Shymkent qalasynyń jumyspen qamtý jáne áleýmettik qorǵaý basqarmasyna qarasty №2 arnaýly áleýmettik qyzmetter kórsetý ortalyǵynda jasy on segiz jastan asqan İ-İİ toptaǵy psıhonevrologıalyq aýrýlary bar, kómekke muqtaj múgedekterge qyzmet kórsetiledi. Qazirgi tańda ortalyqta 246 azamat 8 baǵyt boıynsha arnaýly áleýmettik qyzmet túrlerin alýda.

Búginde ortalyqtyń áleýmettik-medısınalyq qyzmeti boıynsha dárigerlerdiń bólmesi, stomatologıa, akýsher-gınekolog, massaj, sáýlemen emdeý, emdik dene shynyqtyrý bólmeleri bar. Sonymen qatar, qyzmet alýshylarǵa psıhologıalyq kómek kórsetý boıynsha da qarqyndy jumystar júrgiziledi. Emdelýshilerdiń eńbek terapıasyna arnalǵan arnaıy bólmeler, yńǵaıly pandýstar, qyzmet alýshylarǵa barlyq jaǵdaılar jasalǵan.

Jaqynda ortalyqtyń tehnıkalyq bazalaryn jańartý maqsatynda jańa óndiristik zattar, medısınalyq quraldar men jıhazdar alyndy. Ortalyqqa alynǵan bakterısıdti kamera, óndiristik útik, kir jýý qondyrǵysy jáne t.b. qajetti quraldar qyzmet alýshylarǵa emdik sharalaryn júrgizýde septigin tıgizýde.

Atap aıtsaq, últrakúlgin bakterısıdti kameralar medısınalyq qyzmettiń kez-kelgen beıinine arnalǵan. Olar sterıldi medısınalyq quraldarmen jumys júrgiziletin operasıalyq, tańý, qaraý ortalyqtyń stomatologıalyq kabınetterinde, emdeý-profılaktıkalyq bólmelerinde qoldanylýda.

Aıta keterligi, ortalyq tarıhı - hronologıalyq tártipte 1953 jyly 30 qarasha aıynan «Shymkent qorǵasyn zaýyty kezindegi múgedekter úıi» dep atalyp, búgingi tańǵa deıin birneshe ataýy aýystyrylǵan.