Almaty ákimdiginiń baspasóz ortalyǵynda ótken brıfıńte Almaly aýdanynyń ákimi Bekqalı Torǵaev aýdannyń áleýmettik-ekonomıkalyq damýynyń dınamıkasy jáne turǵyndar ótinishterin sheshý sharalary týraly aıtty, dep jazady qalalyq ákimdiktiń baspasóz qyzmeti.

Aýdan ákimi aýdan turǵyndarynan túsken suraqtar men ótinishterdi sheshýge erekshe nazar aýdarylatynyn habarlady.

Mysaly, Almaty ákimniń áleýmettik jelilerine Almaly aýdanynyń turǵyndarynan 2078 ótinish túsken. Olardyń 2043-i oryndaldy, 35-i jumys ústinde. Suraqtardyń basym kópshiligi komýnaldy sharýashylyq pen abattandyrýdy qamtıdy. Olar – aýla ishin abattandyrý, eski úılerdi súrý, joldardy jóndeý, kóshe jaryǵy, aryq jelilerin tazartý, jasyl jelekti sanıtarlyq qıý men alyp tastaý.

Bıylǵy jyldyń 28 tamyzynda qala ákimi Baqytjan Saǵyntaevtyń Almaly aýdany turǵyndarymen kezdesýi ótip, onyń barysynda 91 suraq qoıylǵan edi, qazirgi kezde saýaldardyń 28-i sheshimin tapty, 46-y túsindirildi (17-i jumys ústinde).

Suraqtardyń basym bóligi – trotýarlar men joldardy salý ári jóndeý, qoǵamdyq kólik jelisin damytý jáne modernızasıalaý, baǵdarshamdar ornatý jáne jaıaý júrginshilerdiń ótpeli joldaryn kóbeıtý arqyly joldarda qaýipsizdikti arttyrý, turǵyn úı-kommýnaldyq sharýa jáne basqa máseleler.

Sonyń ishinde, aýdannyń keıbir ýchaskelerinde qoǵamdyq kólik jelisiniń baǵytyna qatysty máseleler sheshildi. Mysaly, Gagarın dańǵylynan Tóle bı kóshesine deıin baratyn №212 avtobýstyń baǵyty uzardy, munda 5 beket pavılondary bar.

Chaıkovskıı kóshesi boıynda (Bógenbaı batyr men Qarasaı batyr kósheleriniń qıylysy) trotýar salý arqyly jaıaý júrginshi máselesi sheshildi.

Sháripov kóshesi boıyndaǵy ınjenerlik jeliler rekonstrýksıalandy jáne Jeltoqsan men Áıteke bı kósheleri qıylysyndaǵy aqaýlar retke keltirildi.

Shagabýtdınov – Qabanbaı batyr kósheleri túıisken jerge jaıaý ótpeli jol jasaldy, Panfılov kóshesi boıyna (Shevchenko jáne Qurmanǵazy kósheleriniń arasy) kólik qoıýǵa tyıym salatyn belgi, al shaǵyn kólikterdi Qurmanǵazy kóshesi boıyna qoıý múmkin ekendigin kórsetetin tıisti jol belgisi qoıyldy.

Bulardan ózge, Bekqalı Torǵaev Almaly aýdanynyń negizi áleýmettik-ekonomıkalyq kórsetkishteri týraly áńgimelep berdi.

Esepti kezeń ishinde aýdannyń óndiris oryndary jalpy somasy 104,7 mlrd teńge bolatyn ónim shyǵardy. Ónimniń fızıkalyq kóleminiń ındeksi 106,1%-dy quraıdy. Bólshek taýar aınalymy 389,7 mlrd teńgeni qurady, ótken jyldyń osy kezeńimen salystyrǵanda 126,1%. Kóterme taýar aınalymy 1,6 trln teńgege jetti nemese 101%, ótken jyldyń osy kezeńinde 1,5 trln teńge bolǵan edi.

Negizgi kapıtal ınvestısıasy 51,7 mlrd teńge nemese ótken jyldyń osy kezeńimen salystyrǵanda 123% (2018 j. – 40,5 mlrd teńge).

Aýdan aýmaǵynda 861 aýla bar. 2016-2018 jyldar aralyǵynda 291 aýla jóndeldi, bıylǵy jyly 215 aýla ishinde kúrdeli jóndeý jumystary júrýde.

Jeke ınvestısıany tartý esebinen bıylǵy jyly 9 ýchaske abattandyryldy, olarda balalar jáne sport alańdary boı kóterdi.

Aýdanda 5660 kv. m gúlzarlar otyrǵyzyldy, Abaı dańǵyly boıyndaǵy (Manas kóshesiniń buryshy) ýchaske abattandyryldy, munda 589 birlikte butaqtar otyrǵyzylyp, 4193 kv. m jer kógaldandyryldy.

Josparlanǵan 15 myń aǵashtyń 11,5 myńyna sanıtarlyq qıý jumystary júrgizildi, 160 apatty aǵash alynyp tastaldy. Kóktem kezinde 1245 aǵash otyrǵyzylǵan edi.

BJ tıptegi 1,3 km aryq jelisi rekonstrýksıalandy, 8 ótpeli joldar jasaldy, uzyndyǵy 200 m. bolatyn LR-5 tıptegi aryq jelileriniń naýalary qoıylýda.

Dat sáýletshisi Ian Geıldiń qaǵıdasy negizinde Jibek Joly, Baıseıitova kósheleri rekonstrýksıalanýda, Dúısenov kóshesin kúrdeli jóndeý aıaqtaldy.