Kentaý qalasyndaǵy transformator ónimderin shyǵaratyn «ALAGEUM GROUP» AQ jahan ekonomıkasyn turalatqan daǵdarys kezeńinde básekege tótep bergen elimizde biregeı kompanıalardyń biri. Sanaýly kúnderden keıin Astanada ótetin Qazaqstannyń mashınaqurylysshylary – İİİ forýmy qarsańynda biz atalǵan kompanıanyń Dırektorlar keńesiniń tóraǵasy Erkebulan Ilıasovpen shaǵyn suhbat órbitken bolatynbyz.Bul týraly Qamshy portaly Baq.kz –ke silteme jasaı otyryp habarlaıdy.

- Erkebulan Saıdýallauly, jahandyq daǵdarys álemdegi keıbir iri óndiristik kompanıalardyń ózin turalatyp jatqanda, qazirgi kezde sizderdiń kásiporyndaǵy jaǵdaı qalaı bolyp jatyr?

- Bizdiń kásiporynnyń irgetasy sonaý Keńes zamanynda, 1950 jyldardyń ekinshi jartysynda qurylǵan ǵoı. Iaǵnı, tarıhy tereńde jatyr desek te bolady. Alaıda, zaman aǵymynan qalmaı, kóshke ilesip otyrý úshin, óndiristi ozyq tehnologıalarmen jabdyqtap otyrý kerektigi aqıqat. Biz osyndaı kezeńdi bastap ótkerip, júz paıyzǵa deıin tehnologıamyzdy qaıta jańǵyrta aldyq desem de bolady. Árıne, bul jerde memlekettiń kómegin atap ótpeı bolmaıdy.

- Tehnologıany qaı jaqtan alyp keldińizder jáne memleketten qanda kómek aldyńyzdar? Naqtylaı tússeńiz...

- Qazir álemdik órkenıette sát saıyn san túrli jańalyqtar shyǵyp, búgin oılap tapqan jańalyǵyńyz erteń eskirip qalatyndaı shapshańdyq júrýde. Osyny eskere kele óndiristik tehnıkalarǵa zamanaýı tehnologıalar engizý tájirıbesi mol Eýropa elderiniń úlgisin qoldanysqa engizdik. Nátıjesinde, shyǵarǵan ónimderimiz sapaly ári zamanaýı. Tipti, TMD elderiniń ishinde suranysy artyp keledi. Al endi memleket tarapynan jasalǵan kómekter týraly aıtar bolsam, ol az emes. Aldymen Indýstrıalyd-ınnovasıalyq damý baǵdarlamasynyń birinshi jáne ekinshi kezeńderi boıynsha jáne «Báıterek» UBH» AQ tarapynan usynylǵan qarjylyq, keńes kómekterdiń bizdiń kompanıamyzdyń qalypty damýyna tıgizgen tıimdi jaqtary kóp boldy. Sonyń nátıjesinde biz sońǵy jyldary qural-jabdyqtarymyzdy tolyq jańartyp, óte sapaly ónimder shyǵara bastadyq. Kadrlyq basqarý men bilikti mamandarmen qatarymyzdy tolytyryp kelemiz.

- Sheteldiń tehnologıasyn ákelgen soń, onyń tetigin taýyp júrgizýde bilikti mamandar máselesin qalaı sheshe aldyńyzdar?

- Bizdiń mamandarymyz barlyǵy da óz otandastarymyz. Al shet elden tek jańa tehnologıa men tyń ádister jáne ozyq qural-jabdyqtar ǵana alyp keldik. Onyń ústine ózimizdiń kompanányń qoldaýymen jylyna 150 maman daıarlaıtyn óz oqý ornymyz – arnaıy kolejimiz bar. Bul jerde de shákirtterimizdi oqytýda memleket tarapynan granttyq negizdi bilim alatyndyǵyn atap ótpeı bolmaıdy. Iaǵnı, úkimet qarjy quıyp oqytyp jatqan stýdentterdiń teorıa men tájirıbeni qatar ushtastyra otyryp, bilikti maman retinde qalyptasýyna erekshe yqpal etýdemiz.

- Al shyǵarǵan ónimderińizdi qansha paıyzy eksporttalady jáne qaı elderge?

- Bizdiń shyǵarǵan ónimderimizdiń negizgi tutynýshysy TMD elderi. Onyń ishinde Reseı, Ózbekstan, Qyrǵyzstan, tájikstan men Túrkmenstan syndy memleketterden suranys joǵary. Al transformator men elektroqural-jabdyqtarymyzdyń 35 paıyzy eksporttalady.

- Áńgimeńizge rahmet.

 Suhbattasqan – Nurlybek DOSYBAI

P.S: Astanada ótetin Qazaqstannyń mashınaqurylysshylary – İİİ forýmy 1-2 qazan kúnderi ótedi dep josparlanýda. Shara aıasynda elimizdiń mashınaqurylys salasyndaǵy ónimderdiń Eýrazıalyq ekonomıkalyq odaq pen Dúnıejúzilik saýda uıymyndaǵy básekege qabilettiligin arttyrý jaıy talqylanady dep kútilýde.