ASTANA. QazAqparat - Qazaqstan Prezıdenti Nursultan Nazarbaev Almaty qalasynyń ákimi Baýyrjan Baıbekti qabyldady. Kezdesý barysynda B.Baıbek qalany áleýmettik-ekonomıkalyq turǵydan damytý jumystary jóninde baıandady.
Bul týraly Aqordanyń baspasóz qyzmetinen habarlady.

Atap aıtqanda, negizgi azyq-túlik baǵasynyń ósýine jol bermeý, tıimdi oqý úderisin uıymdastyrýǵa jaǵdaı jasaý, jylý berý maýsymyna daıyndyq jónindegi sharalar qabyldanýda.

B.Baıbek jalpy somasy 10 mıllıard teńge bolatyn memorandýmǵa qol qoıylǵanyn, soǵan sáıkes Almaty kásiporyndary óz ónimderin «EKSPO-2017» kórmesi nysandarynyń qurylysyna jetkizip otyratynyn aıtty. Mundaı qadam aldaǵy Ýnıversıada nysandaryna da baılanysty josparlanyp otyrǵany atap ótildi.

Sonymen qatar Almaty ákimi bıylǵy shildede bolǵan kóshkin zardabyn joıý jumystary týraly da aıtty. Máselen, tıisti ótemaqylyq tólemder jasalyp, aýmaqtardy tazartý jumystary júrgizildi, Qarǵaly ózeniniń saǵasyn bekitý jóninde sharalar qabyldandy.

B.Baıbek «Nur Otan» partıasynyń jemqorlyqqa qarsy is-qımyl baǵdarlamasy aıasynda taıaý ýaqytta qala mektepteri men aýrýhanalarynyń qarjylyq esepterin jarıalaý tájirıbesin engizý qarastyrylyp otyrǵanyn habarlady.

Almaty ákimi halyqpen keri baılanystyń jolǵa qoıylǵanyn aıtyp, sondaı-aq qalanyń áleýmettik-ekonomıkalyq kórsetkishterin odan ári jaqsartýdy qamtamasyz etýge baǵyttalǵan is-qımyldar jóninde, sonyń ishinde Qalanyń 2020 jylǵa deıin damytý strategıasyn ázirleý isiniń bastalǵany týraly baıan etti.

Memleket basshysy kezdesý qorytyndysy boıynsha birqatar naqty tapsyrma berdi. 

Derekkóz: QazAqparat