Shymkent qalasynyń ákimi Murat Áıtenovtiń tóraǵalyǵymen Investısıalyq shtabtyń kezekti otyrysy ótti. Kún tártibinde birqatar máseleler qaralyp, atqarylǵan jumystar qorytyndylandy.

Jıynda jańa jobalar men olardyń ózekti máseleleri, negizgi kapıtalǵa salynǵan ınvestısıalardyń 7 aıda oryndalýy men aldaǵy josparlar, «Óńirlik brendterdi damytý» jobasy aıasynda shaǵyn jáne orta bıznesti damytý, Ál-Farabı, Eńbekshi jáne Qarataý aýdandary ákimdikteriniń ınvestısıa tartý boıynsha atqarylyp jatqan jumystary talqylandy.

Jıynda aldymen Zoom júıesi arqyly ınvestorlar 9 jobany usyndy. Kómirqyshqyl gazyn qaıta óńdeıtin «PET» JSHS, «SLT» kókónis jáne jemisti qaıta óńdeý, «Selena Group» qurǵaq qospalar daıyndaý, «IýjStroıServıs» qoımalar óndirisi qurylysy, «Kazahstanskaıa neftehımıcheskaıa Kompanıa Kemıkal» JSHS, «Shymkent qus» JSHS, «Keremet Sapa» JSHS kókónis saqtaý, «Prestige House» JSHS-nyń kópqabatty turǵyn úı jobasy jáne «Samruq» sport kesheniniń qurylysy tanystyryldy. Aldaǵy aqparattarda jańa jobalarǵa jeke-jeke toqtalyp ótemiz.

Investısıalyq shtab otyrysyna basqarma basshylary, aýdan ákimderi jáne Zoom júıesi arqyly ınvestorlar qatysty.

Oǵan qosa, Shymkent qalasynyń Investısıalyq shtabtyń kezekti otyrysynda qaladaǵy shaǵyn jáne orta bıznestiń damý máseleleri talqyǵa tústi. Atap aııtqanda, bul baǵytta «Óńirlik brendterdi damytý» jobasy, «İsker qala» óńirlik baǵdarlamasy boıynsha usynystar aıtyldy.

Atalǵan jobalar boıynsha qalalyq kásipkerler palatasynyń dırektory Nurlan Qabyshtaev, qalalyq kásipkerlik jáne ındýstrıaldy-ınnovasıalyq damý basqarmasynyń basshysy Bereke Dúısebekov baıandady.

Kásipkerler palatasy dırektorynyń aıtýynsha, búginde «Bastaý Bıznes» kýrsyn bitirgenderge qoldaý jetkilikti. Olarǵa negizinen úsh baǵytta – ónerkásip, saýda jáne qyzmet kórsetý, agroónerkásip kesheni boıynsha túrli jeńildikter usynylýda.

Shaharda shaǵyn jáne orta bıznestiń tıimdiligin arttyrýdyń keshendi sheshimderi qolǵa alynýda. Sonyń biri – kishi ındýstrıaldy aımaqtar qurý. «Bastaý Bızneste» oqyǵan kásipkerlerge kishi ındýstrıaldy aımaqtan oryndar usynylýda. Basty artyqshylyqtary – daıyn saýda oryndary, jeńildik sharttarymen jalǵa alý jáne ınfraqurylymnyń qoljetimdiligi.
Sondaı-aq, óńirlik brendterdi damytý aıasynda franshıza jobalarynyń tıimdiligin arttyrý kózdelýde. Franshıza – daıyn bıznes. Onda kásipti tolyq súıemeldeý múmkindigi bar.

Shtab otyrysynda shaǵyn jáne orta bıznesti damytýda «İsker qala» óńirlik baǵdarlamasyn qabyldaý, óńirlik baǵdarlama qoryn qalyptastyrý boıynsha qarjy kózderin qarastyrý, «Bastaý bıznes» kýrsyn jergilikti búdjetten qarjylandyrý boıynsha usynystar talqylandy.

Jalpy 2021-2023 jyldary kútiletin nátıjelerge toqtalyp ótsek. Qalada 1000 saýda núktesimen óńirlik 50 brendti qalyptastyrý (3000 jumys orny), 500 jeke kásipkerlik nysany boıynsha 4 kishi ındýstrıaldy aımaq qurý (2,5 myń jumys orny) josparlanýda. Sonymen qatar, 30 kooperatıv uıymdastyryp, sharýa qojalyq sanyn 600-ge jetkizý nazarda. Jumys ornynyń sany – 1,5 myń.

Aıta ketsek, búginde shaharda 69,5 myń shaǵyn kásipkerlerik nysandary jumys isteıdi: Abaı aýdanynda – 24 177, Ál-Farabı aýdanynda – 16 551, Eńbekshi aýdanynda – 16 151 jáne Qarataý aýdanynda – 12 651 nysan bar.

Belsendi shaǵyn jáne orta bıznes nysandarynyń sanyn bıyl 71 myńǵa jetkizý kózdelgen. Al 2023 jyly 83 myńǵa jetkizý josparda. Bıyl qańtar-naýryz aıynda 222,1 mlrd teńgeniń ónimi shyǵarylǵan.

Investısıalyq shtabtyń kezekti otyrysynda jańa jobalar men jobalardyń ózekti máseleleri qaraldy. Zoom júıesi arqyly ınfestorlar óz jobalaryn usyndy. Aýyl sharýashylyǵy ónimderin qaıta óńdeý, qurylys salasy, qus sharýashylyǵyn damytý boıynsha jáne áleýmettik nysandar qurylysy, jalpy 9 joba tanystyryldy.

Atap aıtqanda, «RET» JSHS kómirqyshqyl gazyn qaıta óńdeıtin kásiporyn salýǵa nıetti. Joba quny – 3,5 mln AQSH dollary. 2022-2023 jyldarǵa josparlanǵan joba táýligine 40 tonnadan astam kómirqyshqyl gazyn qaıta óńdeýge qaýqarly.

Jemis jáne kókónisterdi qaıta óńdeýge mamandanǵan «SLT» kásiporny 200 adamdy turaqty jumyspen qamtymaq. Óndiris orny saǵatyna 3 tonnadan astam jemis jáne kókónisterdi qaıta óńdemek. Qural-jabdyqtar Túrkıa, Belgıa, Germanıa jáne Italıadan ákelinedi. Qazirgi ýaqytta kelisimder júrgizilýde.

Al «KEREMET-SAPA» JSHS kókónis saqtaý baǵytyna mamandanǵan. Joba quny – 500 mln teńge. Altyntóbe turǵyn alabynda qurylys úshin jer telimi daıyn.

Selena Group (Polsha) kompanıasy qurylysqa qajetti qurǵaq qospalar óndirisi jobasyn usyndy. Joba quny – 3 mlrd teńge. Jeke kásipker óndiristi 2021-2022 jyldary iske asyrýdy josparlap otyr. Oǵan qajetti jer telimi – 2 ga. Juldyz ındýstrıaldy aımaǵynan jer telimin berý kózdelýde.

«Shymkent qus» JSHS qus fermanyń qurylysy úshin 3 gektar jer telimi qajettigine nazar aýdardy. Jylyna 60 mln dana jumyrtqa óndiretin kásiporynnyń joba quny – 1 200 mln teńge. 30 adam turaqty jumys ornymen qamtylmaq. Búginde jobalaý jumystary júrgizilýde.

Sonymen qatar, FK «Samrýk» jeke kásipkerligi «Samruq» sport kesheniniń qurylysyn salýdy josparlaýda. Oǵan sáıkes, mını-fýtbol alańdaryn ashý, jaǵajaıdaǵy mını-fýtbol, ashyq manej, aýqymdy sporttyq is-sharalardy ótkizýmen qatar, boks, kúres, shahmat, ústel tenısi, gımnastıka, balet, karate jáne taǵy basqa sport túrlerin damytýdy kózdeýde. Joba quny – 1 mlrd teńge. Jobany 2021-2025 jyldary iske asyrýǵa nıetti. Oǵan 4,0 ga jer telimi qajet.

Sondaı-aq, shtab otyrysynda «IýjStroıServıs» JSHS-nyń qoımalar óndirisi, «Kazahstanskaıa Neftehımıcheskaıa Kompanıa KEMIKAL» JSHS-niń polımerler óndirisi jáne «Prestige House» JSHS-niń kópqabatty turǵyn úı jobasy tanystyryldy.