Tergeý bes bap boıynsha júrgip jatyr — QR QK-nyń 99-baby, 2-bólimi («Adam óltirý»), 293-baby, 3-bólimi («Buzaqylyq»), 115-baby («Qorqytý»), 432-baby («Qylmysty jasyryp qalý») jáne 434-baby («Qylmys týraly habarlamaý») boıynsha.

Tergeý barysyn jeke baqylap otyrmyn, oqıǵa ornynda mınıstrliktiń ortalyq apparatynyń qyzmetkerleri de jumys istep jatyr. Basynda áleýmettik jelilerde oqıǵanyń sebepteri týraly anyq emes aqparattyń keńinen taralýyna baılanysty mınıstrlik belgilegen tártippen (Qylmystyq is júrgizý kodeksiniń 201-baby talaptaryna saı) 15 qazanda buqaralyq aqparat quraldary ókilderiniń qatysýymen brıfıń ótkizdi, onda tergeýdiń keıbir derekteri jarıalandy, — dedi İİM basshysy Erjan Sádenov depýtattyq saýalǵa jaýabynda.

Ol qazirgi ýaqytta adam óltirdi degen kúdikpen segiz adam, al qylmys týraly habarlamaý týraly bap boıynsha úsh adam sottyń sanksıasymen qamaýǵa alynǵanyn eske saldy.

- Tergeý jalǵasyp jatyr. Onyń barysynda oqıǵa ornynda bolǵan basqa adamdardyń qatysqan-qatyspaǵany tekserilip, olardyń áreketterine quqyqtyq baǵa beriledi. Jalpy, qazirgi ýaqytta eldegi krımınogendik jaǵdaı turaqty, ishki ister organdary prezıdenttiń quqyqtyq tártipti qamtamasyz etý jónindegi tapsyrmalaryn oryndaý sheńberinde múddeli memlekettik organdarmen birlesip keshendi sharalar júrgizip jatyr, — dep tolyqtyrdy Erjan Sádenov.

Esterińizge sala keteıik, elimizde 4 qazanǵa qaraǵan túni 16 jastaǵy Sherzat Bolatty bir top adam áke-sheshesiniń kózinshe pyshaqtap ketken. Jasóspirim aýrýhanada kóz jumdy.

Buǵan deıin Sherzat Bolattyń otbasy turǵan úıdi belgisiz bireýler órtep ketkenin jazǵan edik.