Qazaqstanda jyl saıynǵy respýblıkalyq ınovasıalyq bıznes-jobalar baıqaýy bastaldy. Bul jaıynda búgin OKQ brıfıńinde QR IDM Tehnologıalyq jáne ınovasıalyq damý departamentiniń dırektory Azamat Batyrqoja málimdedi. Bul týraly Qamshy portaly Baq.kz –ke silteme jasaı otyryp habarlaıdy.

"Respýblıkalyq ınovasıalyq baıqaýdyń negizgi maqsaty - ınovasıalyq júıeniń barlyq sýbektilerin: oqýshylardan bastap iri kásiporyndarǵa deıin qamtý. Joba Ulybrıtanıa men Qazaqstan úkimetteriniń «Núton - Ál-Farabı» atty seriktes baǵdarlamasy sheginde júzege asatyn bolady. Bul baǵdarlamanyń maqsaty - ǵylym men ınovasıalar salasynda eki el arasyndaǵy yntymaqtastyqty nyǵaıtý arqyly Qazaqstannyń ekonomıkalyq jáne áleýmettik damýyna qolǵabys etý. Baıqaý mynadaı nomınasıalar boıynsha ótkiziledi: «Oqýshylar arasyndaǵy úzdik ınovasıalyq joba», «Úzdik jas ǵalym», "Jyldyń úzdik ónertapqysh sheshimi", "Kásiporynda ónertapqyshtyqty qoldaýdyń úzdik júıesi", "Inovasıalyq taqyryptaǵy úzdik tilshi materıaly" sonymen qatar, jýrnalıser úshin trenıńter ótetin bolady, olardyń nátıjeleri boıynsha úzdik materıaldardyń, sújetter men radıo baǵdarlamalarynyń avtorlary anyqtalady.Oqýshylar arasyndaǵy úzdik ınovasıalyq jobanyń negizigi maqsaty - balalardyń ınovasıalarǵa degen qyzyǵýshylyǵyn yntalandyrý, ónertapqyshtar urpaǵyn ósirýge yqpal etý. Al, «Eń úzdik jas ǵalym» nomınasıasy ǵalymdardy óz ázirlemelerin óndiriske endirýge, naryqqa shyǵarýǵa, ónertabystaryn endiretin ónertapqyshtardy yntalandyrýǵa arnalǵan" dedi ol óz sózinde.

Nomınasıa búkil álemge aty áıgili FameLab konkýrsynyń formatymen ótpek. Onyń tujyrymdamasyna sáıkes, qatysýshylar ádil qazylar alqasy men kópshilik aldynda ózderiniń kúrdeli jobalaryn qarapaıym túsinikti sózben tanystyrýy tıis.

"Nomınasıa jeńimpazy Londondaǵy FameLab konkýrsynyń grand-fınalynda elimizdiń namysyn qorǵaýǵa baratyn bolady. "Úzdik jas ǵalym" nomınasıasynyń jeńimpazy 7 500 000 teńgeni quraıtyn bas júldege ıe bolmaq. Konkýrs júldegerleri (2 jáne 3 oryn) sáıkesinshe 2 500 000 jáne 1 500 000 teńgeni alady. Sonymen qatar, alǵashqy úsh orynǵa ıe bolǵan qatysýshylar Ulybrıtanıadaǵy EducationTour saparyna attanady. Osy sapar aıasynda balalar Londondaǵy murajaıǵa, Roıal Grınvıch observatorıasyna, Kembrıdjdiń ǵylymı festıvaline, FireTech balalar ǵylymı lageri tárizdi oryndar men sharalarǵa qatysatyn bolady", dedi A.Batyrqoja.

Aıta keteıik, baıqaýǵa qatysý úshin ótinimderdi qabyldaý 2015 jylǵy 28 qyrkúıekten 25 qazanǵa deıin sozylady. Baıqaýdyń fınaly Astana qalasynda 11 qarashada ótedi. Júldegerler men jeńimpaz úshin Rols-Roız zaýyty, JLR (Lend Rover jáne t.b.) zaýyty, British Aerospace zaýyty, Westland Aircraft men Catapult Centres sıaqty Ulybrıtanıanyń aldyńǵy qatarly tehnologıalyq kompanıalaryna barýdy uıymdastyrý kózdelýde.