táýliktik qýattylyq úsh júz tonnaǵa deıin jetkizilip, 200 adamdy jumyspen qamtyp otyr

«Molprodýkt» JSHS óndiristik qýattylyǵy jaǵynan Ortalyq Azıa aýmaǵynda balamasy joq biregeı kásiporyn sanalady. Sehtardy jańa tehnologıalarmen jabdyqtaýdyń nátıjesinde sút ónimderi Qazaqstannan tysqary jerlerge de jiberiledi. Seriktestik dırektory Roza Súleımenovanyń aıtýynsha, buǵan deıin kúnine 20 tonna sút óńdelip kelse, qazirgi kórsetkish 300 tonnany quraıdy. Jumysshy-qyzmetkerdiń sany tórt esege deıin kóbeıip, 200-ge jetken. Tabys syry nede degen saýalymyzǵa ol bylaı jaýap berdi.

–Memleket tarapynan shaǵyn jáne orta bıznes sýbektilerine jasalyp jatqan qoldaýlarǵa súıene otyryp, baǵdarlamalarǵa qatysý múmkindigine ıe boldyq. Atap aıtqanda, «Bıznestiń jol kartasy-2020» boıynsha 3,5 mıllıard teńge jeńildetilgen nesıe alynyp, kásiporyn ǵımaratyn qalpyna keltirýge, zamanaýı qural-jabdyqtar men qondyrǵylar satyp alýǵa, avtoparkti jańartýǵa jumsaldy.

–Aınalasy úsh jyl bederinde qol jetken jetistikterińiz shynynda da atap ótýge turarlyq eken. İsti ýaqyt talabyna saı jańasha uıymdastyrý sapalyq kórsetkishterge, ónim túrleriniń kóbeıýine qanshalyqty yqpal etti?

–Elbasy Joldaýlarynda elimizde azyq-túlik qaýipsizdigin qamtamasyz etý mindeti qoıylǵany málim. Bizdiń túpki maqsatymyz básekelestik qarymyn kúsheıte otyryp, syrtqy naryqqa shyǵý bolǵandyqtan, bul jaǵyna aıryqsha mán beriledi. Basqa salalarmen salystyrǵanda, tamaq ónerkásibinde atqarylatyn jumystar óte kúrdeli. Onyń ishinde sút óńdeýmen aınalysý ońaı sharýa emes. Úzilissiz eńbek yrǵaǵyn turaqty qamtamasyz etý úshin, birinshiden, shıkizat qory jetkilikti bolýy kerek. Sút aýdandardan, eldi mekenderden jınalatyndyqtan, basy artyq shyǵyndarǵa barýǵa týra keledi. Ákelingen ónimniń qunarlylyǵy talapqa sáıkes kelip jatsa bir sári. Standart boıynsha aqýyz mólsheri keminde 3,0-3,1 bolýy tıis. Onyń deńgeıi 2,5-2,6 bola tura qabyldaýǵa májbúrmiz. Ekinshiden, tabıǵı sút tez búlinetindikten, jergilikti jerlerde qabyldaý qosyndaryn ashý, alys aýyldardan jetkizý úshin arnaıy tońazytqysh agregattary bar avtokólikter jetkilikti bolýy shart. Mashaqatynyń kóptigine qaramastan, ozyq tehnologıalardy keńinen engizýdiń arqasynda búginde sút ónimderiniń 30-ǵa jýyq túri shyǵarylady.

Biz kásiporyndy aralaý barysynda Fransıa, Golandıa, Shvesıa elderinen ákelingen qural-jabdyqtardyń túgeldeı avtomattandyrylǵan júıemen jumys isteıtinine kóz jetkizdik. Óndiristik sehtar oseptıkalyq tásilge kóshirilgeli ónimderdiń sapasymen qosa saqtalý ýaqyty da uzartylǵan. Jabyq ydystar men qutylarǵa quıylǵan shıkizatty óńdeý kezinde bakterıalar men ottegi soryp alynyp, kerisinshe, adam aǵzasyna qajetti mıkroelenmenttermen baıytylady. Tabıǵı qunarynan ajyramaǵan sút óńdelgennen keıin 40 kúnnen bir jylǵa deıin búlinbeıdi.

Búgingi tańda kásiporyn elimizdiń ár qıyrynan 18 saýda núktesin quryp, óz ónimderin satýmen aınalysady. Sapa kórsetkishi men saqtaý merzimin ulǵaıtýdyń nátıjesinde eksporttaý baǵytynda da tyń qadamdar keń óris alǵan. Bul jóninde basty áriptes– Reseı. Omby, Novosibir, Krasnodar, Ekaterınbýrg, Irkýtsk, Dondaǵy Rostov qalalarynan túsken suranystyń kóptigi eskerilip, taǵy bir ozyq joba engizilmek. Iaǵnı, daıyn ónimderdi býyp-túıýge arnalǵan qondyrǵyny ornatý arqyly tehnologıalyq úderister odan ári jedeldetilmek. Sonda táýliktik qýattylyq 500 tonnaǵa deıin ósip, 300 adam jumyspen qamtylatyn bolady.

Sehtaǵy operator mamandar Elbasynyń 2012 jyly osynda arnaıy kelip, jańa ǵımarattyń tusaýyn keskenin maqtanyshpen jetkizdi. Sodan beri ındýstrıalyq-ınnovasıalyq damý jolyna túsken kásiporyn otandyq ónimderdi serıalap shyǵarýdyń tájirıbesine ábden mashyqtanyp alǵan.

– Bolashaqta Belarýs, Mońǵolıa elderimen saýda-sattyqty damytýdy oılastyryp otyrmyz. Ǵımaratta bos oryndar bar. Olarǵa ıogýrt, qaımaq, balmuzdaq qospasyn shyǵaratyn jańa jeliler ornatylatyn bolady. Eń bastysy, bilimdi de bilikti, kásibı shyńdalǵan jastarǵa úlken senim artamyz. Jyl ótken saıyn olardyń qatary tolyǵyp keledi, – deıdi «Molprodýkt» JSHS-niń dırektory R. Súleımenova.

Derekkóz: Egemen Qazaqstan