Búgin Almatydaǵy Ulttyq baspasóz klýbynda saǵat 14:30-da «Kósh kerýeni keri burylmasyn» degen atpen baspasóz máslıhaty ótedi. «Kóshi-qon zańyna» engizilgen sońǵy ózgeristerge baılanysty ótkizilip jatqan bul jıynǵa Muhtar Shahanov, Qabdesh Jumadilov, Zardyhan Qınaıat, Asyly Osman, Smaǵul Elýbaı, Raqym Aıyp bastaǵan qoǵam qaıratkerleri qatyspaq. Esterińizde bolsa, atalǵan zańdy halyq qalaýlylary toptasqan Májilis pen Senat bir aýyzdan maquldap, Elbasynyń qol qoıýyna jibergen. Eger Elbasy bul ózgerister men tolyqtyrýlarǵa bas ızese, "Qazaq kóshi" múldem toqyrýǵa bet alady. Óıtkeni shetelden keletin etnıkalyq qazaqtardyń mártbesi jat jurttyqtarmen teńestirilip, Qazaqstan azamattyǵy Atajurtqa oralǵan soń tek 5 jyldan keıin ǵana beriletin bolady. Eshqandaı qujatsyz 5 jyl ómir súrý kez kelgen adamnyń qolynan kelmeıdi. Iaǵnı Elbasy ózi muryndyq bolǵan "Qazaq kóshine" osylaısha núkte qoıylady. Bul Zań Elbasy qaraýyna jiberilgennen bastap Qazaq zıalylary aıtýyndaı aıtyp, jazýyndaı jazyp keledi. Endigi jalǵyz úmit - "Ult kóshbasshysynda".