Elbasymyzdyń «Nurly jol - bolashaqqa bastar jol» atty Joldaýynda Qazaqstandaǵy kúre joldar qurylysyna aıryqsha mán berilgeni málim. Bul rette Batys Qazaqstan oblysyndaǵy eń shalǵaı aýdannyń biri - Jánibek pen Oral qalasyn jalǵastyratyn joldyń mańyzy erekshe. Kópten sheshilmeı kele jatqan bul másele keıingi jyldary qolǵa alynyp, qatqyl tabandy jol tartylýda. Sonyń ishinde bıyl respýblıkalyq mańyzy bar Jánibek-Qaztalov jolynyń 20 shaqyrymyn kúrdeli jóndeý bastaldy. Bul týraly Qamshy portaly QazAqparatqy silteme jasaı otyryp habarlaıdy.

Jánibek aýdanynyń ákimi Murat Muqaevtyń aıtýynsha, 2015 jyly josparǵa sáıkes 3,8 shaqyrym joldy jóndeýge 500 mln. teńge bólingen. Jóndeý jumystaryn «RSÝ-1» JSHS júrgizýde. Al 20 shaqyrymdyq jobanyń jalpy quny - 2,7 mlrd. teńge. 2016 jyly qalǵan qarjy bólinse, jol jóndeý jalǵasady. Sonymen qatar aýdandyq mańyzy bar 271 shaqyrym avtojoldar jergilikti búdjet qarjysyna aǵymdaǵy jóndeýden ótkizilip, kútip ustalady. Mysaly, Jánibek-Talov baǵytyndaǵy joldy «Qanat» JSHS jóndeý ústinde. Sol sıaqty aýdan ortalyǵy Jánibek aýylyndaǵy birneshe kóshe joldary retke keltirildi.

Jalpy, Jánibek aýdanynda Elbasy tapsyrmasyna sáıkes qolǵa alynǵan memlekettik baǵdarlamalar oıdaǵydaı oryndalýda. Aıtalyq, «Qoljetimdi baspana - 2020» baǵdarlamasyna sáıkes aýdanda turǵyn úı qurylysy qarqyn aldy.  Burynǵy salynǵandar óz aldyna, jergilikti búdjet esebinen 8 úsh jáne 40 eki páterlik úıdiń jobalyq-smetalyq qujattamasy jasaldy. Jánibek aýylynda 157 turǵyn úı salýǵa qajetti ınjenerlik-kommýnıkasıalyq ınfraqurylym tartyldy. Qazir jer telimderi kezekpen berilýde. «Aq bulaq» baǵdarlamasyna sáıkes Jaqsybaı, Uzynkól aýyldary aýyz sýmen qamtylsa, qazirgi tańda Jánibek, Qamysty jáne Talovta sý qubyryn qaıta qurýdyń, Aqobaǵa qubyr tartýdyń  jobalyq-smetalyq qujattamasy daıyndaldy. «Agrobıznes - 2020», «Sybaǵa», «Qulan», «Altyn asyq» baǵdarlamalaryna sáıkes bıylǵy jyldyń ózinde 142 sharýa qojalyǵy 8 myń bas analyq mal men 304 asyl tuqymdy buqaǵa qol jetkizdi. 5 sharýa qojalyǵy asyl tuqymdy 71 edilbaı qoshqaryn ıelense, «Qulanǵa» sáıkes 1 sharýa qojalyǵy 5 mln. teńge nesıe aldy. Taǵy úsh sharýashylyq 35 mln. teńge nesıe almaqshy. Memlekettiń qoldaýy arqasynda barlyq aýyldyq okrýgter 119 asyl tuqymdy buqamen qamtyldy. 11300 bas analyq mal tuqymdyq túrlendirý jobasyna qatystyrylýda, bul - barlyq maldyń 83 paıyzy. Aýdan mal tuqymyn asyldandyrý baǵytynda oblysta birinshi bolyp aýyldyq tutyný kooperatıvin qurdy.

Bıyl aýdan ortalyǵynda «QPO b.v.» kompanıasynyń qarjysy esebinen 290 oryndyq balabaqsha paıdalanýǵa berilip, búldirshinderdi mektepke deıingi tárbıemen qamtý máselesi sheshimin tapty. 2020 jylǵa deıingi óńirlerdi damytý baǵdarlamasyna sáıkes bıyl Aqoba, Borsy aýyldarynda sport alańdary salynbaqshy.

«Bizdiń basty máselemiz - jol. Reseı Federasıasynyń Volgograd jáne Saratov oblysymen shektesetin aýdan úshin  taqtaıdaı tegis jol salynsa, eki jaqty tıimdi qarym-qatynasqa da óte qolaıly bolar edi. Qazirgi kezde Oral-CHapaev-Qaztalov baǵytynda salynyp jatqan jol Jalpaqtal aýylyna jaqyndap qaldy. Bolashaqta qatqyl tabandy jol Jánibekti Qaztalov, Jalpaqtal arqyly Oralmen jalǵastyrsa, munyń halyqaralyq mán-mańyzy da arta túser edi», dedi M.Muqaev sóziniń sońynda.