Shyǵys Qazaqstan memlekettik tehnıkalyq ýnıversıtetinde daıarlanady
D.Serikbaev atyndaǵy Shyǵys Qazaqstan memlekettik tehnıkalyq ýnıversıteti – avto­ónerkásip kásiporyndary úshin arnaıy mamandar ázirleýdi bastaǵan elimizdegi alǵashqy bilim oryndarynyń biri. 2003 jyly «AZIA AVTO» AQ kásipornynyń konveıeri iske qosylǵannan bastap SHQMTÝ qazaqstandyq tuńǵysh avtomobıl óndirisine qajetti mamandardy daıarlap keledi. 2011 jyly atalǵan ýnıversıtet pen zaýyt arasyndaǵy yntymaqtastyq jańa beleske kóterilip, kásiporynda ýnıversıtettiń «Kólik jáne logıstıka» kafedrasynyń fılıaly ashylǵan bolatyn.
Búginde aımaqtyń jetekshi tehnıkalyq joǵary oqý orny óziniń kóp jyldan bergi ǵylymı-óndiristik tájirıbe barysyndaǵy seriktesimen birlese jumys júrgizýdiń nátıjesinde ekijaqty tıimdi baılanystyń jańa satysyna aıaq basty. Endi joǵary oqý orny Óskemen qalasyndaǵy «AZIA AVTO Qazaqstan» AQ bazasynda salynyp jatqan iri mashına jasaý óndirisi úshin bilikti ınjener mamandaryn daıarlaıtyn bolady. Osy arqyly SHQMTÝ-diń profesorlary men oqytýshylary jáne magıstrlik baǵdarlamalardyń stýdentteri tolyq sıkldi avtomobıl zaýytynyń jáne avtobólshekter shyǵarý jónindegi tehnopark bólimderinde ǵylymı jáne kásibı tájirıbeden ótý múmkindigine ıe boldy. Bul jóninde D.Serikbaev atyndaǵy SHQMTÝ rektory Jasulan Shaımardanov pen «AZIA AVTO Qazaqstan» AQ prezıdenti Erjan Mandıev ózara yntymaqtastyq jónindegi kelisimge qol qoıý barysynda belgili boldy. Kelisim aıasynda birlesken ǵylymı-tájirıbelik jáne zertteý jumystary uıymdastyrylady dep kútilýde. Ýnıversıtet rektorynyń aıtýynsha, bul joba jas mamandar úshin jańa múmkindikterge jol ashady. Iaǵnı, stýdentter men oqytýshylar Qazaqstandaǵy jańa salanyń qalyptasýy men damýyna óz úlesterin qospaq. Sonymen birge, mamandyqtardyń otandyq reestri ýnıversıtettiń bilim berý baǵdarlamalarynyń tizimi sıaqty anaǵurlym keńeıedi. Al «AZIA AVTO Qazaqstan» AQ prezıdenti E.Mandıev kásiporyn bazasynda salynyp jatqan óndiris ornynda 12 myńǵa jýyq jumysshy-qyzmetkerler jumys isteıtinin, olardyń ishinde 1500 dıplomdy ınjenerler, qurastyrýshylar, avtomehanıkter, hımık-tehnologtar, logıstıka jáne aqparattyq tehnologıalar mamandary eńbek etetinin jetkizdi. Kásiporyn basshysy osy oraıda oqý ornymen birlese otyryp, jańa óndiriske qajetti bilikti mamandar toby daıyndalatynyn atap ótti. Qazir qurylysy qyzý júrgizilip jatqan óndiris kesheniniń jobalyq qýaty dánekerleý, kólik qorabyn boıaý jáne avtomobıl qurastyrý boıynsha jylyna 120 myń avtokólik shyǵarmaq. Óndiristiń birinshi kezegi 2017-2018 jyldary iske qosylady.
«AZIA AVTO Qazaqstan» AQ-tyń bul jobasy elimizdiń 2015-2019 jyldarǵa arnalǵan Údemeli ındýstrıalyq-ınnovasıalyq damý baǵdarlamasyna, ındýstrıalandyrý kartasyna jáne basqa da birqatar memlekettik baǵdarlamalarǵa engizilgenin de aıta ketken lázim.

"Qamshy" siltneıdi

Derekkóz: Egemen Qazaqstan