Búgin Nur-Sultan qalasynyń ákimi Baqyt Sultanov elordadaǵy kópbalaly analarmen kezdesti. Qala basshysy kóp balaly analardyń talap-tilekterin tyńdap, ákimshilik jalpy memleket tarapynan atqarylyp jatqan sharalar men kómekter týraly baıandap berdi dep habarlaıdy Qamshy.kz aqparat agenttigi Elorda Info saıtyna silteme jasap.

Búgin Nur-Sultan qalasynda "Hılton" ǵımaratynyń aldynda bir top analar shoǵyrlanyp, ózderiniń narazylyqtaryn bildirdi. "Baspana" dep aıqaılaǵan qalyń toptyń aryny jýyrda basyla qoımaǵan. Analarmen mámilege kelý úshin  Eńbek jáne halyqty áleýmettik qorǵaý mınıstri Berdibek Saparbaev pen Nur-Sultan qalasynyń ákimi Baqyt Sultanov arnaıy ýaqyt bóldi. 

Bas kóterýdiń artynsha Elorda aqparat saıtynda tómendegideı málimetterge tunǵan materıal jaryq kórdi. "Kóziqaraqty oqyrman men kóp balaly analar ózderine qandaı jaǵdaı qarastyrylǵanyn bile júrsin" degen nıetpen jazbany jarıalap otyrmyz. 

Nur-Sultan qalasy ákiminiń sheshimimen elorda turǵyndarynyń ómir sapasyn jaqsartý maqsatynda keshendi jospar ázirlengen.

Onyń ishinde komýnaldyq qyzmet tólemderine kómek; múmkindigi shekteýli jandardy alyp júretin adamdardyń jolaqysyn tóleý; múmkindigi shekteýli balalarǵa kómek kórsetý; kópbalaly otbasylarynyń balalarynyń kolejde tegin oqýy; turǵyn úı sertıfıkattary; kópbalaly otbasylarynyń mektep, kolejde oqıtyn stýdentteriniń jolaqysyn tóleý; kópbalaly otbasylarynyń balalaryn mektepte tegin tamaqtandyrý; saýyqtyrý lagerlerine joldama berý; mektep formasy men kanselárıalyq taýarlarmen qamtamasyz etý; balabaqshalardan oryn berý; JOO kópbalaly otbasylarynyń balalary úshin grant bólý; kópbalaly analar búdjet esebinen tisin emdep, saldyrý; jer úıde turatyn kópbalaly otbasylaryn qysta otymen qamtamasyz etý sıaqty kómek túrleri bar.

Áleýmettik turǵydan az qamtylǵan jáne kópbalaly otbasylardy qoldaý úshin qosymsha 13 shara qolǵa alynyp, oǵan 6,5 mlrd teńge bólindi.

Bıylǵy jyly Nur-Sultan qalasynda áleýmettik salaǵa bólingen qarjy somasy 150 mlrd teńgeni qurap otyr. 2019 jyldyń sáýirinen bastap qaladaǵy emhanalarda ár senbi saıyn kópbalaly otbasylardy qabyldaý uıymdastyrylǵan. Múmkindigi shekteýli balalardyń úılerine baryp kómek kórsetýge qarastyrylatyn qarjy 6,5 AEK-ten 10 AEK (25250 teńge) deıin artty. Bul sharamen 228 adamdy qamtý kózdelip otyr. Sonymen qatar buǵan deıin habarlaǵanymyzdaı, bilim berý qorynan da áleýmettik kómek alýǵa bolady.

Jergilikti atqarýshy organ áleýmettik az qamtylǵan otbasylardy jan-jaqty qoldaý úshin 30-dan astam tólem júrgizýdi qolǵa alǵan. Bul maqsatqa bólingen qarjy 12,2 mlrd teńge. Baspana máselesin sheshýge tólenetin tólemder ortasha alǵanda 18 % artty, ol úshin taǵy 34 mln teńge bólingen. Kópbalaly 1300 otbasy mamyr aıynda qonys toıyn toılaıdy. 1300 Bilim berý, densaýlyq saqtaý salasy men polısıa departamenti qyzmetkerleriniń baspana máselesin sheshýge 2 myń turǵyn úı sertıfıkatyn berý kózdelgen.

Jergilikti búdjet esebinen áleýmettik álsiz topqa qosymsha qoldaý kórsetiletin bolady. Áleýmettik joba aıasynda aýtızmmen aýyratyn balalarǵa arnaıy qyzmet kórsetý úshin búdjetten 40 mln teńge qarastyrylǵan. Qazirgi tańda Nur-Sultan qalasynda 100-deı balaǵa osyndaı kómek kórsetiledi.

Jumyspen qamtý baǵdarlamasy aıasynda 2019 jyly 1,2 mlrd teńge bólindi. Sonyń nátıjesinde qoǵamdyq jumysqa tartylatyn azamattar sany 500-den 1 myń adamǵa deıin artady. Qoǵamdyq jumystarmen qamtamasyz etilgen adamdardyń jalaqysy 48 myńnan 84 myńǵa deıin kóbeıdi.

Ataýly áleýmettik kómekke qatysty suraqtardy Smart Astana qosymshasynan bilýge bolady.

Usynǵan: Ádilet Mádenıet