ASTANA. 11 qarasha. Elordadaǵy memlekettik qyzmet salasyndaǵy óńirlik hab, Ekonomıkalyq yntymaqtastyq jáne damý uıymy (EYDU), sondaı-aq elimizdiń Ulttyq ekonomıka mınıstrligi birlese otyryp, Nazarbaev ýnıversıtettiń Joǵary memlekettik saıasat mektebi jáne BUU Damý baǵdarlamasynyń qoldaýymen «Memlekettik qyzmettiń derbestigi» taqyrybynda semınar ótkizdi. Bul týraly egemen.kz tilshisi habarlady.
Bes ınstıtýsıonaldy reformany iske asyrýǵa baǵyttalǵan 100 naqty qadam Ult josparyn, atap aıtqanda, zamanaýı, kásibı jáne avtonomdy memlekettik apparatty qalyptastyrýdy iske asyrý jáne Elbasynyń Qazaqstanda barlyq salada EYDU qaǵıdalary men standarttaryn engizý týraly tapsyrmasy aıasynda ótkizilgen semınarǵa elimizdiń memlekettik organdarynyń jaýapty hatshylary men oblys ákimdikteriniń apparat basshylary qatysty.
Semınardyń maqsaty – avtonomdy memlekettik apparatty qalyptastyrý boıynsha EYDU elderiniń, naqtyraq aıtqanda, saıası jáne ákimshilik memlekettik qyzmetshiler arasynda ýákilettilikterdi ajyratý tájirıbesin zerdeleý, sondaı-aq avtonomdy ákimshilik memlekettik apparatty qalyptastyrý boıynsha EYDU-ǵa múshe elder men Qazaqstannyń osy saladaǵy tájirıbesin talqylaý.
Semınardy asha otyryp, Astanadaǵy memlekettik qyzmet salasyndaǵy óńirlik hab basqarýshy komıtetiniń tóraǵasy Alıhan Baımenov, BUU Damý baǵdarlamasynyń Qazaqstandaǵy turaqty ókiliniń orynbasary Mýnhtýıa Altangerel, EYDU Memlekettik sektordy reformalaý basqarmasynyń basshysy Edvın Laý jáne Nazarbaev ýnıversıttiń prezıdenti Shıgoe Katsý semınar taqyrybynyń mańyzdylyǵy men ózektiligin atap ótti.
Ekonomıkalyq yntymaqtastyq jáne damý uıymyna múshe elderden spıkerler retinde memlekettik qyzmetti reformalaýda asa tájirıbeli sarapshylar sóz sóıledi. Atap aıtqanda, Kanada basqarý ınstıtýtynyń prezıdenti, 20 jyldan astam tájirıbesi bar joǵary memlekettik qyzmetshi Marıantonett Flúmen Kanadanyń memlekettik apparat áleýetin joǵarylatý, saıası jáne joǵary ákimshilik korpýsy arasyndaǵy ýákilettilikterdi ajyratý týraly tájirıbesimen bólisti.
Sonymen qatar, Nıderlandy joǵary memlekettik qyzmetiniń burynǵy bas dırektory Ian Vıllem Vek óz elindegi joǵary memlekettik qyzmetiniń jetistikteri men máseleleri jaıynda óz oıyn ortaǵa saldy. Al Chılıdiń joǵary ákimshilik memlekettik qyzmetiniń tehnıkalyq hatshysy, Chılı Senaty zań shyǵarýshy keńesiniń burynǵy múshesi Marıana Djorjd-Nasımento elindegi basqarýshy memlekettik korpýsty qalyptastyrý úrdisi jáne memlekettik qyzmet júıesindegi saıası-ákimshilik tepe-teńdikti qamtamasyz etý tájirıbesi týraly prezentasıa jasady.
EYDU Memlekettik sektordy reformalaý basqarmasynyń basshysy Edvın Laý, sondaı-aq EYDU joba menedjeri Danıel Gerson derbes memlekettik apparatty qurýdaǵy EYDU elderiniń tájirıbelerimen bólisti.

Derekkóz: Egemen Qazaqstan