Qabyldanyp jatqan «Densaýlyq-2020» baǵdarlamasy elimizde mindetti medısınalyq saqtandyrý júıesin engizýge baǵyttalǵan. Bul týraly Qamshy portaly ınform.kz-ke silteme jasaı otyryp habarlaıdy.

Medısınalyq saqtandyrý - halyqtyń arnaıy qorǵa jınalǵan qarajat esebinen tegin medısınalyq kómek alýyn qamtamasyz etetin júıe. Oǵan sáıkes saqtandyrý jarnalaryn jumys isteıtin azamattardyń jumys berýshi mekemeleri tólep otyrady, al jumyssyzdar men eńbekke jaramsyz adamdar úshin jarna memleketten aýdarylady. Sondaı-aq, eńbekker azamattar óz jalaqylarynan maqsatty salymdar aýdaryp otyrady. Bul júıe halyqtyń barlyq toptary úshin medısınalyq jáne dári-dármektik kómektiń teń kólemi men sapasyn qamtamasyz etedi. Iaǵnı, medısınalyq qyzmet jas pen kárige, baı men kedeıge birdeı kólemde, teń dárejede kórsetiledi. 

Mine, negizgi maqsat ta sol - azamattar men jumys berýshilerdiń densaýlyqqa degen ortaq jaýapkershiligin arttyrý. Qazirgi ýaqytta bul jaýapkershilik tek memleketke júktelgen. Árbir adam óz densaýlyǵyn kútip, salaýatty ómir saltyn ustanýy, al jumys berýshi árbir jetekshi óz qyzmetkeriniń densaýlyǵyn saqtaýǵa múddeli bolýy kerek. Óıtkeni, qyzmetker - kez kelgen kásiporyn úshin tabys kózi ekeni belgili. Osyndaı ortaq jaýapkershilik tetikteri saqtandyrý medısınasy kezinde barynsha naqty jumys isteıtin bolady.

Mindetti medısınalyq saqtandyrý túri boıynsha azamattardyń qorǵa aýdaratyn jarnasynyń mólsheri memleket kóleminde bekitiledi. Ol ár elde árqıly mólsherde belgilengen. Máselen, Fransıa turǵyndary jalaqysynyń - 16,  ıtalándar - 13, nıderlandylyqtar - 9 jáne japondar - 7 %-yn turaqty túrde aýdaryp otyrady. Al Qazaqstanda jumys berýshiler jarnasynyń kólemi kiristiń 5 %-yn quraıtyn bolady. Al qyzmetkerler jarnasynyń mólsherlemesi tabystyń 2 %-yn quramaq. Bul oraıda, olar 2019 jyldan - 1 paıyz, 2020 jyldan bastap - 2 paıyz mólsherinde qarjy aýdara bastaıtynyn aıta ketý kerek. 

Mamandardyń aıtýynsha, mindetti medısınalyq saqtandyrý júıesi medısına salasyndaǵy qyzmet kórsetý mádenıetin kóteredi. Sondaı-aq, densaýlyq saqtaý júıesinde qordalanǵan máselelerdi tıimdi sheship, kemshilikterdi joıady.S. Asfendıarov atyndaǵy Qazaq Ulttyq Medısınalyq Ýnıversıtetiniń rektory, medısına ǵylymdarynyń doktory Aıqan Aqanov dáriger retinde bul júıeniń tıimdi tustary kóp ekenin aıtady.

«Jańa júıede úsh qatysýshy bolady. Olar: memleket, emdelýshi jáne jumys berýshi. Bul júıe turǵyndardyń qajettiligine de jaýap beredi. Sondaı-aq, jumysshylardyń densaýlyǵyn qorǵaý salasynda jumys berýshiniń saıasatyn da aıqyndap beredi. Búgingi densaýlyq saqtaý modelin paıdalanyp jatqan memleketterdiń barlyǵy utylyp jatyr. Turǵyndar sapasyz qyzmetter alady, dárigerler men medbıkeler jumystyń sapasyn arttyrýǵa asa yntaly emes. Sondyqtan, medısınalyq kómek kórsetýdi uıymdastyrý júıesin ózgertý qajet-aq. Sonyń arqasynda densaýlyq saqtaý júıesi jańa sapaǵa kóshedi» deıdi A. Aqanov.

Al «Ulttyq ǵylymı-medısınalyq ortalyq» AQ dırektory Abaı Baıgenjınniń aıtýynsha, ol densaýlyq saqtaýdy resýrstyq qamtamasyz etýdi  arttyrýǵa, ekonomıkalyq qyzyǵýshylyqty jáne medısınalyq uıymdar men medısınalyq qyzmetkerlerdiń óz qyzmetiniń sońǵy nátıjesine jaýapkershilikti arttyrýǵa múmkindik beredi. Kásipkerler jumyskerleriniń densaýlyǵyn saqtaýǵa múddeli bolady. «Barlyq damyǵan elderde qoldanylyp júrgen mindetti medısınalyq saqtandyrýdy qoldaımyn, - deıdi Abaı Qabataıuly. - Ár azamat óz densaýlyǵyna ózi jaýapty ekenin túsinip, ol úshin belgili bir salymdar jasap turýy tıis».

Álemdik tájirıbede mindetti medısınalyq saqtandyrý jaqsy nátıje bergeni belgili. Máselen Fransıada halyqtyń - 80, Germanıada - 90, Belgıada - 98 %-y mindetti medısınalyq saqtandyrý júıesimen qamtylǵan.