Búgin Almatyda Dúnıejúzilik týrızm kúnine arnalǵan aqparattyq týr aıaqtaldy. Osy shara aıasynda Gonkong, Germanıa, Kanada, Ońtústik Koreıa, Ulybrıtanıa jáne basqa da elderden kelgen jýrnalıser men blogerler Almatyda bir apta bolyp, qalanyń týrısik áleýetimen tanysty. Bul týraly Qamshy portaly Inform.kz-ke silteme jasaı otyryp habarlaıdy.

«Men Qazaqstanǵa jáne Almaty qalasyna birinshi ret kelip otyrmyn. Meni ásirese taýlardyń ásem kórinisi men qala ortalyǵynan taý bókterlerine 15 mınýtta jetýge bolatyndyǵy tań qaldyrdy. Bizde, Bavarıa jerinde de ádemi taýlar barshylyq. Biraq ol jaqta taý basyna shyqqanyńmen jalǵyz qala almaısyń. Áıteýir qasyńnan kem degende 50 adam tabyla ketedi. Al munda ońasha qalyp, ózińdi erkin sezine alasyń. Men muny eýropalyqtarǵa jetkizýge tyrysamyn. Ol jaqta haıkıng (jaıaý týrızm) óte tanymal. Biraq, eýropalyqtar Qazaqstannyń tabıǵaty osyndaı keremet ekendigin, munda jaıaý týrızmge barlyq jaǵdaı jasalǵandyǵyn bile bermeıdi», - dedi  «Monkeys and mountains»  dep atalatyn tanymal saıttyń blogeri Laýrel Robbıns.

Almaty qalasy ákimdigi uıymdastyrǵan atalmysh týrdyń mindeti - qalanyń týrısik tartymdylyǵyn halyqaralyq deńgeıde arttyra túsý. Sondyqtan sheteldik qonaqtar bir apta boıy negizinen qala irgesinde boldy - Almatynyń mýzeılerin, kórikti jerlerin aralady, ulttyq taǵamdardan dám tatty jáne taýǵa serýenge shyqty.

«Meni jergilikti halyqtyń eshqandaı jasandylyǵy joq shynaıy qonaqjaılyǵy tánti etti. Barlyǵy kómektesýge ázir turady. Almatyda neshe túrli eldiń ulttyq taǵamdary bar eken. Biraq, qazaqtyń ulttyq taǵamdarynyń orny erekshe. Al, Almaty - zamanýı qala. Jergilikti turǵyndar kólik keptelisterine úırenip ketken sekildi. Anaý aıtqandaı ábigerlik baıqalmaıdy», - dedi qytaılyq «International link»  jýrnalynyń ókili Frank Lok.

Ortalyq Azıany Ulybrıtanıaǵa tanytý agenttiginiń menedjeri Anna Larıdiń aıtýynsha, ony Almaty qalasy mádenıetiniń ár túrliligi tań qaldyrǵan. Munda adamdar arasynda erekshe syılastyq qalyptasqan.

«Biz kóp uzamaı «Almaty týraly 100 áser» dep atalatyn kórneki oqý quralyn shyǵaramyz. Onda Almaty týraly kóp aqparat bolady», - dedi ol.

Jalpy, týrǵa qatysýshylar Almatyda jaıaý júrginshiler úshin qaýipsizdik, tazalyq jáne basqa da qajetti jaǵdaılar joǵary deńgeıde ekendigin aıta kele, qala ákimdiginiń aýanyń lastanýyn azaıtý jáne qoǵamdyq kólik júıesin jaqsartýǵa baǵyttalǵan jumystardy odan ári jalǵastyratyndyǵyna úmittenetindikterin bildirdi.