Búgin Almatyda ál-Farabı atyndaǵy Qazaq Ulttyq Ýnıversıtetiniń ǵylymı kitaphanasynda Eýropalyq joǵary bilim berý kórmesi ashyldy. Oǵan Eýroodaqtyń 24 elinen 100-den astam ýnıversıtet pen joǵary bilim berý boıynsha ulttyq agenttikterdiń ókilderi qatysýda. Bul týraly Qamshy portaly Qazaqparatqa silteme jasaı otyryp habarlaıdy.

«Qazaqstandyq jastar negizinen Germanıa, Fransıa jáne Anglıa sekildi elderdiń joǵary oqý oryndaryn jaqsy biledi. Sondyqtan bul kórmeniń basty maqsaty - jastardy Eýropanyń kóptegen elderiniń joǵary oqý oryndarymen, bilim berý júıesimen tolyqqandy tanystyrý jáne olarǵa oqýǵa túsý joldaryn túsindirý. Osylaısha olar joǵary bilim alý boıynsha kóp múmkindikterdi bile alady», - dedi óz sózinde «Eýropalyq bilim berýdiń Azıa men Ortalyq Azıadaǵy kórmesi» jobasynyń jetekshisi Stıven Veber.

Sonymen qatar, ol Eýropa elderi arasynda joǵary bilim berý júıesi men oqý aqysy boıynsha ózgeshilikter bar ekendigin jetkizdi.

«Eýropa elderi ishinde Ulybrıtanıada joǵary bilim alý qymbat turady. Munda oqý aqysy jylyna 20-30 myń eýrony quraıdy. Al kerisinshe, shyǵys Eýropa jáne Baltyq jaǵalaýy elderinde oqý aqysy arzan, birneshe myń eýrony quraýy múmkin. Sonymen qatar, mysaly Belgıada shet eldik stýdentter tek jyldyq tirkelý jarnasyn ǵana tólep oqı alady. Ol shamamen jylyna 600-700 eýro bolady. Al Germanıa, Shvesıa, Fınlándıa jáne taǵy  birqatar elderde tipti tegin de oqýǵa bolady. Bul úshin sheteldik talapkerler oqýǵa túserden kem degende alty aı buryn joǵary oqý ornymen habarlasyp, shákirtaqyǵa aryz jazady. Sonymen qatar, basqa da tıisti qujattardy tapsyrady. Eger aryz qabyl alynsa, onda ol tegin oqıdy. Tipti jataqhanaǵa da tegin turýy múmkin. Iaǵnı, qolyna shákirtaqy almaıdy. Shákirt aqy oqý aqysy men jataqhana shyǵynyn tolyǵymen jabady», - dedi S. Veber.

Aıta ketelik, kórme búgin jáne erteń, ıaǵnı senbi jáne jeksenbi kúnderi tańǵy saǵat 9.00-den 17.00-ge deıin jalǵasady.

Onda jastar Eýropalyq Odaq ýnıversıtetterinde bakalavr men magıstrden bastap, PhD deńgeıine deıin barlyq satylarda bilim alýǵa baılanysty tolyqqandy aqparat ala alady.

Al ústimizdegi jyldyń 28-shi qyrkúıeginde atalmysh joǵary oqý ornynda «Eýropalyq Odaq pen Qazaqstan Respýblıkasy arasynda joǵary bilim berý salasyndaǵy yntymaqtastyq» taqyryby boıynsha halyqaralyq konferensıa  ótedi.