Memleket basshysy buqaralyq sportty damytýdyń mańyzdylyǵyn, jas urpaqtyń sporttyq jáne shyǵarmashylyq áleýetine erekshe nazar aýdarý qajet ekendigin atap ótken bolatyn.

Qalada buqaralyq sportty damytý, jastardyń bos ýaqytyn tıimdi uıymdastyrý baǵytynda tıimdi is-sharalar atqarylýda.
Qala ákiminiń bastamasymen alǵash ret qala mektepteri arasynda fýtbol, voleıbol, basketbol, shahmat sport túrlerinen «Shymkent jastar lıgasy» ótkizildi. Jastar lıgasyna 140 jalpy orta mekteptiń 536 komandasy qatysty. Oıyndarǵa 8569 oqýshy qamtyldy.

Sondaı-aq, Shymkent qalasynda shyǵarmashylyq úıirmeler men sport seksıalarynda shuǵyldanýshylardyń sanyn arttyrý úshin tıisti ınfraqurylymdy jáne qosymsha jumys oryndaryn kóbeıtý maqsatynda sporttyq úıirmelerdi jan basyna shaqqandaǵy qarjylandyrý iske asyrylýda.

Búgingi tańda qalada 4096 balaǵa 71 sport túrinen tegin sport seksıalaryn uıymdastyrý úshin jergilikti búdjetten (jan basyna shaqqandaǵy qarjylandyrý) 339,8 mln teńge qarjy baǵyttaldy. Bul kórsetkish 2021 jyly jalpy bos balalardyń qosymsha sporttyq seksıamen qamtý úlesiniń 5,3 %-yn quraıtyn bolady.

Aıta keteıik, búginde qalada memlekettik-jekeshelik áriptestik aıasynda 5 sport klýby jumys isteıdi.