumystaryn áıel zaty istemegende kim isteıdi? Úıdegi kúıgen shamdy da, úzilgen toqty da qyzym ózi aýystyryp, synǵan jıhazdardy da ózi jóndeı beretin qyzym. Osynyń bárin biletin qudalar endi bul dúnıelerdi basqasha maqsatta paıdalanyp jatyr», - dep kúıinedi ol. 

Úsh qyz aýrýhanaǵa túsken soń, qudalarymen tildespekke umtylǵan Pernebaı Kóbeev ózine qudaǵıy Álıanyń:«Seniń qyzyńa shyǵarǵan shyǵynymdy, toı jasaýǵa ketken aqshamdy sen áli maǵan tolyq qaıtaratyn bolasyń. Bul úsheýi men neni aıt desem sony aıtady, ne iste desem sony isteıdi» dep ses kórsetkenin aıtady. 

«Meıli, eger meniń qyzym olar aıtqan qatygezdiktiń bárin jasap, dálelin taýyp jatsa tıisti jazasyn alsyn. Kinásiz bolsa, úıde eki jasar balasy kútip júr, ári ózi ekinshisine júkti qyzdy bosqa qınamaı bosatsa», - degen Juldyzdyń ákesi tilshilerden aqparatty bir jaqty taratpaýdy suraıdy. 

Usynǵan: Nazerke Labıhan