Konstıtýsıa kúni qarsańynda Atyraýda «QR Konstıtýsıasy: birlik, turaqtylyq jáne órkendeý» atty respýblıkalyq ǵylymı-praktıkalyq konferensıa ótti.

Sharany bastap ashqan QR Konstıtýsıalyq Keńesiniń múshesi Únzıla Shapaq elimizdiń basty qujatynyń barlyq qazaqstandyqtar úshin mańyzyn atap ótti.

Qazaqstan Respýblıkasynyń Konstıtýsıasy 1995 jylǵy 30 tamyzda jalpyulttyq referendýmda qabyldanyp, oǵan bes ret ózgerister engizildi: 1998, 2007, 2011, 2017 jyldary jáne 2019 jyly.

Qoldanystaǵy Konstıtýsıa táýelsiz Qazaqstannyń tarıhyndaǵy ekinshi ret qabyldanǵan osyndaı qujat. Birinshisi 1993 jyly qabyldanǵan bolatyn.

Konstıtýsıa Qazaqstan halqynyń elimizdi demokratıalyq, zaıyrly, quqyqtyq jáne áleýmettik memleket retinde bekitýge degen umtylysyn, jigerin beıneleıdi. Eń bastysy, Negizgi zańymyz qazaqstandyqtarǵa tańdaý jasaý quqyǵyn berdi.

Elimizdiń ár azamatynyń quqyqtary men bostandyqtaryn qamtamasyz etetin ádiletti sot atqarýdyń kepili Konstıtýsıa ekenin atap ótken Atyraý oblystyq sotynyń tóraǵasy Marǵulan Bektemirov, Konstıtýsıaǵa engizilgen sońǵy ózgerister sot-quqyq qorǵaý júıesiniń damýyna oń yqpal etkenin aıtty. 

Konferensıaǵa qatysýshylardyń pikirinshe, elimizdiń Konstıtýsıasyn jalpymemlekettik, jalpyulttyq jáne jalpyazamattyq qoldaý sharalarynyń júıesi qajet. Konstıtýsıalyq jańǵyrý jaı ǵana mátindi túzetý, Konstıtýsıa normalarynyń mazmunyn túsindirý emes. Bunyń máni – konstıtýsıalyq normalardy odan ári naqty mazmunmen toltyrý úshin árbir memlekettik organ, azamattyq qoǵamnyń ınstıtýttary men azamattary turaqty jumystanýy qajet. 

Konferensıaǵa qatysqan Atyraý oblysy ákimi Nurlan Noǵaev qoǵamnyń konstıtýsıalyq mádenıetin kóterýge qatysty kóptegen máselelerdi talqylaý múmkindigi úshin uıymdastyrýshylar men qatysýshylarǵa rızashylyǵyn bildirdi. Konstıtýsıanyń prototıpteri qazaq halqynda buryn da bolǵanyn aıta ketý kerek. Negizgi zańnamalyq normalardyń biryńǵaı jınaǵynyń neǵurlym aıqyn úlgileri – Qazaq handyǵynda qoldanysta bolǵan «Jeti jarǵy» jáne «Táýke hannyń zańdary». Ataqty Tóle bı, Qazybek bı, Áıteke bı jasaqtaǵan bul zańdar jınaǵy Qazaq handyǵyndaǵy qoǵam ómiriniń barlyq salalaryn derlik rettep otyrǵan.

–  Táýelsizdik tańynda elimizge azamattardyń quqyqtary men bostandyqtaryn qorǵaıtyn qujat qajet boldy. Sol kezde Elbasy – Qazaqstannyń Tuńǵysh Prezıdentiniń bastamasymen 1995 jyly jalpyulttyq referendýmda Konstıtýsıamyz qabyldandy. Elimizdiń basty qujatynyń, sonyń aıasynda osy jyldary qabyldanǵan zańdardyń arqasynda Qazaqstan bıik belesterdi ıgerdi. Búgingi konferensıa Konstıtýsıanyń bolashaq múmkindikteri týraly pikir almasyp, oı bólisý turǵysynan paıdaly boldy. Bul elimizdiń basty qujatynyń jańa múmkindikterin ashyp, kórsetýge múmkindik beredi , – dep atap ótti Nurlan Noǵaev.