Almatyda eki márte Keńes Odaǵynyń Batyry, avıasıa general-maıory Talǵat Bıgeldınovke memorıal taqta ashyldy
Saltanatqa elimizdiń ár buryshynan kelgen qoǵamdyq uıymdar men ǵylym jáne shyǵarmashylyq qyzmettegi ıntellıgensıa ókilderi, maıdangerler, Talǵat aǵanyń týǵan-týystary qatysty.
Jıynda sóz alǵan qala ákimi Baýyrjan Baıbek áskerı ushqyshtyń ómiriniń sońǵy on jylynda turǵan úıdiń qabyrǵasyna orna­lastyrylǵan memorıaldyń shymyldyǵyn óz qolymen túsirip, sóz sóıledi.
– Elbasymyz Nursultan Nazarbaev ótkeni­mizdi saralap, tarıhymyzdy taldap tıisti baǵa berý – búgingi urpaqtyń qasıetti boryshy dep árdaıym atap kórsetip keledi. Búgingi Talǵat Bıgeldınov aǵamyzǵa arnalyp ashylǵan memorıaldy taqta halyq batyrynyń óshpes erligine jasalynǵan zor qurmet, qasıetti rýhyna jasalǵan taǵzym dep uǵýymyz kerek, – dedi qala ákimi. Odan ári Baýyrjan Baıbek qazaq qyrany Talǵat Bıgeldınovtiń surapyl soǵys jyldaryndaǵy jaýyngerlik erlik isterine toqtaldy.
Dańqty qazaq ushqyshynyń kózsiz erligi ekinshi dúnıejúzilik soǵystyń tarıhyna altyn áriptermen jazyldy. Aıryqsha baǵa­landy. Qan maıdannyń eń qyzǵan shaǵy – 1943 jylǵa deıin «Il-2» shtýrmovıgimen jaý shebine 20 ret kirip, jerge aman oralǵan árbir ushqyshqa Keńes Odaǵynyń Batyry ataǵy berilgen. Óıtkeni, áýeden ajal oǵyn sebetin keńestik «Il» ushaǵy aýyrlyǵymen ári manevrge qolaısyzdyǵymen «kózge túsken». Bul shtýrmovıkterdi «ushatyn tank» dep beker atamaǵan. Talǵat Bıgeldınov sol «áýe kemesimen» jaý shebine 305 (!) ret kókteı kirip, atoı salǵan. Tarıhtan biletinimiz, soǵys kezinde áýege 20 ret kóterilip, aman oralǵan shtýrmovık-ushqyshtar batyrlyqty bylaı qoıyp, tipti, basynyń aman qalǵandyǵyn ózine baqyt sanaǵan. Bálkim, sodan da bolar, onsyz da úreı qushaǵynda júrgender búıirinde «13» sıfry jazylǵan mundaı ushaqqa eskadrılıa boıynsha onsha úıirsek bola qoımaǵan eken. Al bizdiń jaýjúrek aǵamyz sol «ushaqpen-aq» óz esimin máńgilikke tarıh betine óshpesteı etip jazyp ketti.
taqta Talgat Bıgeldınov (3)3 (1)Saltanatty shara barysynda batyrdyń rýhyna taǵzym etýshiler eskertkish taqtaǵa gúl shoqtaryn qoıdy. Jınalǵandarmen oı bólisti.
Kım Serikbaev, áskerı ǵalym, polkovnık: Talǵat aǵamyz ómirde qarapaıymdylyqty qatty qadirlegen azamat. Alaıda, ádiletsizdikke tózbes edi. Mektepke Baýkeńniń atyn berýdegi qoldan jasalǵan qıyndyqtarǵa tap kelgen sátte men Bıgeldınov aǵama júgingen edim. Ol kisi sol kúni menimen birge mektep ta­bal­­­dyryǵyn attap, oqý ornyna maıdandas dosynyń ataǵyn alyp berip edi.
Toqtar Áýbákirov, tuńǵysh qazaq ǵaryshkeri, avıasıa general-maıory: Bizdiń býyn ókilderi aty ańyzǵa aınalǵan batyrdyń dańqy men rýhynan kúsh alyp, ushaqqa otyr­dyq. Dańqty qazaq qyranynyń izin basatyn jastarymyzdyń qatary elimizde jyl saıyn ósip keletini kóńildi marqaıtady. Olardyń barlyǵy da ushaqqa alǵash otyrǵanda eki márte Keńes Odaǵynyń Batyry, jaýjúrek maıdanger-ushqysh Talǵat Bıgeldınov atasyn eske alary daýsyz. Óıtkeni – batyrdyń aty ólmeıdi.
Aıagúl Mırazova, Qazaqstannyń Eńbek Eri, Ybyraı Altynsarın atyndaǵy №159 mektep-gımnazıanyń dırektory: eki márte Keńes Odaǵynyń Batyry Talǵat Bıgeldınov aǵamyzdyń soǵystaǵy erligi búgingi urpaq úshin tarıh sabaǵy ispetti dep oılaımyn. Árbir jas býyn ókiliniń batyr turǵan osynaý úıdiń janynan ótip bara jatyp, búgingi qoıylǵan myna eskertkish taqtaǵa kóz toqtatary sózsiz. Urpaq jalǵastyǵy degen osy. Men muny barymyzdy baǵalaý, batyrlarymyzdy qurmetteý dep uǵynamyn. Nebári 21 jasynda birinshi, 22 jasynda ekinshi márte Keńes Odaǵynyń Batyry atanǵan aǵamyzdyń erligine qalaısha bas ımeısiń! Eki ǵasyrdyń qaharmany atanǵan batyr aǵamyzǵa búgin laıyqty qurmet kórsetildi.
Ekinshi dúnıejúzilik soǵysta qazaq hal­qynyń ataǵyn shyǵaryp, dańqyn aspandatqan Talǵat Jaqypbekuly Bıgeldınov aǵamyzdyń erlik isteri búgingi urpaqtyń jadynda máńgige saqtalady. Batyrdyń rýhyna taǵzym etip kelgen kópshiliktiń júzinen rıasyz sol iltıpat menmundalap turdy. Halyq batyrdyń – qaharman ushqyshtyń rýhyna qurmet kórsetti.

Derekkóz: Egemen Qazaqstan