Almaty. Qamshy portaly – Mańǵystaý oblysyndaǵy jumyssyzdar munaı sektorynan basqa salaǵa barmaı otyr. Basty sebep - jalaqy tómen. Búgin Mańǵystaý oblysynyń ákimi Alık Aıdarbaev osylaı málim etti.

Oblys basshysynyń sózine qaraǵanda, óńirde jumyspen qamtý jaǵdaıy da jaǵymdy kórsetkishke ulasyp otyr. Onyń aıtýynsha, óńirde halyqtyń jumyspen qamtylý kórsetkishi 266 myń adamdy quraıdy, bul ótken jylǵy kórsetkishke qaraǵanda 3 paıyzǵa artyq.

«Jumyssyzdar sany azaıyp otyr, olardyń sany qazir 15 myńǵa jetpeıdi. Jalpylama alsaq, bizdegi jumyssyzdardyń basym bóligi munaı sektorynan jumys izdeıdi. Olardyń árqaısysyna derlik basqa salalarda jumys oryndary usynylǵanymen, jalaqynyń tómendigine oraı jumyssyz 10 adamnyń altaýy odan bas tartady. Sondyqtan da biz mańǵystaýlyqtar úshin jańa múmkindikterdi qamtıtyn «Jańa serpin» atty baǵdarlamany júzege asyra bastadyq. Atalmysh baǵdarlama jaqyn 3 jylda 9 myńnan astam jumys oryndarynyń ashylýy boljanatyn 32 joba úshin mamandar daıarlaıdy», - deıdi A.Aıdarbaev.

Budan bólek, oblys ákimi óńirdegi densaýlyq saqtaý máselesine de toqtaldy. Onyń aıtýynsha, oblystaǵy ómir súrýdiń ortasha uzaqtyǵy 71,7 jasty quraıdy. 

«Mańǵystaý oblysynda bala men ana ólimi aıtarlyqtaı azaıdy, turǵyndar arasynda qan aınalymy júıesiniń aýrýynan bolatyn ólim-jitim edáýir tómendedi. Týberkýlez aýrýyna shaldyqqandar men osy aýrý saldarynan kóz jumǵandar qatary azaıdy. Muny úlken jetistik dep aıtýǵa bolady», - dedi Alık Aıdarbaev.