QR Prezıdenti janyndaǵy Ortalyq komýnıkasıalar qyzmetinde ótken brıfıń barysynda SHQO ákimi Danıal Ahmetov densaýlyq saqtaý salasyndaǵy bes baǵytty damytýǵa basymdyq beriletinin atap ótti.

Aımaq basshysy densaýlyq saqtaý salasyn órkendetý eń basty mindetterdiń biri ekenin aıtty. Osy maqsatta oblysta 3 jyldyq keshendi jospar jasalǵan. 2016 jyldan bastap emhanalardy halyqaralyq standarttarǵa sáıkes jabdyqtaý jáne emdeý barysynda qoldanylatyn aldyńǵy qatarly tehnologıalardy ınvestısıalaý, álemdegi ozyq emhanalar men elimizdegi jetekshi klınıkalarda mamandardy qaıta daıarlaýdan ótkizý jumystary júrgizilýde. Sonymen qatar sıfrlandyrý kezeń-kezeńimen iske asyrylýda. Búginde óńirimizde respýblıkadaǵy joǵary tehnologıalarmen jabdyqtalǵan ǵylymı ortalyqtardyń fılıaldary ashylýda. Sondaı-aq óńirdegi medısınalyq mekemeler JCI standarty boıynsha qyzmet kórsetýde.

-Oblystyq baǵdarlamany iske asyrý maqsatynda 22,3 mlrd.teńge bólinip, 1080 qural alyndy. Bul tıisti nátıjesin berdi. Osylaısha, joǵary tehnologıaly medısınalyq tehnıka kólemi 2,5 ese artyp, halyqaralyq aýdıt jumystarynyń 85 paıyzy oryndaldy. Aǵymdaǵy jyl sońyna deıin bul kórsetkish 100 paıyzdy quramaq, - dedi Danıal Ahmetov.

Medısınalyq uıymdardy jabdyqtaý medısınalyq ortalyqtardyń qurylyp, halyqaralyq standarttarǵa sáıkes joǵary sapaly medısınalyq qyzmet kórsetýine múmkindik berdi. Óńirde robotty hırýrgıa ortalyǵy, kópjaraqat pen ortopedıa ortalyqtary ashyldy. Altaı men Aıagóz aýdandarynda İİ deńgeıdegi ınsýlt ortalyqtary boı kóterdi. Sondaı-aq naýqastardyń dıagnozyn anyqtaý maqsatynda onkologıa jáne hırýrgıa ortalyǵynda MRT iske qosyldy. Semeıdegi jedel medısınalyq járdem aýrýhanasynda gıbrıdti hırýrgıalyq operasıalar jasaý úshin jańadan zal ashyldy. Jekemenshik seriktestik aıasynda oftalmohırýrgıa ortalyǵy qoldanysqa berildi. Atalmysh mekeme zamanaýı qural-jabdyqtarmen qamtamasyz etildi. Onda joǵary bilikti mamandar jumys isteıdi. Óskemende 200 oryndyq balalar aýrýhanasynyń qurylysy aıaqtalýǵa jaqyn.

Budan bólek Óskemende 300 adamǵa arnalǵan kópsalaly aýrýhanany salý máselesi qarastyrylýda. 2021 jyly Semeı ıadrolyq medısınalyq ortalyǵynyń qurylysy aıaqtalady. Sonymen qatar aımaqta onkologıa, kardıologıa, bosandyrý jáne bala, aýdandyq aýrýhanalardaǵy bas dárigerlerge arnalǵan menedjment úsh kezeńge arnalǵan baǵdarlama negizinde oqytylýda. Oqýdyń birinshi kezeńinde 3,7 myń dáriger Semeıdegi medısına ýnıversıteti men respýblıkalyq ǵylymı zertteý ınstıtýtynda bilim aldy. Ekinshi kezeńde 1,5 myń dáriger 86 sheberlik synybyna qatysty. Oǵan qazaqstandyq jáne álemdik deńgeıdegi bilikti mamandar tartyldy. Dáris oblystaǵy emhanalardyń bazasynda ótti. Úshinshi kezeńde 276 maman Ulybrıtanıa, Germanıa, Japonıa, Italıa, Polsha, Lıtva men Izraıl elderine baryp, biliktilikterin arttyryp qaıtty. Al 2020 jyly 300 medısına qyzmetkerin shetelge jiberip oqytý josparlanýda. Qazirgi kúni medısınalyq mekemeler "Altyn standart" JCI halyqaralyq standarty boıynsha akredıtasıadan ótýde. Ázirshe bul jumystar Semeıdegi jedel járdem aýrýhanasynyń bazasynda júrgizilýde. 2021 jylǵa deıin dál osyndaı medısınalyq qyzmet kórsetý standarty Óskemendegi ana men bala ortalyǵyna kelýshilerge de kórsetilmek.

-Aıta keteıik, 3 jyldyq keshendi jospar qurýdyń nátıjesinde sábı ólimi 22%, endi ǵana paıda bolǵan qaterli isik kórsetkishi 4,5% azaıdy. Onyń aldyn alý úshin dıagnostıkalaý men emdeýdiń 130 myńnan astam jańa túri engizildi. Sondyqtan turǵyndar medısınalyq qyzmet kórsetý sapasynyń damýyna 134% berip, kóńilderi tolǵanyn kórsetip otyr. Al qaterli isikti erte bastan anyqtaý jumysy 106% qurady, - dep qortyndylady Danıal Ahmetov.