Oral qalasynda 25 qyrkúıek kúni oblystyq koreı etnomádenı birlestiginiń 25 jyldyǵyna oraı «Eýrazıa keńistigindegi ultaralyq qatynastar. Qazaqstanda beıbitshilik pen kelisimdi saqtaýdaǵy QHA-nyń róli» taqyrybynda halyqaralyq ǵylymı-tájirıbelik konferensıa ótkizilip, oǵan Qazaqstanǵa qosa, Máskeý, Saratov, Samara, Orynbor qalalarynan kelgen jas ǵalymdar qatysty. Bul týraly Qamshy portaly Inform.kz-ke silteme jasaı otyryp habarlaıdy.

Jıynnyń ashylý rásiminde oblys ákiminiń orynbasary Baqtıar Máken Eýrazıalyq odaq qurý ıdeıasyn birinshi bolyp 1994 jyly MMÝ-da sóılegen sózinde Qazaqstan Prezıdenti Nursultan Nazarbaevtyń kótergenin atap ótti. Ýaqyt bul ıdeıanyń ómirsheńdigin kórsetip, jańa qurylym dúnıege keldi. Qazaqstan, Reseı jáne Belarýs elderi basshylarynyń Eýrazıalyq ekonomıkalyq odaq týraly kelisimge qol qoıǵany belgili. Atalmysh konferensıa da eki eldiń etnomádenı birlestikteriniń kúshimen ózara dostyq baılanysty nyqtaı túsýdi kózdeıdi.

Ultaralyq kelisimdi ornyqtyrýdaǵy belsendi qyzmeti úshin koreı etnomádenı birlestiginiń tóraǵasy Maksım Pakqa oblys ákiminiń alǵysqaty tabys etildi.

Konferensıada «Jas Eýrazıa» Eýrazıalyq jalpyreseılik qozǵalysynyń jetekshisi, Máskeý memlekettik halyqaralyq qatynastar ınstıtýtynyń aspıranty Iýrıı Kofner baıandama jasap, Qazaqstan Prezıdentiniń Eýrazıalyq yqpaldastyqty arttyrýdaǵy kóshbasshylyq róline, osynaý bastamany reseılik qoǵamnyń qoldap otyrǵanyna toqtaldy. Sondaı-aq «Orynbor», «Saratov» jáne «Sheshen eli»,   «Samara» klýbtarynyń jetekshileri Anton Jeleznák, Magomed Abýbakırov, Oleg Nevzorov óz oı-tolǵamdarymen bólisti. Qazaqstan halqy BQO assambleıasy tóraǵasynyń orynbasary Ǵaısa Qapaqov óńirde atqarylyp jatqan jumystardy aıtyp ótse, M.Ótemisov atyndaǵy Batys Qazaqstan memlekettik ýnıversıteti monıtorıń jáne sosıologıalyq zertteýler bóliminiń basshysy, fılosofıa ǵylymdarynyń doktory Pavel Dobráev qazaqstandyq jastardyń Eýrazıa yqpaldastyǵyna qatysy týraly áńgimeledi.

Koreı etnomádenı birlestiginiń jetekshisi M.Paktyń sózine qaraǵanda, Orynbor oblysyndaǵy áriptesterimen tyǵyz baılanys ornatylǵan. Sonyń dálelindeı jýyrda batysqazaqstandyqtar Orynborda ótetin Eýrazıalyq ekonomıkalyq forýmǵa qatyspaqshy. Elbasynyń «Nurly jol - bolashaqqa barar jol» atty Joldaýynda aıtylǵanyndaı, Máńgilik eldi basty baǵdar etken kezeńde barlyq ulttyń bereke-birligin arttyrýdyń mańyzy zor.