Dárigerler koronavırýs ınfeksıasyn juqtyrǵan Almatydaǵy tórt naýqastyń jaǵdaıy týraly aıtyp berdi, dep habarlaıdy Qamshy.kz aqparat agenttigi QazAqparattyń deregin negizge alyp. 

«Qazirgi ýaqytta koronavırýs ınfeksıasy rastalǵan dıagnozy bar 4 naýqas jatyr. Olardyń úsheýiniń jaǵdaıy qanaǵattanarlyq. Bireýi ortasha aýyr jaǵdaıda. Olar bekitilgen hattama boıynsha em alýda. Vırýsqa qarsy jáne sımptomatıkalyq terapıa ýaqytynda bastaldy. Qazir olarmen qarym-qatynasta bolǵan adamdar anyqtalyp, juqpaly aýrýlar aýrýhanasyna jatqyzyldy. Qarym-qatynasta bolǵan adamdar dárigerlerdiń baqylaýynda. Olarǵa úsh saǵattyq termometrıa júrgizilip jatyr. Koronavırýs juqtyrǵandarmen qarym-qatynasta bolǵan azamattardyń báriniń jaǵdaıy qanaǵattanarlyq. Temperatýralary kóterilýi nemese aýrýdyń basqa belgileri anyqtalǵan joq», - deıdi dáriger Aıgúl Ábdirahmanova.

Onyń aıtýynsha, aýrýhanadaǵy barlyq medısına qyzmetkeri koronavırýs ınfeksıasynyń aldyn alý jáne emdeý boıynsha jumys isteýge oqytylyp, daıyndalǵan.

Mamandar koronavırýstyń taralýyna jol bermeý úshin aldyn alý sharalaryn saqtaý kerektigin eskertedi. Turǵyndarǵa halyq kóp jınalatyn oryndarǵa barýdan ýaqytsha bas tartqan jón. Sondaı-aq dárigerler juqpaly dertten qorǵaný úshin qoldy sabynmen jıi jýyp turýǵa keńes beredi.

Eske sala ketsek, Densaýlyq saqtaý mınıstri 14 naýryzda elordada ótken baspasóz máslıhatynda Eljan Birtanov Qazaqstanda eki adamnyń koronavırýs juqtyrǵanyn jetkizgen edi. Kóp ótpeı Mılan qalasynan Nur-Sultanǵa kelgen taǵy bir qazaqstandyqtan koronavırýs ınfeksıasy tabyldy. Keıin Germanıadan ushyp kelgen Qazaqstannyń taǵy bir azamatynan koronavırýs anyqtaldy. Osylaısha bul dertke shaldyqqandar sany 4 adamǵa jetken edi. Búgin taǵy eki qazaqstandyqtan koronavırýs tabyldy.