ASTANA. QazAqparat - Qazaq handyǵynyń 550 jyldyǵyna oraı Shymkentte «Saq» kınostýdıasy múltfılm túsirýde.
Budan buryn habarlaǵanymyzdaı "Qazaq eli" atty tolyqmetrajdy týyndyda eldiń tarıhy, Kereı men Jánibektiń balalyq shaǵy, ondaǵy handardyń bılik qurǵan dáýiri kórinis tappaq.

Baraq hannyń beınesin, onyń hanǵa tán qyraǵylyǵy men tulǵasyn, eli úshin etken eńbegin anımator Janádil Baıdarbekov sýrettep jatyr. Mamannyń sózine sensek, alyp keıipkerdiń árbir sekýndyq qımylyn jasaý úshin keminde 25 sýret salynady. 

«Hannyń árbir qımylyn qaǵazǵa, kompúterde salmas buryn onyń  obrazyna enemiz, sonyń qylyqtaryn jasap kóremiz. Róldi ózimiz oınap shyǵamyz. Akter bolyp, sony jasaı otyryp, keıipkerge jan bitiremiz», - deıdi anımator Janádil Baıdarbekov.

Týyndynyń rejıseri Batyrhan Dáýrenbekovtiń aıtýynsha, oqıǵalar kópshilikke jańa júıe boıynsha usynylady.

«Múltfılmde biz tabıǵattyń kórinisin 3D formaty arqyly kórsetip, qolmen salynǵan sýretpen qosyp, qoldanyp jatyrmyz. Mundaı jańalyq Qazaqstanda áli kúnge bolmaǵan. Reseıde de qoldanylmaǵan. Biraq biz qazir osyny qoldan kelgenshe kásibı túrde jasap jatyrmyz», deıdi rejıser.

«Qazaq eli» tolyqmetrajdy mýltıhıkaıasynyń daıyndalýy osydan 9 aı buryn bastalǵan. Ol úshin búginde 50-den astam maman kúndiz-túni aýysymmen «Saq» kınostýdıasynda qyzmet etýde.

Aıta óteıik, 1 saǵattyq mýlthıkıkaıa jasaý jumystary jeltoqsan aıynda aıaqtalyp, táýelsizdik kúninde tusaýy kesiledi dep kútilýde. Odan soń «Qazaq eli» tolyqmetrajdy týyndysy halyqaralyq baıqaýǵa usynylady, dep habarlaıdy otyrar.kz.

Eske salaıyq, fılmge arnaıy jazylǵan «Qaraqshylar» ánin Nurlan Abdýllın, Sáken Maıǵazıev (MýzArt toby) syndy kásibı ánshilermen qatar Nurjan Tólendıev («Aldaraspan» teatry), Berik Tursynbekovteı («Shymkent-shoý» teatry) elge ázilimen tanylǵan azamattar oryndaıdy. 

"Qamshy"silteıdi

Derekkóz: QazAqparat