Jastar arasynda kásipkerlikti damytý – jumyssyzdyqty joıýdyń negizgi alǵysharttarynyń biri. Bul rette Jambyl oblysynda Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan “Eńbek” baǵdarlamasy jastardyń ıgiligine jaraýda. Ásirese, atalǵan baǵdarlamanyń ekinshi baǵyty «Bastaý bıznes» kásipkerlik negizderine oqytý kýrsyna jalyzýshylardyń qarasy qalyń. Jýyrda osy baǵyttaǵy «Jas kásipker» jobasyna baızaq aýdanynan qatysqan 70-ke jýyq jasqa sertıfıkattar tabystaldy.

Kásipkerler palatasynyń bıznes-jattyqtyrýshysy Dıana Baltabaıqyzynyń aıtýy boıynsha, atalǵan kýrs kásipkerlik negizderin tanyp, túsinýge kómektesken. Tyńdaýshylar ázirlegen josparlaryn tanystyryp, bolashaq jobalaryn qorǵady. Bir aıta keterligi, jobalar aýyl sharýashylyǵy salalaryn, ásirese, mal sharýashylyǵy salasyn keńinen qamtyǵan.

Qatysýshylardyń eń basty artyqshylyqtary – olar áli jas, kúshi kóp jasampaz jandar. Olar bilýge qumar jáne izdenimpaz. Ózderin-ózderi jetildirýge daıyn. Alǵan bilimderin tájirıbede qoldanýdy jón sanaıdy. Bir aıǵa sozylǵan oqý barysynda jas kásipker mektebiniń tyńdaýshylary bıznes júrgizýdiń zańdyq, ekonomıkalyq jáne áleýmettik qyrlaryn, sondaı-aq marketıń pen menedjmentti oqyp, bıznes-jospar qurýdy úırendi.

Jastar óz bıznes-jobalarynda qoı sharýashylyǵy (onyń ishinde, sútti eshkiler ósirý), qus sharýashylyǵy, maılar men maılar óndirisi, tigin sehy (atele, toqý sehy), sulýlyq salondarynyń qyzmetteri (shashtaraz), avtoservıs (tehnıkalyq qyzmetteý stansıasy, shınomontaj, avtobólshekter), nan-toqash jáne kondıterlik ónimder óndirisi, qoǵamdyq tamaqtaný qyzmetteri, sheberhana (tehnıkany jóndeý, kádesyılar, qural-saımandar) jáne jylyjaı sharýashylyǵyna basymdyq bergen.

Aıta keteıik, atalmysh joba nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan "Eńbek" baǵdarlamasy aıasynda «Atameken» Ulttyq kásipkerler palatasynyń bastamasymen júzege asyrylyp otyr. Oqytý uzaqtyǵy - úsh apta. Oqý kezeńine shákirtaqy tólenedi. Oqý aıaqtalǵannan keıin sertıfıkat beriledi. Sertıfıkat 200 aılyq eseptik kórsetkishke (505 myń teńge) deıingi sommada grant alýǵa konkýrsqa qatysýǵa quqyq beredi. Sonymen qatar tómen paıyzda nesıe alamyn deýshilerge qarjylyq súıemeldeý jasalady.

Baızaq aýdany boıynsha osy jobany júzege asyrý barysynda birinshi lekte 50, al, ekinshi lekte 70 jasty qamtý jáne olardy belsendi kásipkerlikke tartý kózdelgen.