ASTANA. QazAqparat - Taraz memlekettik pedagogıkalyq ınstıtýtynda «Qazaq handyǵy» ensıklopedıasynyń tusaýkeser rásimi ótti.
Qazaq handyǵynyń 550 jyldyq mereıtoıyna oraı ótken jıynǵa QR Parlamenti Senatynyń depýtattary, joǵary oqý oryndary rektorlary men tarıhshylar qatysty, dep habarlady bilim ordasynyń baspasóz qyzmetinen.
Jıyndy TarMPI rektory Darıa Qojamjarova ashty. Ol óz sózinde tarıhtyń eń mańyzdy qundylyq ekenin, Elbasymyz qoldaý bildirgen «Mádenı mura», «Halyq tarıh tolqynynda» baǵdarlamalary aıasynda ultymyzdyń uly tarıhyn tanýǵa keń jol ashylǵanyn, Qazaq handyǵynyń qurylý, qalyptasý tarıhyna arnalǵan osynaý súbeli eńbektiń mazmuny óte joǵary ekenine toqtaldy.
Ensıklopedıa Elbasynyń «Ata tarıh amanaty - túrki dúnıesiniń birligi» atty sózimen bastalǵan. Jambyl oblsynyń ákimi Kárim Kókirekbaevtyń maqalasy da kitaptyń mazmunyn baıytyp tur. Ǵylymı eńbek TarMPI janyndaǵy Júsip Balasaǵun atyndaǵy Túrkistan ólkesiniń tarıhyn zertteý ortalyǵynda daıyndalǵan. Ensıklopedıada Qazaq handyǵyna qatysty ǵylymı zertteýlerdiń nátıjeleri barynsha molynan engizilgen. Qazaq handyǵynyń tarıhynda ózindik iz qaldyrǵan handar, sultandar, bıler, batyrlar, aqyndar men jyraýlar jáne ózge tulǵalar men tarıhı oqıǵalardy jan-jaqty qamtyǵan 360-qa jýyq maqala, 300-den astam sýretter men kartalar berilgen. Sonymen qatar, Qazaq handyǵy tarıhyn zertteýge eleýli úles qosqan ǵalymdar jaıly málimetter de bar. Ensıklopedıalyq basylymdy daıarlaý týraly ıdeıanyń avtory - Jambyl oblysynyń ákimi Kárim Kókirekbaev, Bas redaktory - QR UǴA korespondent múshesi, tarıh ǵylymdarynyń doktory, profesor, Taraz memlekettik pedagogıkalyq ınstıtýtynyń rektory Darıa Qojamjarova.
Ǵylymı eńbektiń lentasyn Memleket tarıhy ınstıtýtynyń dırektory Búrkit Aıaǵan men Shoqan Ýálıhanov atyndaǵy Tarıh jáne etnologıa ınstıtýtynyń dırektory Hangeldi Ábjanov saltanatty jaǵdaıda kesti. Sonymen qatar, jıyn barysynda tarıh ǵylymdarynyń doktory, QR UǴA korespondent-múshesi, profesor Darıa Qojamjarovanyń «Qazaq handyǵy» atty monografıalyq eńbegi de oqyrmandarǵa jol tartty. Munan bólek, shara aıasynda TarMPI janyndaǵy Júsip Balasaǵun atyndaǵy Túrkistan ólkesiniń tarıhyn zertteý ortalyǵynda jaryq kórgen birqatar kitaptardyń tanystyrylymy ótti.
Derekkóz: QazAqparat
