QYZYLORDA. QazAqparat - 25 myńnan astam xalqy bar Jańaqorǵan aýdany kógildir otynǵa qol jetkizdi. Bul týraly oblystyq ákimdiktiń baspasóz qyzmeti habarlady.
Qazaqstanda alǵash ret bir aı ishinde oblystyń birden bes aýdany gazben qamtamasyz etiledi. Qyzylorda oblysynyń ákimi Qyrymbek Kósherbaev jáne «QazTransGaz Aımaq» AQ-nyń bas dırektory Ibýlla Serdıev Jańaqorǵan aýdanynda gaz berý sátine kýá bolyp, kóptiń qýanyshymen bólisti.
Aıta keteıik, Qyzylorda oblysy ákimdigi men "QazTransGaz" AQ arasynda byltyr jasalǵan memorandýmǵa sáıkes, Jańaqorǵan, Shıeli, Qazaly jáne Aral aýdandary men Baıqońyr qalasyn gazdandyrýǵa qajetti qarajat bólingen. Al, oblystyń qalǵan aýdandary kelesi jyly gazben qamtylatyn bolady. Ol jumystarǵa qajetti 16 mlrd. teńgeni Eýropalyq Qaıta Qurý jáne Damý Banki ınvestısıalaıtyn bolady.
- Biz óte qýanyshtymyz. Pesh jaǵyp, kúl shyǵarý mashaqatynan qutyldyq. Biz úshin arman bolǵan kógildir otyn úıimizge jetti. Budan artyq qandaı mereke kerek, - deıdi 5 balanyń anasy jańaqorǵandyq Gaýhar Bekmyrzaeva.
Oblys ákimi Qyrymbek Kósherbaev aýdanǵa arnaıy baryp, turǵyndarynyń qýanyshymen bólisti.
- Elbasy eldi mekenderdi kógildir otynmen qamtamasyz etýge basty nazar aýdarýdy tapsyrǵan. Bul sonyń jemisi. Jalpy alǵanda, oblysta áleýmettik máseleler tıimdi sheshilip keledi: «Beıneý-Bozoı-SHymkent» magıstraldi gaz qubyry jáne «Batys Eýropa-Batys Qytaı» halyqaralyq tas joly salyndy. Endi gazdy aýdan ortalyqtaryna jetkizetin qubyrlary salynyp bitti. Endi jańaqorǵandyqtar úshin sheshemin tappaǵan kúrmeýi qıyn másele aýyz sý bolatyn. Sý qubyrlaryn salý jobasy 2016-2018 jyldary josparlanǵanymen, biz jumysty bıyl bastaı berýge sheshim qabyldap, jaqynda alǵashqy 200 mln. teńgeni bóletin boldyq. Endi jaqyn arada jumys bastalady. Osylaısha, ret-retimen halyqtyń tirshiligi úshin qajetti máselelerdi sheshe beremiz, - dedi oblys ákimi.
- Bizdiń jobamyzdyń basty ereksheligi - oblysqa otandyq gaz júrgiziletin bolady, ıaǵnı gaz toqtaýsyz beriledi. Halyqtyń áleýmettik az qamtylǵan toptaryna jeńildikter qarastyrylǵan. Turǵyndardyń jaǵdaıyna qaraı otyryp, paıyzy tómen nesıeler arqyly birtindep tóleý múmkindigin de qarastyrdyq. Sonymen qatar, tamyz ben qazan aralyǵynda pesh jáne esepteýish quraldaryn satyp alýshylarǵa 45 paıyzdyq jeńildik beriledi, - dedi «QazTransGaz Aımaq» AQ-nyń bas dırektory Ibýlla Serdıev.
Jańaqorǵandyqtardyń qýanyshynda shek joq. Talaı jylǵy armandary oryndalǵan aýdan turǵyndarynyń atynan ardagerler keńesiniń tóraǵasy Zınabdın Shermaǵanbet quttyqtaý sóz sóılep, Elbasyna Syr jurtshylyǵynyń atynan alǵysyn joldady.
Aıta ketý kerek, kelesi aptada Shıeli aýdanyn gazdandyrý bastalady, odan keıingi kezekte - Qazaly jáne Aral aýdandary bar.
Derekkóz. Qazaqparat
