QYZYLORDA. QazAqparat - Syrdarıa ózeniniń sol jaǵalaýyndaǵy Birlik aýylynda jańa meshit halyq ıgiligine paıdalanýǵa berildi, dep habarlady Qazaly aýdandyq ákimdiginiń baspasóz qyzmetinen.
«Ramberdi ıshan» meshitiniń ashylý saltanatynda sóz sóılegen aýdan ákimi Najmadın Shamuratov: «Qasıetti juma kúninde ashylǵan jańa meshittiń yntymaq pen rýhanı dostyqqa shaqyratyn orynǵa, ımandylyq jolyndaǵy rýhanı bilim oshaǵyna aınalýyna tilekshimiz. «Talap - pendeden, qoldaý - táńirden» deıdi dana halqymyz. Talapty azamattarymyzdyń izgi isteri ońǵa basyp, qulshylyq etken árbir adamnyń ystyq-yqylasy Alladan qoldaý tapsyn», - dep halyqty kópten kútken qýanyshpen quttyqtady. 

Táýelsizdik alǵan jyldary Qyzylorda oblysynda 23 ǵana meshit bolsa, qazirgi tańda olardyń sany 155-ke jetti. Bul aımaqtaǵy áleýmettik-ekonomıkalyq damýymen qatar rýhanı qundylyqtarymyzdyń da jandanǵanyn bildirse kerek. 

Al aýdan boıynsha 24 meshit halyq ıgiligi úshin jumys jasaıdy. Sonyń negizinde dinı saýaty bar azamattar sany artyp keledi. Jastar ıslam dinine den qoıyp, ımandylyq pen adamgershilik qasıetterdi boılaryna sińirýde. Ótken aıdyń ózinde eki aýylda (Q.Pirimov, Aqtan batyr aýyldary) jańa meshit paıdalanýǵa berildi. Búgin olardyń qatary taǵy bir meshitke kóbeıdi.

Meshitke aty berilgen Ramberdi ıshan Buhara, Samarqanda dinı oqý oryndarynan dáris alǵan emshi ári áýlıe kisi bolǵan. 1896 jyly osy Birlik aýylyna kelip, alǵash ret Allanyń jerdegi úıi - meshitti salyp, halyqty ımandylyqqa shaqyrǵan. Al keıin 1998 jyly azamattardyń qoldaýymen azyq-túlik dúkeni meshit ǵımaratyna berilip, «Ramberdi ıshan» meshitin ashylǵan bolatyn. Odan beri 20 jylǵa jýyq ýaqyt ótip, máslıhat depýtaty, kásipker Bekqalı Bekbaýylov meshit qurylysyn júrgizýdi qolǵa alǵan. Aýyl turǵyndary jomart janǵa alǵys bildirip, syı-qurmet kórsetti. 
Munan soń jurtshylyq arnaıy astan dám tatyp tarqasty. Ónerpazdar jyrdan shashý shashsa, jastar túrli sporttan jarysqa tústi.

Derekkóz. Qazaqparat