Osy jeksenbi almatylyqtardyń esinde Qazaqstan Prezıdentiniń tosyn sheshimimen qalatyny ras. Elimizdegi iri megapolısti jeti jyldan astam ýaqyt basqaryp kelgen Esimov myzranyń ornyna jap-jas, únemshil saıasatker – Baýyrjan Baıbek keldi. Elbasynan mundaı sheshimdi eshkim kútpese kerek-ti. Endi qalanyń ekinshi tynysy ashylar degen úmitti kómeski kúdik basyp álek.

Osy kúnge deıin biletinimizdeı, Baýyrjan Qydyrǵalıuly únemshil saıasatker. Tipti, Baıbek myrzanyń únemshildik týraly sózderi jýrnalıserdiń kelemejine aınalyp ketkeni de jasyryn emes.

Partıa tizginin ustap úırengen 41 jasar ákim qala avtıvimen  tanysa sala jumysty bastap ketkenge uqsaıdy. Bas partıany 3 jyl basqarǵan Baıbek myrzany endi qandaı Almaty kútip tur? «Qamshy» portaly saraptama jasap kórgen bolatyn.

1. «Jolsyz» jol. Keptelisi kóp Almatynyń jol máseleleri áli sheshim tappaǵany belgili. Jylyna eki-úsh márte jóndeletin «jolsyz» joldardy Baıbek myrza, bir retke keltire alasyz ba?
2. Qoqysstan. Qoqys basqan qalanyń bylyǵy men shylyǵyn alaǵaı da bulaǵaı shaqta Baýyrjan Qydyrǵalıuly, qalaı sheshpeksiz?
3. Ekologıa. Almatynyń lastanǵan aýasy – búginde ózindik bir brendke aınalyp ketkendeı. Bul týraly bilmeıtin qazaqstandyq joqtyń qasy. Tipti, 2022 aq olımpıadany ótkizý senimine de selkeý túsirgen sirá, osy lastanǵan aýa bolsa kerek-ti.
4. Almaty seısmo-qaýipti aımaq sanalatyny belgili. Almatyda bir aptanyń ishinde eki márte jer silkingeni týraly «Qamshy» portalynda jazǵan bolatynbyz. Baýyrjan myrza buny da eskere ketkenińiz jón bolar.
5. Sel qaýipi. Almaty jurtyn arakidik áýrege salyp turatyn sel, laı tasqyndary da adamı faktorlardyń salǵyrttyǵynyń kórinisi ekeni túsinikti. Ásirese, ótken aıdaǵy Naýryzbaı aýdanynda bolǵan las tasqynynan keıin, jurttyń esi ekeý, túsi tórteý kúıge túskeni ámbege aıan. № 6, Talǵar, Shapaı sý bógenderiniń jóndeý kórmegeniniń saldarynan qarapaıym jurttyń japa shegetinin siz bilersiz, Baýyrjan Qydyrǵalıuly! Endeshe endi jurttyń seneri de siz bolyp otyrsyz.
6. Imanǵalı Nurǵalıuly Tasmaǵambetov myrza Almaty tizginin ustaǵan jyldary jaqsy bastamalar qolǵa alynǵan-dy. Solardyń biri, ákim myrza; «endigi jerde qalada salynatyn árbir úıde qazaqy naqysh bolýy kerek» degen edi. Sodan keıin-aq, Almatyda baıraq tústi, qazaqy oıý-órnektermen bezendirilgen záýlim úıler salyna bastaǵan. Endi osy bastamany siz jalǵastyrasyz ba, Baýyrjan Baıbek myrza?

Ákim myrzanyń birinshi eskerýge tıis máselesi – Almaty álde bir saıasatkerler oılap júrgendeı emes,  orysshyldyq sındromynan áldeqashan aıyqqan. Esimov myrza eskermeı ketken másele de osy bolsa kerek-ti.  Eks-ákim tipti jýrnalısermen kezdeskende de, sháı ishkende de, qalalyq aktıv músheleri kezdeskende nemese esep berý jıyndarynda da, jumysynda da, úıinde de Reseıdiń memlekettik tiline júginetin. Dese de, onyń aýdıtorıasy – qazaq tildi edi. Resmı derekterge súıensek, Almaty turǵyndarynyń sany – 1,5 mıllıonnan asyp jyǵylǵan. Olardyń 50,7 paıyzy ózge qalalardan kelgen mıgranttar. Demek, Qazaqstannyń ózge aımaqtarynan kelgenderdi qosa alǵanda megapolıste 2,5 mln astam jan  sany tirkeledi. Bul degenińiz Baıbek myrza – Almatynyń ekonomıkalyq damýyna, óndiristiń qarqyndap ósýine, ishki taýar jáne saýda aınalymynyń úderisti jolǵa qoıylýyna  - mıgranttardyń úlesi mol ekendigin bildiredi.

Aıtpaqshy, «Úlken Alma» shaharynyń tizginin endi ǵana ustaǵan Baýyrjan Qydyrǵalıuly Baıbek myrza – Táýelsizdik kúni qalada bolyp, Táýelsizdik monýmentine gúl shoqtaryn qoıyp, taǵzym jasaýdy da umytpaǵaısyz. Buny da tájirbıe kórsetken-tin. Esimov myrza eskermegen egemendik merekesin endi Baıbek myrza eskerer degen úmit.

Eks-ákimimiz birde, «qaladaǵy qardy kúreýdiń keregi joq. Ózi erip ketedi» dep qatyrǵan edi. Bul týraly qazaqstandyq BAQ az jazbaǵan da. Endigide Esimov myrzanyń eski jolymen emes, «Nur Otanızasıa» eleginen ótip kelgen jańa ákim – Baýyrjan Baıbek myrzadan jurt aıtarlyqtaı jańashyldyqty, ózgeristi kútetini haq. Sondyqtan, sharýasy shash etekten sozylyp jatqan Qazaqstandaǵy iri megapolıstiń dóńgelegin jahandyq  daǵdarys kezeńinde Memleket basshysynyń únemdeý saıasatynyń sheńberinen shyqpaı ıgerip áketý sizdiń qabyletińiz  ben qarqynyńyzdy kórseteri anyq.

Nurgeldi Ábdiǵanıuly