«Nur Otan» partıasynyń Tóraǵasy, Elbasy Nursultan Nazarbaev 2019 jyly «Jastar jyly» aıasynda «Jas maman» jobasyn ázirleýdi tapsyrǵan bolatyn. Atalǵan jobanyń basty maqsaty – elimizde eń kóp talap etiletin 100 kásip boıynsha 180 kolej ben 20 ýnıversıtetti jańartý men bilikti mamandardy daıarlaýdyń halyqaralyq tájirıbesin engizý bolyp tabylady.

Atalǵan joba negizinde atqarylǵan jumystarmen tanysý úshin Shymkentke Parlament Májilisiniń depýtaty, «Nur Otan» partıasy fraksıasynyń múshesi Súleımenova Juldyz Dosbergenqyzy arnaıy is-saparmen kelip, birqatar oqý oryndaryn aralady. Sonymen qatar ol «Nur Otan» partıasynyń «Ózgerister joly: barshaǵa laıyqty ómir!» atty saılaýaldy baǵdarlamasyn Shymkent qalasy boıynsha iske asyrý maqsatynda ázirlengen Jol kartasynyń oryndalýy boıynsha birneshe mektepterdiń oqý prosesimen de tanysty.

Májilis depýtaty aldymen Ońtústik Qazaqstan memlekettik pedagogıkalyq ýnıversıtetiniń jumysymen tanysty. «Rýhanı jańǵyrý» baǵdarlamasynyń «Jańa gýmanıtarlyq bilim: qazaq tilindegi 100 jańa oqýlyq» jobasy aıasynda ýnıversıtette 2018 jyly shildede ashylǵan kovorkıng ortalyǵyn kórdi. «Nur Otan» partıasynyń «İT mamandar daıyndaý» jobasy sheńberinde balalardy baǵdarlamalaýǵa jáne İT-mamandyqtarynyń daǵdylaryna úıretetin alty aqysyz «IT-SYNYP» synyptary ashylǵan. «IT-SYNYP» kopúterlik synyptary Wi-Fi aımaqta ornalasqan, mýldımedıalyq podıýmdarmen qamtymasyz etilgen, NR-24 kompúterlik 80 monoblokpen, joǵary jyldamdyqty Internetke (100 Mbıt/s) qosylǵan Web-kameralarmen jabdyqtalǵan. Saılaýaldy baǵdarlamanyń júıeli oryndalýy pysyqtaldy.

Kelesi nysan №5 «Jeńil ónerkásip jáne servıs kolejiniń» ujymymen kezdesip, oqý ornynyń materıaldyq-tehnıkalyq jaǵdaıymen tanysty. Atalmysh bilim mekemesinde búgingi tańda myńnan asa shákirt tárbıelenýde. Olar tigin óndirisi jáne kıimderdi úlgileý, tiginshi, arnaıy tiginshi, modeler-pishýshi, tehnık-tehnolog, toqyma óndirisi, toqyma mashınasynyń operatory mamandyqtary boıynsha bilim alýda.

Odan soń Májilis depýtaty Shymkenttegi «Jol-kólik kolejine» bardy. Atalǵan bilim mekemesiniń «Jas maman» jobasy boıynsha materıaldyq-tehnıkalyq bazasyn halyqaralyq standarttar talaptaryna saı sońǵy zamanaýı úlgidegi qural-jabdyqtarmen qamtamasyz etý úshin memleket esebinen qajetti qarajattar bólingen. Soǵan sáıkes, oqý ornyndaǵy «Avtomobıl kóligine tehnıkalyq qyzmet kórsetý, jóndeý jáne paıdalaný», «Temir jol kóligindegi avtomatıka, telemehanıka jáne qozǵalysty basqarý» mamandyqtary boıynsha eńbek naryǵynda suranysqa ıe bilikti mamandar daıarlaý, olardyń kásibı biliktiligin damytý maqsatynda 264 mln. teńgege qajetti qural-jabdyqtar satyp alynǵan. «Jas maman» jobasy boıynsha kolejdiń avtomehanıka bólimi men temirjol bólimderiniń zerthanalary men kabınetteri talapqa saı zamanaýı quraldarmen jabdyqtalǵan. Sonymen qatar, garaj kesheninde zerthanalyq kabınet ashylyp, jańa qural-jabdyqtar ornatylǵan.

«Jas maman» jobasy aıasynda «Avtomobıl kóligine tehnıkalyq qyzmet kórsetý, jóndeý jáne paıdalaný» mamandyǵy boıynsha 33, «Avtomobıl kóligine tehnıkalyq qyzmet kórsetý, jóndeý jáne paıdalaný» mamandyǵy boıynsha 9, «Temir jol kóligindegi avtomatıka, telemehanıka jáne qozǵalysty basqarý» mamandyǵy boıynsha 22 ataýly qural-jabdyqtar alynǵan. Jalpy «Jas maman» jobasy aıasynda kolejderdiń materıaldyq-tehnıkalyq bazasyn halyqaralyq standarttar talaptaryna saı, sońǵy zamanaýı úlgidegi qural-jabdyqtarmen qamtamasyz etý – bilim sapasyn kóterý jolynda oń serpin bereri sózsiz.

Juldyz Dosbergenqyzy bet alǵan kezekti nysan «Saıram kómekshi ınternat-mektep-kolledji» boldy. «Nur Otan» partıasynyń «Kedergisiz keleshek» jobasy aıasynda «Saıram kómekshi mektep-ınternaty» mekemesiniń eski ǵımaraty tolyq súrilip, onyń ornyna zamanaýı talaptarǵa saı jańa ǵımarat boı kótergen. Alǵashynda balalar úıi bolyp qurylyp, keıinnen kómekshi mektep-ınternaty qyzmetine kóshken nysan endi «Saıram kómekshi mektep-ınternat-kolledj» arnaıy kesheni» komýnaldyq memlekettik mekemesi bolyp ózgertildi.

Búginde Shymkent qalasynyń bilim basarmasyna qaraıtyn kolejdegi qurylys jumystary 95 paıyzǵa aıaqtalǵan. Óz kezeginde kolejde úsh qabatty oqý ǵımaratynan bólek 100 orynǵa laıyqtalǵan asqana, akt zaly, sport zal, aǵash óńdeý jáne tigin sheberhanalary bar.

Arnaıy oqytýdy qajet etetin balalar atalǵan mektep-ınternat-kolledjin támámdaǵan soń, arnaıy mamandyqtar boıynsha dıplom alyp shyǵady. Bul bilim mekemesi Qazaqstanda tuńǵysh ret kómekshi mektep kolej mártebesin alyp otyr.
Jalpy atalǵan mekemedegi aýqymdy qurylys jumysy «Nur Otan» partıasynyń «Ózgerister joly: Ár azamatqa laıyqty ómir!» atty 2021-2025 jyldarǵa arnalǵan Shymkent qalasy boıynsha saılaýaldy baǵdarlamasyn iske asyrý boıynsha ázirlengen Jol kartasyndaǵy keshendi is-sharalar qatarynda.

Mektep-ınternat-kolledjdiń jumysymen tolyq tanysqan J. Dosbergenqyzy mektep basshylyǵy men qyzmetkerler tarapynan jumys barysynda qandaı kedergiler baryn surady. Óz kezeginde mektep ujymy depýtat nazaryna birqatar máselelerdi kóldeneń tartty. Atap aıtqanda, Bala quqyqtaryn qorǵaý týraly zańnyń 30-babynda jazylǵan «Arnaýly bilim berý uıymdarynda 11 jastan 18 jasqa deıingi devıantty minez qulyqty balalar ornalastyrylady» degendi «Arnaıy mektep ınternat uıymdarynda» degen sóılem qosýdy qarastyrýdy, azamattyq qyzmetshilerge, memlekettik búdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna ózgeris engizýin, erekshe oqytýdy qajet etetin mektep-ınternat ustazdary men tárbıeshilerine zıandylyq úshin eńbekaqysyna ústeme jalaqy 25 % tólenýin atap ótti. Óz kezeginde keńes tóraǵasy J. Dosbergenqyzy aıtylǵan usynystardy jan-jaqty zerdelep, onyń oń sheshimin tabýyna yqpal etetinin aıtty.

Májilis depýtaty, «Nur Otan» partıasynyń janyndaǵy bilim jáne ǵylymdy damytý jónindegi respýblıkalyq keńestiń tóraǵasy, fraksıa múshesi Juldyz Dosbergenqyzynyń jumys sapary qaladaǵy jekemenshik negizde ashylǵan mektepterdyń oqý prosesimen tanysýmen jalǵasty.

«Nur Otan» partıasynyń «Ózgerister joly: barshaǵa laıyqty ómir!» atty saılaýaldy baǵdarlamasyn Shymkent qalasy boıynsha iske asyrý maqsatynda ázirlengen Jol kartasynda bilim salasy boıynsha 13 tapsyrma bar. Búginde onyń 5-ýi tolyq oryndalǵan. Bilim salasy boıynsha oryndalýy tıis is-sharalardyń qatarynda úsh aýysymdy mektep máselesin sheshý kózdelgen. Osy maqsatta qalada jekemenshik mektepter ashylǵan. Sonyń biri «Al-Farabı» akademıalyk mektebi. Atalǵan nysan áý-basta toıhanaǵa arnalyp salynǵan ǵımarat (Ońtústik qabyldaý úıi) bolatyn. Keıinnen jan basyna qarjylandyrý esebinen qaıta qurylymdaý arqyly mektep bolyp ózgertilgen. Sońǵy kezderi dál osy mekteptegi oqý prosesi boıynsha áleýmettik jelide ata-analar tarapynan shaǵymdar túsken. Osyǵan oraı Májilis depýtaty atalǵan mektepke arnaıy baryp, oqý prosesi boıynsha birneshe usynystar aıtty. Depýtat aıtylǵan usynystardyń barlyǵy partıa baqylaýynda bolatynyn atap ótti.

Qazirgi tańda «Al-Farabı» akademıalyk mektebindegi 1386 oqýshynyń bilim deńgeıin kóterý úshin Fınlándıa eliniń oqý basqarmasymen kelisim shart jasalǵan. Sonyń negizinde oqýshylar fındyq júıe boıynsha bilim alýda.

Budan bólek Májilis depýtaty «Nızamhan» orta mektebiniń jumysymen tanysty. Atalǵan bilim uıasynda memlekettik standartqa sáıkes bilim beriledi. Oqý eki tilde júrgizilip, balalar tegin oqytylady. Ol jerde oqýshylarǵa qosymsha úıirmeler, sport seksıalary, robototehnıka, bı, dombyra úıirmeleri ashylǵan.

Shymkent qalasy boıynsha partıanyń saılaýaldy baǵdarlamasyn iske asyrý úshin ázirlengen Jol kartasyndaǵy 149 keshendi is-sharanyń qatarynda úsh aýysymdy mektep máselesin túpkilikti sheshý kózdelgen. Balalardy sapaly bilim berý jáne úsh aýysymdy mektep sanyn azaıtý “Nur Otan“ partıasynyń baqylaýynda. Osy maqsatta qalanyń soltústik bóliginde ornalasqan «Turan» shaǵyn aýdanynda bıyl 1200 orynǵa laıyqtalǵan mektep paıdalanýǵa berilgen. Qazirgi tańda atalǵan aýdanda turǵyn úı qurylysy qarqyn alǵan. Iaǵnı, aldaǵy ýaqytta ondaǵy turǵyndar sany arta túsetini belgili. Soǵan sáıkes keler jyly mekteptegi oqýshylar sany 2 myńǵa deıin jetedi degen boljam bar.

Atalǵan bilim uıasyna arnaıy barǵan Májilis depýtaty Juldyz Súleımenova ondaǵy oqý prosesin baqylap, jańa oqý ǵımaratynyń zaman talabyna saı jaraqtandyrylǵanyn atap ótti. Sonymen qatar ol, oqýshylardy jańa oqý jylynyń bastalýymen quttyqtap, olarǵa sáttilik tiledi. Aıta keteıik, bıyl qalada 5 úsh aýysymdy mekteptiń máselesi oń sheshilip, olardyń sany 14-ten 9-ǵa azaıady.