5 jyl ishinde tabıǵı gaz óndirý ortasha eseppen jylyna 6 paıyzǵa, munaı óndirý 2 paıyzǵa ósken. Gaz salasynyń JİÓ-degi úlesi 2030 jylǵa qaraı 3,6 paıyzǵa deıin ulǵaıady. Bul týraly energyprom sarapshylarynyń zertteýinde aıtylady.

Munaı-gaz salasy – QR ekonomıkasyn damytýdyń basty draıverleriniń biri. Atalǵan sala sońǵy úsh jylda orta eseppen 6,1%-ǵa ósken.

2019 jyldyń on aıynyń qorytyndysy boıynsha tabıǵı gaz óndirisi 1,5%-ǵa artyp, 46,3 mlrd tekshe metrge jetken. 2018 jyly óndiris 55,5 mlrd tekshe metrdi quraǵan. Sońǵy bes jylda tabıǵı gaz óndirý jylyna orta eseppen 5,6%-ǵa ósip keledi eken.

Al gaz kondensatyn qosa alǵanda, munaı óndirý jyl basynan bergi on aıda 74,8 mln tonnany qurap, jyldyq ósim 0,3%-ǵa jetken. 2018 jyly óndiris kólemi 90,4 mln tonnaǵa jetken bolatyn. Sońǵy bes jylda munaı óndirý ortasha eseppen jylyna 2,1%-ǵa ósip jatyr.

Búginde gaz salasy munaı sektoryna qaraǵanda jyldam qarqynmen damyp keletini baıqalady. Qazirdiń ózinde JİÓ-degi gaz salasynyń úlesi 1,8%-ǵa jetti jáne udaıy ósip keledi. Sektorda jalǵasyp kele jatqan ósim JİÓ-degi úlesiniń 10 jylda 1,8%-dan 3,6%-ǵa deıin (2020-2030 jyldar) ulǵaıýyna yqpal etedi.