Elimizde azamattardyń keıbir sanattaryna áleýmettik tólemderge qoljetimdilik artyp, az qamtylǵan azamattardy áleýmettik qoldaý kúsheıedi. Búgin Parlament Májilisiniń jalpy otyrysynda Densaýlyq saqtaý jáne áleýmettik damý mınıstri Tamara Dúısenova osylaı málimdedi. Eske sala keteıik, jalpy otyrysta «Qazaqstan Respýblıkasynyń keıbir zańnamalyq aktilerine halyqty áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn. Bul týraly Qamshy portaly ınform.kz-ke silteme jasaı otyryp habarlaıdy.

Qujat Memleket basshysynyń bes ınstıtýsıonaldyq reformasy aıasyndaǵy «100 naqty qadam» atty Ult josparynda qamtylǵan áleýmettik kómektiń ataýlylyǵyn kúsheıtý týraly tapsyrmasyn oryndaýǵa baǵyttalǵan.

Mınıstrdiń sózine qaraǵanda, zań jobasy áleýmettik saladaǵy eki mańyzdy ózgeristi kózdeıdi. Birinshi - azamattardyń keıbir sanattaryna beriletin áleýmettik tólemderge qoljetimdilikti arttyrý. Ekinshiden, az qamtylǵan azamattarǵa áleýmettik qoldaýdy kúsheıtý.

«Bul rette áleýmettik tólemderdi transformasıalaý jumysy azamattardyń sanatyna qaraı taǵaıyndalatyn birneshe áleýmettik járdemaqylardy biriktirip, bir járdemaqy retinde belgileýdi kózdeıdi. Bul birinshi kezekte múgedek jáne múmkindigi shekteýli azamattarǵa qatysty járdemaqylar bolyp tabylady. Búgingi tańda bul sanattaǵy azamattarǵa eki túrli áleýmettik jámdemaqy taǵaıyndalǵan. Bul rette birinshi memleket tarapynan kepildendirilgen múgedektigi boıynsha taǵaıyndalatyn áleýmettik járdemaqy. Munyń mólsheri kúnkóris deńgeıi esebinen anyqtalady. Ekinshisi, 1999 jyldan beri natýraldy kómektiń ornyna berilip kele jatqan arnaýly áleýmettik járdemaqy. Bul járdemaqyny esepteý bazasy aılyq eseptik kórsetkish bolyp tabylady», - deıdi mınıstr Tamara Dúısenova.

Onyń sózine qaraǵanda, búgingi kúni atalǵan járdemaqylardy alý úshin múgedek azamattar eki ótinish pen eki qujattar paketin tapsyryp keledi. Al zań jobasy boıynsha osy eki járdemaqyny biriktirip múgedek azamattarǵa kólemi jaǵynan eki járdemaqynyń somasyna teń keletin memleket kepildendirgen bir járdemaqy taǵaıyndaý qarastyrylyp otyr.

«Máselen, 1-inshi toptaǵy múgedek azamatqa qazirgi kúni 30 myń 337 teńge kepildendirilgen múgedektigi boıynsha járdemaqy jáne 2954 teńge mólsherinde arnaýly járdemaqy tólenedi. Sonda járdemaqynyń jalpy somasy 33 myń 291 teńge bolyp otyr. Zań jobasyna sáıkes, osy azamatqa 33 myń 291 teńge kólemindegi múgedektigi boıynsha bir ǵana járdemaqy taǵaıyndalatyn bolady jáne bir paket qujattar tizimi engiziletin bolady», - dep túsindirdi T. Dúısenova.  

Onyń aıtýynsha, dál osyndaı ózgerister kóp balaly analarǵa tólenetin járdemaqylardy da qamtymaq. Qazirgi kúni bul sanattaǵy analar úsh áleýmettik járdemaqy túrlerin alyp keledi, olar: ekeýi bala týylýyna jáne  bala kútimine, úshinshisi osy sanattaǵy analarǵa beriletin arnaýly áleýmettik járdemaqylar. «Mundaǵy qıyndyq árqaısysyna jeke-jeke tapsyrylatyn qujatta ǵana emes, bir sanattaǵy azamattarǵa beriletin járdemaqylardy taǵaıyndaýdyń ártúrli zańdarmen rettelýine de baılanysty. Osyǵan oraı, bul sanattaǵy járdemaqylar tek bir ǵana zańmen retteledi», - dedi mınıstr.