Jýyrda oblys ákiminiń birinshi orynbasary Súıindik Aldashev pen Aqtaý qalasynyń ákimi Serikbaı Trumov qaladaǵy birneshe problemalyq nysandardyń jumysymen tanysty.

Shahardyń kókeıkesti má­­selelerin sheshý maq­­satynda qalany ara­laýǵa shyqqan aımaq basshylary ju­mys barysynda halyq ahýalyn jaq­sartatyn ilkimdi isterge qoldaý bildirse, oń ózgeristerdi tejegen problemalarǵa qapa boldy. 

14 pen 7 shaǵynaýdanda sý tartý jáne sýmen jabdyqtaý júıelerin jańartý jumystarymen aınalysyp jatqan «AıServıs» JSHS men «Onaı» JSHS ókilderi Súıindik Aldashev pen Serikbaı Trumov bastaǵan topty jumys barysymen tanystyryp, saýaldaryna jaýap berdi. Alaıda naqty jumys kestesi joq «AıServıs» JSHS-niń jumysyna kóńili tolmaǵan oblys ákiminiń birinshi orynbasary Aqtaý ákiminiń basshylyǵymen komýnıkasıa jelilerine qatysty qurylys jumystaryn qadaǵalaıtyn arnaıy komısıa qurýdy tapsyrdy. Sondaı-aq joldyń boıyndaǵy jerdi qazyp qoıyp, qala turǵyndarynyń qaýipsizdigine nemquraıdy qarap, qorshaý qoımaǵany úshin basshylar «AıServıs» JSHS-ne eskertý jasady. Al «Onaı» JSHS bastaǵan jumysshylar eńbegi qarqyndy adymmen júrgizilýde, eger osy qalpynan tanbasa, qyrkúıek-qazan aılarynda aıaqtaý josparlanǵan eken.

– Qala ákimi basshylyǵymen qurylǵan arnaıy komısıa merdi­gerdiń jumystaryn baqylaı­tyn bolady. Qubyrlardy aýystyryp bolǵan soń, aýmaqty qoqystan tazartyp, shuńqyrlardy kómip, rettep, qazbas buryn qandaı kúıde bolsa, sol qalpyna ákelip, komısıaǵa tapsyrý qajet. Keıin komısıa arqyly úzdik merdigerlerdiń tizimi jasalyp, osy tizimge súıene otyryp, jaýapty jumystardy tapsyratyn bolamyz,-dedi oblys ákiminiń birinshi orynbasary S.Aldashev.

Injenerlik júıeniń quryly­sy jáne qalpyna keltirý jumys­tarymen etene tanysqan soń basshylar bilim nárin tógetin, tárbıe dánin sebetin ǵımarattarǵa at basyn burdy. Mańǵystaý oblysy respýblıka boıynsha bala týýdan kósh bastap tur. Sondyqtan óńir úshin mektep pen balabaqshanyń orny orasan. Balalardyń bilim alýyna qolaıly jaǵdaı jasaý maqsatynda №5 orta mektep pen №17 balabaqshasynda kúrdeli jóndeý jumystary júrgi­zilip, balaqaılardyń jarqyn bola­shaǵy úshin septigin tıgizýde.

120 adam bir judyryqtaı jumylyp bilim uıasynyń ishki-syrtqy jaǵyn tolyq jóndeýde. №5 mekteptiń dırektory A.Dosovtyń sózinshe, jumystyń jartysynan kóbi aıaqtalǵan. Biraq, Aqtaý qalasynyń ákimi S.Trumov kúrdeli jóndeý jumystarynyń qyrkúıekke deıin aıaqtalatynyna kúmán keltirdi. Al oblys ákiminiń birinshi orynbasary S.Aldashev asyǵys jasap, isterine nemketti qarap, sapasyzdyqqa jol bermeý kerek­tigin eskertti. – Bunda tek buzý jumystary jasalǵan. 120 adam úshin sapaly ári tez jumys jasap, ýaqytynda aıaqtaý óte kúrdeli. Olar tamyzdyń ortasyna deıin bitirmese, muǵalimderdiń óz kabınetterin retke keltirýge ýaqyty bolmaı qalady. Balalarǵa da oqýdy bastaý qıynǵa soǵady. Bul tyǵyryqtan shyǵý joldarynyń biri – jumysshylar sanyn kóbeıtý jáne naqty jospar qurý,-dedi Súıindik Aldashev.

1973 jyldan beri jóndeý kórmegen balabaqsha da túgeldeı jańaryp, kóz súısindirer qalypqa endirilýde. Kúrdeli jóndeýdiń aıaqtalý merzimi – qarasha bolyp belgilengen, sondyqtan balabaqsha tárbıelenýshileriniń ata-analarymen kelisip, balaqaılardy úıde ne basqa balabaqshada ýaqytsha ornalastyrý jaǵy qarastyrylmaqshy.

Odan soń bılik ókilderi kúrdeli jóndeýdiń támamdaý satysyna jetken mańyzdy nysandy aralady. Aqtaýdyń sáni Abaı atyndaǵy mádenıet kesheniniń ishki jáne syrtqy oń ózgeristerine kóńiliń tolyp, engizilgen jańashyldyqtaryna qýanasyń. Keshenniń zalynda oryndyqtar ornatyp, kondısıonerlik júıesin durystap, taǵy basqa shaǵyn jumystaryn bitirgen soń, mádenıet úıi esigin resmı túrde ashpaq.

Halyqqa rýhanı azyq syılar mádenıet kesheninen bólek, janyna saıa, kóńiline pana bolatyn «Aqbota» parkiniń abattandyrý jumystarymen de tanysty basshylar. Shahardyń jalǵyz parkiniń kórkeıýine úles qosýdy maqsat tutqandar nysannyń eskızdik jobasy haqynda egjeı-tegjeıli áńgimelep, qandaı qarjy bólingenin, qandaı bastamalar qolǵa alynǵanyn atap ótti. Jospar boıynsha parkte dańq aleıasy, jasyl teatr, balalarǵa arnalǵan oıyn-saýyqtar, shekaralyq jaýyngerlerge arnalǵan eskertkish taqtasy, rolık jáne skeıtbord tebetin joldar, «Qazaq aýyly» etnografıalyq kesheni, kórmelik zal, ashyq bı alańy, 200 kólik ornyna shaqtalǵan jáne qyzmet kólikterine arnalǵan turaq, «Shaǵyn Mańǵystaý» maketi syndy qyzyqty jobalar qarastyrylǵan. Qazir olardyń jobalyq-smetalyq qujattamasy daıyndalýda.

Aqtaý qalasy ákimi orynba­sarynyń mindetin atqarýshy Berik İzǵalıevtiń aıtýynsha, «Aqbotada» josparlanǵan jobalar birtindep júzege asyrylmaq. «Aqbota» parkin abattandyrýmen «Fakel» kompanıasy aınalysady. Oǵan arnaıy qarjy da bólingen»,-degen ol jaryqtandyrý máselesi de sheshimin tapqanyn aıtty. Al qala ákimi parkte oryn alatyn balalarǵa arnalǵan oıyn alańdaryn jáne taǵy basqa jobalardy kásipkerlerge berýdi usyndy. «Jerdi eshkim ıelenbeıdi. Kásipkerler tek óz isterin dóńgeletýge, jobalardyń jumysyn órge órletýge múmkindik alady. Al bizdiń mindetimiz – park ishin abattandyryp, aınalasyn jasyl jelekke toltyrý»,-dedi S.Trumov.

Tanysý jumysynyń qorytyn­dysynda bılik ókilderi zamanaýı úlgide salynǵan «Sofı med grýpp» JSHS kópbaǵytty klınıkasyna bas suqty. 6 qabatty ǵımarat san alýan baǵytta qala turǵyndaryna em-dom jasap, járdem beredi. 

– Biz eýropalyq dárigerler klasterin shaqyrdyq. Olar jergilikti mamandarmen tize qosyp jumys istep, óz tájirıbesimen bólisetin bolady. Klınıkanyń ashylýyn tamyzdyń basyna belgilep otyrmyz. Kadrlar jetkilikti. Mamandar sany 300-ge jýyq bolmaq. Jeke ınvestısıalar­ǵa salynǵan medısınalyq nysan aımaqtyń densaýlyq saqtaý salasyna aıryq­sha úles qosaryna senimdimin. Shetel mamandarymen 2 jylǵa kelisimshartqa otyrdyq. Osy ýaqyt ishinde jergilikti dárigerler biliktiligin arttyryp, jańa eýropalyq tájirıbeni meńgeredi,-dedi «Sofı med grýpp» JSHS kópbaǵytty klınıkasynyń medısınalyq dırektory Z.Shadaıa.

Óńir basshylary medısınalyq nysanmen tanysqan soń klınıkanyń bolashaq baǵytyna qoldaý bildirip, keleshek qyzmetine sáttilik tiledi. Qaladaǵy qordalanǵan máselelerge kýá bolǵan oblys ákiminiń birinshi orynbasary Súıindik Aldashev pen qala ákimi Serikbaı Trumov aldaǵy ýaqytta problemalardyń sheshilýin jaqyndatyp, naqty isterge kóshetinin jetkizdi.