Elorda kásipkerleri 118 mln somasyndaǵy búdjet qarajatyn jymqyrǵandary úshin sottaldy. Bul týraly qarjy monıtorıńi komıteti habarlady.

QR QM qarjy monıtorıńi komıteti Nur-Sultan qalasynda «QazIndustry» Qazaqstandyq ındýstrıa jáne eksport ortalyǵy» AQ búdjettik aqsha qarajatyn jymqyrý faktisi boıynsha 2 kásipkerge qatysty qylmystyq tergeýdi aıaqtady.

Aıyptalýshylar baqylaýyndaǵy kásiporyndarǵa jalǵan tulǵalardy rásimdep, is júzinde negizgi qyzmetti ózderi júrgizip otyrǵan. Jymqyrý tehnologıalyq prosesterdi jetildirý boıynsha tehnıkalyq jabdyqtaýǵa qyzmet kórsetýge bergen, shyndyqqa saı kelmeıtin 118 mln teńge somasyndaǵy shyǵynnyń óteýin zańsyz alý arqyly júzege asyrylǵan.

Kórsetilgen memlekettik qarjylyq kómek eń aldymen OSHB qoldaýǵa, sonymen qatar taýar, jumys jáne qyzmet kórsetýdiń ózindik qunynyń túsý saldary men shyǵyndy óteýge arnalǵan.

Nur-Sultan qalasynyń Esil aýdany sotynyń úkimimen kásipkerler QR QK 190-babynyń 4 baby boıynsha (alaıaqtyq) kináli dep tanylyp, árqaısysyna 5 jyl búdjet qarajatyn alýǵa qatysty qyzmetpen aınalysý quqyǵy men 6 jylǵa bas bostandyǵynan aıyrý jazasy taǵaıyndaldy.

Sot sonymen qatar yntymaqtyq tártipte kásipkerlerden «QazIndustry» Qazaqstandyq ındýstrıa jáne eksport ortalyǵy» AQ paıdasyna múliktik zalal esebinde 118 mln teńge men memleket kirisine ár kásipkerden 1 770 000 teńgeni memlekettik bajǵa óteý túrinde óndirip alýǵa qaýly shyǵardy.