Pasqa merekesinde İnjildi qazaq tilinde oqyǵan shirkeý qyzmetkeriniń vıdeosy áleýmettik jelide tarady. "Kıeli kitapty" qazaqsha oqyǵan Iakov Voronsov qazaq tilin úırenýge ne sebep bolǵanyn aıtty. 

"Shirkeýge hrıstıan dinin ustanatyn qazaqtar da keledi. Sondyqtan qazaq tiliniń elementterin qosýǵa tyrystym. Qudaımen de qazaqsha sóılesýge tyrysamyn. Reseıdiń Ýkraınaǵa jasaǵan basqynshylǵynan keıin kimniń jaǵynda ekenimdi anyqtaýym kerek boldy"– dedi Iakov.

Ol Azattyq Radıosyna óz kórshilerine basqynshylyq jasaıtyn otarshyl memleketti emes táýelsiz Qazaqstandy tańdaǵanyn aıtqan.

"Biz bolashyǵymyz úshin kúresýmiz kerek ekenin túsindim. Al Qazaqstannyń bolashaǵy – qazaq tili. Bul – kópultty memleketimizdiń tatýlyǵynyń kepili. Qujatymyzda qandaı ult jazylsa da, qazaqstandyqtar úshin kim ekenin anyqtaıtyn qural – qazaq tili. Osyny túsingennen keıin qazaq tilin qarqyndy túrde úırene bastadym" – dedi shirkeý qyzmetkeri.