Jańa oqý jylynda oblystaǵy 655 mektepte 193 myńnan astam oqýshy bilim alady. Al birinshi synypqa 21 myńnan astam búldirshin qabyldanady. Budan bólek aǵymdaǵy jyly 4, 9 jáne 10 synyp oqýshylary jańartylǵan mazmunda bilim alady. Al kelesi jyldan bastap 11 synyptyń balalary da osy baǵyt boıynsha oqıtyn bolady. Osylaısha, bizdiń óńir mektepteri jańartylǵan mazmundaǵy bilim alýǵa tolyq kóshedi.

– Oblystaǵy mektepterde 2019-2020 jylǵy oqý jylynda 61 364 bala oqıtyn bolady. Óńirimizde balabaqsha, shaǵyn ortalyqtar men mektep-balabaqsha keshenderi de jumys isteıdi. Onda 15 631 bala tárbıelenýde. Jalpy aıtqanda, bizdiń aımaqtaǵy 3-6 jastaǵy búldirshinderdiń 100 paıyzy mektepke deıingi bilim berýmen 100 paıyz qamtylǵan, – dedi Shyǵys Qazaqstan oblysy ákiminiń orynbasary Ásem Núsipova.

Jıyn barysynda balalardy birinshi synypqa 6 jastan bastap qabyldaý týraly normanyń engizilýi týraly saýaldar qoıyldy. Oǵan jaýapty sala mamandary jańa oqý jylynan bastap birinshi synypqa 1 qyrkúıekke deıin 6 jasqa tolǵan balalardy jáne aǵymdaǵy jyldyń sońyna deıin 6 jasqa tolatyn balalardy qabyldaýǵa bolatyny týraly keńinen túsindirip berdi. Árıne, bul rette eń bastysy ata-ananyń qalaýy eskeriledi.

Aıta keteıik, 1 synypqa kelgen balalar úshin bilim berý baǵdarlamasy boıynsha árip oqytý, esep shyǵarý, jazý, mátin oqý qarastyrylǵan. Al mektepaldy daıarlyǵynan ótpegen balalar úshin mektepterde daıarlyq kýrstary jumys isteıtin bolady.

Aǵymdaǵy jyldyń 1 maýsymynan bastap oblystaǵy mektepterde 1 synypqa baratyn balalardyń qujattary elektrondy túrde qabyldanýda. Qyzmettiń túrin ata-analar elektrondyq sıfrlyq qoltańba arqyly www.vko.ddo.kz saıtynan ala alady. Atalmysh joba ata-analar úshin tıimdi. Óıtkeni olar balasyn mektepke úıden shyqpaı-aq ornalastyra alady. Saıt arqyly ótinishterdi qabyldaý 1 shildeden 30 tamyzǵa deıin qabyldanady.

Brıfıń barysynda jańa mazmundaǵy bilim berý baǵdarlamasyna kóshý máselesi keńinen talqylandy. Aǵymdaǵy jyldyń birinshi qyrkúıeginen bastap 4,9,10 synyp oqýshylary osy baǵytta oqıtyn bolsa, 11 synyp oqýshylary kelesi jyldan bastap bul baǵdarlamaǵa qosylmaq. Sóıtip, kelesi jyly barlyq mektep jańartylǵan mazmundaǵy bilim berý baǵdaramasyna kóshedi.

Oqýshylardy oqýlyqtar men oqý-ádistemelik quraldarymen qamtamasyz etý maqsatynda bıyl oblystyq búdjetten 2 mlrd. 383 mln. teńge bólindi. Josparǵa sáıkes óńirdegi mektepterde bilim alyp jatqan barlyq oqýshy jańa oqý jylynyń basynda oqýlyqtarmen qamtamasyz etiledi.

Al bastaýysh synyptaryna arnalǵan qosymsha jumys dápterlermen qamtamasyz etý máselesine keletin bolsaq, ony satyp alýǵa ata-analar mindetti emes. Oqý barysynda qarapaıym dápterlerdi qoldanýǵa bolady.

–  Oblystaǵy 1-4 synypta oqıtyn 82 162 oqýshyny dáptermen qamtamasyz etý úshin 752,4 mln. teńge qajet. Bul oblys búdjeti úshin qomaqty soma. Sondyqtan, biz ata-analar Bilim jáne ǵylym mınıstrliginiń keńesine qulaq asady dep nemese balalary úshin dápterlerdi alýda birlesken jaýapkershilikke keledi dep úmittenemiz, – dedi Ásem Núsipova.

1 tamyzdan 30 qyrkúıekke deıin «Mektepke jol» respýblıkalyq qaıyrymdylyq aksıasy uıymdastyrylady. Osy oraı atalmysh aksıa bıyldan bastap aǵymdaǵy jyl sońyna deıin ótetinin aıta ketken oryndy. Aksıa aıasynda az qamtylǵan jáne kópbalaly otbasylaryndaǵy 33000 myńnan astam balany qoldaý josparlanyp otyr, bul maqsatta jalpyǵa mindetti oqý qorynan 2 mlrd. teńge bólinedi.

Búdjet qarjysynan bólek, kómekti demeýshiler men mesenattar da kórsetýde, olardyń kómegimen búgingi kúnge 14 343 balaǵa 157 mln. teńge kóleminde kómek kórsetildi.

Aıta keteıik, az qamtylǵan jáne kópbalaly otbasylardan shyqqan balalar tegin mektep formasymen jáne ystyq tamaqpen qamtamasyz etiledi.

Shyǵys Qazaqstan oblysynyń ákimi D.K.Ahmetovtyń bastamasymen óńirimizde jaratylystaný pánderi boıynsha zamanaýı materıaldyq bazany qurý jáne oqý úrdisine İT tehnologıalaryn engizýge baǵyttalǵan «Meniń mektebim» jobasy júzege asyrylýda.

Atalmysh joba aıasynda eki jyl ishinde aımaqtaǵy barlyq 655 mektepte İT synyptary jasaqtaldy. Bıyl 378 İT synyby ashyldy. Bul maqsatta oblystyq búdjetten 899 mln. teńge jumsaldy.

Oqýshylar İT baǵdarlamalardy meńgerýi úshin Semeı qalasyndaǵy Elektrotehnıkalyq koleji men Óskemen qalasyndaǵy Polıtehnıkalyq koleji bazasynda 3-11 synyptarda sabaq beretin oqytýshylardy İT baǵdarlamalary boıynsha oqytý uıymdastyryldy. Eki jyl ishinde 1127 muǵalim kýrstyq daıarlyqtan ótti. Oonyń ishinde 2019 jyly shaǵyn jınaqtalǵan mektepterden kelgen 573 muǵalim bar.

Sol ýaqyt aralyǵynda 8 myńnan astam oqytýshylar bilimin jetildirdi. Onyń ishinde 500 fızıka, bıologıa, hımıa, ınformatıka pánderiniń muǵalimderi bar.

2016 jyldan bastap óńirimizde úsh tildik bilim berý baǵdarlamasy júzege asyrylýda. Oblystaǵy 11 mektepte aǵylshyn tilinen bólek, fransýz tilin de oqytý qolǵa alynady. Búgingi kúnge 200 oqýshy fransýz tilin oqyp jatsa, 2019 jylǵy 1 qyrkúıekten bastap olardyń sany 1000 balaǵa jetedi dep kútilýde.

Oblystaǵy bilim oshaqtary joq 307 aýyldyq okrýgtiń balalaryn jaqyn mańdaǵy mektepterge tasymaldaý júzege asyrylady. Bul maqsatta 163 avtobýs bólingen. Osy oraıda ózge aýyldarǵa baryp oqıtyn 3695 oqýshy bar ekenin atap ótken orydy. Onyń ishinde 2 948 bala kún saıyn sabaq bitken soń úılerine jetkizilse, 750 oqýshy mektep janyndaǵy ınternattarda turatyn bolady.

Aǵymdaǵy jyly alǵashqy qońyraý kúni jeksenbi kúnimen tuspa-tus kelip tursa da, saltanatty shara ótetin bolady. Al mektep oqýshylary men kolej stýdentteri 2 qyrkúıekten bastap oqýǵa kirise alady.