Atyraý oblysynyń ákimi Nurlan Noǵaev oblystyq máslıhattyń depýtattaryna óńirdiń aǵymdaǵy jyldyń birinshi jartyjyldyǵynda damýy týraly baıandady dep jazady Qamshy.kz aqparat agenttigi.

Atyraý oblysynyń áleýmettik - ekonomıkalyq damýyna ósim tán. Aldymen, óńir ekonomıkasynyń damýyna munaı-gaz sektory yqpal etip otyr. Sonyń ishinde, ındýstrıalyq-ınnovasıalyq damý jobalary bar. Ótken tórt jylda jalpy somasy 3,17 trln. tenge 35 joba iske asyrylyp, bul qosymsha 3,8 myń jumys ornyn qurýǵa múmkindik berdi.

Oblys ákimi atap ótkendeı, ekonomıkany dıversıfıkasıalaý óńirdiń kóptegen máselelerin sheshýge múmkindik beredi. Birinshi jartyjyldyqta aýyl sharýashylyǵynyń jalpy kólemi 22,3 mlrd. teńgeni qurady. Agroónerkásip sektoryn qarjylandyrýdyń arqasynda tamshylap sýarylatyn egistik alqaby 2,8 myń gektarǵa deıin ulǵaıdy. Bul egistiktiń jalpy aýmaǵynyń úshten biri. Sý tapshylyǵyn sezinip otyrǵan aımaqta tamshylap sýarý ádisi sharýalarǵa úlken kómek bolary sózsiz.

Múıizdi iri qara maldyń sany turaqty ósýde. Aýyldyq kásipkerlerdiń nesıege qoljetimdiligin qamtamasyz etý úshin «Aýyl sharýashylyǵyn qarjylyq qoldaý qory» arqyly jeńildetilgen mólsherlememen nesıeleýge jyl saıyn jergilikti búdjetten qarjy bólinedi. 2013-2019 jyldary osy maqsatta 2 mlrd. 357 mln. teńge bólinip, 416 bıznes-joba qarjylandyryldy. 2019 jyly «Aýyl-El besigi» jobasy aıasynda perspektıvalyq aýyldyq eldi mekenderdiń áleýmettik jáne ınjenerlik ınfraqurylymyn damytýǵa memleket qazynasynan 900 mln. teńge bólindi. 

Oblys ákimi atap ótkendeı, turǵyn úımen qamtamasyz etý halyqtyń ál-aýqatynyń negizi bolyp tabylady. Jyl basynan beri oblysta 378,6 myń sharshy metr turǵyn úı paıdalanýǵa berildi. Densaýlyq saqtaý jáne bilim berý salasy qyzmetkerleri úshin 297 páterlik 4 turǵyn úı kesheniniń qurylysy aıaqtaldy. Barlyǵy, bıyl 3395 páterlik 40 turǵyn úıdiń qurylysyn aıaqtaý josparlanǵan. Budan bólek, 5 531 páterlik 77 kóppáterli turǵyn úıdiń qurylysy júrgizilýde.

Qazirgi kezde oblys halqynyń 98,4% tabıǵı gazben qamtylǵan. Azǵyr óńiriniń 10 aýylyn gazdandyrý arqyly bul kórsetkish 99,5% jetedi. Azǵyr óńirin gazdandyrý jumystary aıaqtaldy, gazdy eldi mekenderge jetkizý jumystary bastaldy.

Esep berý kezinde oblys ákimi Úkimettiń 15 shildedegi keńeıtilgen otyrysyndaǵy Prezıdenttiń bergen tapsyrmalaryna toqtaldy. Osy tapsyrmalardy oryndaý úshin óńir basshysy jergilikti atqarýshy organdardyń aldyna óńirdiń odan ári áleýmettik-ekonomıkalyq damýy boıynsha birqatar mindetter qoıdy. 

"Qarapaıym zattar ekonomıkasy" aıasynda suranysqa ıe jáne olardy Atyraý oblysynda shyǵarý tıimdi bolatyn halyq tutynatyn taýarlardyń óndirisin uıymdastyrý qajet. Agroónerkásip salasyndaǵy baǵdarlamalardyń, jobalardyń tıimdiligin arttyrý úshin olarǵa taldaý jasalady.

Óńir basshysy, sondaı-aq, adresti áleýmettik kómekti taǵaıyndaý, jumyspen qamtý baǵdarlamalarynyń tıimdiligin arttyrý, turǵyn úımen qamtamasyz etý, jastardy qoldaý, medısınalyq qyzmet sapasyn jaqsartý, avarıalyq jaǵdaıdaǵy mektepter men úsh aýysymmen oqytatyn mektepter problemasyn sheshý máseleleri, ekologıalyq ahýaldy jaqsartý sharalary jóninde tıisti organdarǵa naqty tapsyrmalar berdi.