Astanadaǵy Qazaqstan Prezıdenti janyndaǵy Memlekettik basqarý akademıasynda Qazaqstan halqy Assambleıasy ǵylymı-sarapshylyq keńesiniń keńeıtilgen otyrysy ótti.
Otyrysty ashqan QHA Tóraǵasynyń orynbasary Eraly Toǵjanov bıylǵy jyl Qazaqstan halqy Assambleıasynyń jyly bolyp jarıalanǵanyn, sol sebepti 2015 jyldyń mańyzy zor ekenin jetkizdi. «Bul jyl saıası turǵydan da, tarıhı-ǵylymı turǵydan da mán-maǵynasy erekshe jyl desem, artyq aıtqandyq emes. Qazaqstan halqy Assambleıasynyń jyly aıasynda úlken sharalar ótti. Bıylǵy jyl, sondaı-aq, Konstıtýsıanyń 20 jyldyǵyna, Qazaq handyǵynyń 550 jyldyǵyna, Jeńistiń 70 jyldyǵyna saı keldi. Al jalpy, bul sharalardyń barlyǵyna ǵylymı-sarapshylyq keńestiń músheleri atsalysty», – dedi ol.
Osylaı deı kele, E.Toǵjanov bıylǵy jyl Elbasynyń bes ınstıtýttyq reformasy aıasyndaǵy «100 naqty qadamnyń» júzege asyryla bastaýymen de mańyzdy ekenine toqtaldy. «Osy 5 reformanyń ishindegi 4-shi reforma – biregeılik pen birlik. Iaǵnı, 5 reformanyń beseýi de osy 4-shi reformasyz júzege asýy múmkin emestigin halyq jaqsy biledi dep oılaımyn», – dedi E. Toǵjanov bul týrasynda. Óz sózinde ol, sondaı-aq, bıylǵy jyly kóptegen saıası shara júzege asyrylǵanyn, olarǵa «Meniń Qazaqstanym» arnaıy poıyzynyń ekspedısıasy men «Uly Dala eli» ekspedısıasyn, «Tarıhtan taǵylym – ótkenge taǵzym» halyqaralyq jobasyn qosýǵa bolatynyn atap ótti. «Al bulardyń qatarynda «Máńgilik El» jalpyulttyq ıdeıasynyń alar orny aıryqsha. Bul ıdeıanyń kóterilgenine biraz ýaqyt boldy. Ol qazir el arasynda, oblystarda talqylanýda. «Máńgilik El» ıdeıasynyń negizgi jobalarynyń biri Astanada ótken Patrıottar forýmynda qaraldy.
Al ondaǵy jergilikti jerlerden kelip túsken, sondaı-aq, osyndaǵy ǵalymdarymyz bergen usynystar tarazyǵa salynyp, erteńgi kún olar sizderdiń qaraýlaryńyzǵa usynylatyn bolady. Iaǵnı, bul ıdeıanyń ózegi Qazaqstanda turatyn azamattardyń bir-birine degen kóńil-nıeti bir úıdiń balasyndaı bolýy kerek degenge saıady. Sebebi, sondaı el ǵana úlken jetistikke jetýi múmkin», – dedi E.Toǵjanov. Buǵan qosa, QHA Tóraǵasynyń orynbasary Qytaıdyń Qazaqstannyń etnosaralyq kelisim baǵytyndaǵy tájirıbesine qyzyǵýshylyq tanytyp otyrǵanyn, buǵan jaqynda sol elge jasaǵan sapary dálel bolǵanyn, bul Qazaqstannyń «qoǵamdyq kelisim» ıdeıasynyń mańyzyn sózsiz arttyra túsetinin aıtty.
Jıyn barysynda Qazaqstan Prezıdenti janyndaǵy Memlekettik basqarý akademıa­synyń rektory Bolatbek Ábdirásilov te sóz alyp, atalǵan akademıa QHA-nyń ǵy­lymı-sarapshylyq keńesiniń negizgi bazasy sanalatynyn, akademıada 2011 jyly Elbasynyń tapsyrmasymen etnosaralyq jáne konfesıaaralyq qarym-qatynasty zertteıtin ortalyq ashylǵanyn jetkizdi. «Bıylǵy jyly Memlekettik basqarý akademıasy Shvesıanyń Ýpsala qalasyndaǵy joǵary oqý ornymen birlese, úlken halyqaralyq konferensıa ótkizdi. 20-dan astam memlekettiń ókilderi qatysqan konferensıa barysynda memleketimizdiń etnosaralyq kelisim úlgisine degen aıryqsha qyzyǵýshylyq baıqaldy. Jalpy, ózge elderdiń bizdiń elimizdiń qoǵamdyq kelisim baǵytynda qolǵa alǵan jumystaryn tanyp-bilýge, zerttep-zerdeleýge degen ynta-yqylasy erekshe», – dedi B. Ábdirásilov.
Jıyn aıasynda, sonymen qatar, QHA Medıasıa ınstıtýtyn qalyptastyrý men damytý boıynsha ózekti máseleler qaras­tyrylyp, qazaqstandyq biregeılik pen qoǵamdyq kelisimdi nyǵaıtý jolyndaǵy QHA kafedralary jumystarynyń negizgi baǵyt­tary talqylandy.
Shara sońynda QHA mereıtoıyna arnalǵan úzdik ǵylymı jumystardyń tusaýkeseri ótip, birqatar azamat «Qazaqstan halqy Assambleıasyna – 20 jyl» mereıtoılyq medalimen marapattaldy.

Derekkóz: egemen Qazaqstan