Jambyl oblysy Jýaly aýdanyndaǵy Jylqyshytóbe kóne qalashyǵy ornyndaǵy arheologıalyq zertteý jumystary qarqyn aldy dep jazady Qamshy.kz aqparat agenttigi. 

Qazaqstandyq tarıhshylardyń erekshe qyzyǵýshylyǵyn týǵyzǵan tarıhı nysan aýmaǵynda ǵylymı qyzmetkerlermen birge on adamnan turatyn top jumys istep jatyr. Jylqyshytóbe qalashyǵynyń jurty ótken jyly Jýaly aýdandaǵy Teris aýylynyń mańynda arheologtar júrgizgen barlaý jumystary nátıjesinde tabylǵan bolatyn. Mamandar bul qalashyqtyń irgetasyn bizdiń dáýirimizge deıingi İİ jáne İ ǵasyrlarda qalanǵan bolýy múmkin dep boljam jasaýda. Ári olardyń aıtýynsha tarıhy tereńde jatqan mundaı nysandar respýblıka aýmaǵynda sırek kezdesetin kórinedi.

– Bul qalashyq osydan eki myń jyl buryn turǵyzylǵan. Mundaı baılamǵa biz júrgizilip jatqan zertteý jumystarynyń nátıjesinde kelip otyrmyz. Qala jurtynyń orny tolyqtaı arshylatyn bolsa otandyq tarıh ǵylymy birqatar tyń derektermen tolyǵa túsetindigine senimdimin. Qazir qalanyń qabyrǵalary arshyldy. Aldyn ala boljam boıynsha kóne qala jurty eki qabattan turady. Qalanyń keı qabyrǵalary buzylmaı sol kúıinde saqtalǵan. Qalyńdyǵy eki metr, keı jerlerde úsh metrge deıin jetedi. Tarıhı orynnyń biri retinde «Jylqyshytóbeni» keleshekte týrısik ortalyqqa aınaldyrýǵa bolady,– deıdi Álkeı Marǵulan atyndaǵy arheologıa ınstıtýtynyń jetekshi ǵylymı qyzmetkeri Dókeı Táleev

Tarıhshy ǵalymdar sonaý bizdiń dáýirimizge deıingi İİ jáne İ ǵasyrlarǵa jatatyn Jylqyshytóbe qalashynyń ornyna orta ǵasyrlarda áıgili bolǵan Barkýab qalasynyń salynýy múmkin degen aqparatty da aıtady.

–Jylqyshytóbe qalashyǵynyń jurty óte úlken aýmaqty alyp jatyr. Ári onyń qazir qazba jumystary júrgizilip jatqan tusy bir kezderi basqarý ortalyǵy bolýy da ǵajap emes,–deıdi tarıhshy Saýran Qalıuly.

Jylqyshytóbe qalashyǵynyń júrgizilgen arheologıalyq qazba jumystary kezinde ǵalymdar baıqaǵan bir erekshelik qala jurtynyń shatyry qazaqy kıiz úıdiń tóbesine kóbirek uqsas bolýynda bolyp otyr.Tipti qazba jumystary barysynda arheologtar jerlengen adamnyń súıekteri de tabylǵan. Olar súıekter keıinnen Baqaly aýyly mańyndaǵy zıratqa qaıta jerlengen.