Erkin Islámuly Sherıazdanov Marqakól aýdanynyń týmasy. 1974 jyly Boran aýylyndaǵy ataqty ustaz Qumash Nurǵalıev atyndaǵy orta mektepti bitirgen soń Semeı medısına ınstıtýtynyń emdeý isi fakúltetine oqýǵa túsip, ony 1980 jyly bitirgen soń joldamamen Rıdder qalasyna qyzmetke keledi. Al 1981 jyldan 1997 jylǵa deıin Samar aýylyndaǵy aýrýhanada hırýrg, bólimshe meńgerýshisi qyzmetin atqarady.
Qaladaǵy 60 jyldyq tarıhy bar jalǵyz jedel járdem aýrýhanasyna jabylý qaýpi týdy
Samar aýdandyq aýrýhanasynda qyzmet etken jyldar izdenis, ósý men tájirıbeniń qalyptasýyn qamtamasyz etti deýge negiz bar. Sol kezde tájirıbeli hırýrgter Amanjol Júnisov, Saılaýhan Kúderbaev, Amangeldi Qaısanov sıaqty aǵalary jas mamanǵa bilgenderin úıretýden jalyqpady. Hırýrg – kúr­deli mamandyq, túrli ishki jaraqattar men aýyr jaralanǵandarǵa ota jasaý úshin qaıtpas qaısarlyq pen batyldyq, erjúrek bolý qajet dep aqylyn aıtatyn aǵalary. Bilikti de bilimdi aǵalarynyń aqyly, nebir aýyr ota jasaǵan kezde tapqyrlyq pen qıynnan qıystyratyn ádis-tásilderi Erkin Islámulynyń ómirlik kredosyna aınaldy desek, artyq aıtqandyq emes.
Aýdandyq aýrýhanada qyzmet etken jyldary Erkin Islámuly shalǵaıdaǵy aýyldarǵa, shopandar mekendep jatqan jaılaýǵa jıi shyǵyp, olarǵa jedel kómek kórsetetin. Birde Kókjota aýylynda mektepte oqıtyn bala qatty naýqastanyp qaldy degen habardy estisimen jolǵa shyǵady. Shynynda da, balanyń naýqasy aýyr eken, jedel ota jasalmasa soqyrishegi jarylyp ketýi múmkin. Ony Samardaǵy aýrýhanaǵa tez jetkizip, ota jasaǵan soń naýqas táýir boldy. Al aýdanda qyzmet etken 16 jylda Erkin Sherıazdanov myńnan astam adamdy shıpaly qolymen emdedi.
1997 jyly bilikti hırýrgti Óskemendegi jedel járdem aýrýhanasynyń ekinshi hırýrgıa bólimshesine qyzmetke shaqyrady. Mine, sońǵy 18 jyldan beri E.Sherıazdanov bir orynda jemisti qyzmet etip keledi. Ol sońǵy tórt jyl boıy birinshi bólimsheniń meńgerýshisi. Bólimshede 14 tósek bar, syrqattarǵa tórt hırýrg qyzmet kórsetedi. Jas bolsa da tájirıbe jınaqtaǵan Qýanysh Sydyqov, Birjan Temirshınov, Damır Shalbaev kúrdeli otalardy batyl jasap júr. Ekinshi qalalyq aýrýhananyń qoly shıpaly jandary, 33 jyldyq eńbek ótili bar, qabyldaý bólimshesiniń meńgerýshisi Baqyt Ogýzbaeva, 45 jyldan astam hırýrg bolyp abyroımen qyzmet etken, qazir de ota jasaıtyn, óziniń mol tájirıbesin jastarǵa talmaı úıretip kele jatqan Toqtarbek Ábilmájinov ujymnyń maqtanyshy. Murat Beısenov qoly shıpaly, 35 jylda myńdaǵan adamdy ajaldan arashalaǵan azamat.
– Óndirisi órkendegen Óskemende zamanaýı talapqa saı aýrýhana qajet ekeni belgili. Qaladaǵy jalǵyz jedel járdem kórsetetin aýrýhananyń 60 jyldyq tarıhy bar. Ókinishke qaraı, ol 2012 jyly bul mártebeden aıyrylyp, qazir ekinshi qalalyq aýrýhana dep atalyp ketti. Endi ekologıasy kúrdeli qalada syrqattarǵa jedel járdem kórsetetin mekeme jabylyp, birinshi qalalyq aýrýhanamen biriktirilgeli jatyr. Sonda osynda qyzmet etetin 400-ge jýyq adam qaıda ketedi? Barlyǵyna qyzmet tabylady degenge sený qıyn, kóp maman jumyssyz qala ma degen qaýip bar. Bizdińshe, qorshaǵan ortasy búlingen, asa kúrdeli aımaqta jedel járdem kórsetetin aýrýhana aýadaı qajet. Oblys, qala basshylary bizge túsinistikpen qaraıdy degen úmittemiz, – deıdi Erkin Islámuly.
Kún saıyn derlik jedel járdem kórsetetin aýrýhanaǵa ondaǵan adam túsip jatady. Sebebi, durys tamaqtanbaý, aýyzsýdy durys paıdalanbaý saldarynan ót jolynyń qabynýy, ishek syrqattary kóbeıip ketti. Onyń ústine sońǵy kezde kólik oqıǵalary, júrgizýshilerdiń adamdardy qaǵyp, qashyp ketýi kóbeıip ketti. Bir ǵana mysal.
9 qazanda D.Orazbaeva degen jap-jas qyzdy Sátbaev kóshesindegi arnaıy jolaq belgisi bar jerden óter tusta belgisiz kólik ıesi qaǵyp, kómek kórsetýdiń ornyna qashyp ketken. Qazir qylmysker izdestirilýde. Túnniń bir mezgilinde Erkin Sherıazdanov ish qurylysyna aýyr zaqym kelgen oǵan ota jasap, aman alyp qaldy. İle-shala toqishegi bitelip, aýyr halde jetkizilgen Iý.Sorokın, shaby jarylǵan S.Shelágınge sátti ota jasaldy. «Keıde bir kúnde bes-alty adamǵa ota jasaýǵa týra keledi, úıge barýdy umytyp ketemiz», – degen hırýrgtiń sózinen túıgenimiz, tańdy tańǵa uryp, ýaqytpen sanas­paı syrqattardy aman alyp qalýǵa jan-tánimen qyzmet etetin hırýrg mamandyǵynyń asa kúrdeli, jaýapty ekenin eriksiz túsinemiz.
Bul kúnderi ekinshi qalalyq aýrýhanada óz isiniń bilgiri 18 hırýrg qyzmet etedi. Olar da erteńimiz ne bolady dep alańdaýly. Qabyldaý bólimshesiniń meńgerýshisi Baqyt Ógizbaevamen tildeskenimizde:
– 9 aıda qabyldaý bólimine jany qysylǵan 13 myń adam keldi. Onyń ishinde 9 myńnan astamyna hırýrgıalyq jáne aýyr jaraqattyń aldyn alý kómegi kórsetildi. 5 myń adam aýrýhanaǵa jatqyzyldy. Kóp rette jedel járdemmen basqa aýrýhanalarǵa jetkizilgen syrqattardy bizge jiberip jatady. Sebebi, bizge túskenderge jedel ota jasalyp nemese tereńdetip em-dom jasaıdy. Eger aýrýhana jabylsa syrqattarǵa jedel járdem kómeginiń ózegine ot túsedi, demek, bizdiń aıqaıymyz bos bolmasa kerek, – dedi 40 jyl boıy densaýlyq salasynda jemisti qyzmet etip kele jatqan hırýrg.
Adam janynyń arashashysy, beıbit zamanda shıpaly qoldarymen myńdaǵan adamdy emdep, olardyń ystyq yqylasyna bólengen Erkin Islámuly, basqa da aq jeleńdi abzal jandarǵa alǵystan basqa aıtarymyz joq.

Derekkóz: Egemen Qazaqstan