Qazaqstan ǵylymy aýyr qazaǵa ushyrady. Seksen toǵyz jasqa qaraǵan shaǵynda fızıka-matematıka ǵylymdarynyń kandıdaty, dosent  Habıba Kamalqyzy Sársenbaeva dúnıeden ozdy. Habıba Kamalqyzy joldasy, kórnekti ǵalym, geologıa-mıneralogıa ǵylymdarynyń doktory Kósher Muqanuly Muqanovpen birge ulaǵatty urpaq tárbıelep, úlgili otbasy bolýmen qatar elimiz úshin kóptegen ıgilikti isterdiń bastamashysy bolǵan. Elimizdiń ǵylym- bilim salasynda jarty ǵasyr eńbek etken fızık ǵalym Habıba Kamalqyzy 1990 jyldardaǵy naryq kezeńinde turmystyń taýqymetin tartqan kóptegen otbasyna qaraılasqan meıirban jan edi. Habıba Kamalqyzy ál – Farabı atyndaǵy Qazaq Ulttyq ýnıversıtetinde  ustazdyq qyzmet atqara júrip,  fızıka – matematıka salasynda kóptegen jańalyqtar ashty. Dosent ǵalym uzaq jyldar kafedra meńgerýshisi qyzmetin de atqarǵan. Ǵalymnyń jolyn qýǵan shákirtteri búginde elimizde ǵana emes, shet memleketterde de eńbek etýde.  Ol kisiniń qamqorlyǵyn kórgen qazaq, orys, tatar, t.b. ulttyń ókilderi “el anasy” dep atap ketken Habıba Kamalqyzy eki ret qajylyq saparmen Mekkede bolǵan.

Ǵalym anamyzdyń otbasy men týǵan-týystaryna qaıǵysyna ortaqtasa otyryp kóńil aıtamyz. Jatqan jeri jannat bolyp, nury beıishte shalqysyn. Artyndaǵy urpaǵy aman bolsyn.