Sý resýrstary jáne ırrıgasıa mınıstri Nurjan Nurjigitov Fransıanyń Qazaqstandaǵy Tótenshe jáne Ókiletti elshisi Sılvan Gıogemen kezdesip, ekijaqty yntymaqtastyq baǵyttaryn talqylady.

Atap aıtqanda, mınıstrlik Fransıanyń damý agenttigimen (AFD) jáne Fransıanyń geologıalyq jáne taý-ken zertteýler búrosymen (BRGM) yntymaqtastyq týraly memorandýmǵa jáne úshjaqty kelisimge qol qoıýǵa daıyndalyp jatyr. Vedomstvo atalǵan uıymdarmen birlesip İle-Balqash baseınine keshendi zertteý júrgizedi. Sondaı-aq jerasty sýlaryn zertteý, monıtorıńi, barlaý jáne ıgerý baǵytynda da yntymaqtastyq jolǵa qoıylady.

Budan bólek, Sý resýrstary jáne ırrıgasıa mınıstrligi Halyqaralyq sý búrosymen (OiEau) yntymaqtastyq múmkindikterin qarastyrýda.

Sılvan Gıoge óz kezeginde fransýz kompanıalary Qazaqstanda sý sharýashylyǵy qurylystaryn salý jáne rekonstrýksıalaý boıynsha jobalarǵa qatysýǵa nıetti ekenderin aıtty. Sondaı-aq sý shyǵynyn anyqtaıtyn jáne sýdy basqarýdy ońtaılandyratyn kompanıalar da seriktestik ornatýǵa qyzyǵýshylyq tanytýda.

Memorandým men kelisimge qol qoıý bizdiń yntymaqtastyǵymyz úshin mańyzdy qadam bolmaq. Biz fransýz áriptesterimizben uzaq merzimdi jáne nátıjeli jumys isteýge nıettimiz, - dedi Sý resýrstary jáne ırrıgasıa mınıstri Nurjan Nurjigitov.