Elimizde qabyldanǵan Jańa ındýs­trıa­landyrý baǵdarlamasy aıasynda aı­maqtarda agroónerkásip salasynda otan­dyq ónim­der­di óndirý jumystary óz nátıjesin berýde.
 Aıtalyq, Atyraý oblysynda eki jańa qus fabrıkasy iske qosylyp, búginde ob­lys turǵyndaryn jumyrtqamen tolyqtaı qamtamasyz etip otyr. Oblys kásipkerleri jergilikti halyqtyń suranysynan ar­tyl­ǵan jumyrtqany kórshiles oblys­tar­dyń naryǵyna shyǵarýda. 
Atyraý oblysy boıynsha alǵashqy bo­lyp agroónerkásip salasyn damytýǵa, Jańa ındýstrıalandyrý baǵdarlamasy jo­basyn júzege asyrýǵa táýekel etip otyr­ǵan aýdandardyń kásipkerleri. Búgin­de aýdan­dardaǵy eki qus fabrıkasy oblys turǵyn­darynyń jumyrtqaǵa degen sura­ny­syn qamtyp qana qoımaı, kórshiles ob­lystarǵa otandyq sapaly ónimdi usy­nyp otyr. 
Atyraý halqynyń jumyrtqa men qus etine degen suranysyn qamtamasyz etýdi alǵashqy bolyp qolǵa alǵan oblysqa bel­gili kásipker Álimjan Baljigitov boldy. Ózi basshylyq etip otyrǵan «Atyraý Saýda» JSHS arqyly Jylyoı aýdanynda 2012 jyldyń ekinshi jartysynda ındýs-trıalandyrý kartasy aıasynda aımaqtaǵy iri qus fabrıkasyn ashty. Jańa jobany júzege asyrý úshin kásipker Álimjan Qa­panuly «QazAgroQarjy» AQ-tan qosym­sha qarjy retinde 250 mıllıon teńge alyp, óz qarajatynan 392,5 mln teńge sal­ǵan. Mu­naı­ly óńirde alǵash ashylǵan iri qus fer­ma­sy búginde tolyq qýatyna jetti. Júz myń bas taýyq ósirip, jyldyq mejesinde 32 mln dana jumyrtqa óndirip otyrǵan qus fer­masy ótken jyly «Selo­lyq bıznes» nomı­na­sıasy boıynsha jeńim­paz atandy. «Atyraý Saýda» JSHS-nyń basshysy Álim­jan Baljigitovtiń aıtýynsha, jumyrtqa óndirýdegi alǵashqy ónim kólemi 9 mln dana jumyrtqa bolǵan. Ótken jyly 21 mln dana jumyrtqa alyn­sa, bıyl ónim eselenip otyr. «Atyraý Saýda» JSHS-nyń qus fab­rı­kasynan shyqqan jumyrtqa kate­go­rıa­syna saı arnaıy qorapqa salynyp, oblys ortaly­ǵyndaǵy jármeńkelerge, aýdan orta­ly­ǵyn­daǵy dúkenderge tasymal­danady. Baǵalary da qoljetimdi. Búginde 2142,4 keli taýyq eti jergilikti halyqqa sa­tylǵan. Budan ózge aımaqtaǵy iri qus fermasy ótken jyly «Mańǵystaý­Munaı­Gaz» AQ-pen kelisimshartqa otyryp, jyly­na osy mekemege 1 400 000 dana jumyrtqa jetkizý­ge ýaǵdalasqan. 
Al óńirdegi ekinshi qus eti men jumyrt­qasy jobasy boıynsha «Almaly qus» JSHS-nyń bıylǵy jyl basynan beri qustan alǵan ónimi arqyly oblysty jumyrtqamen tolyqtaı qamtamasyz etýde. Memlekettik «Údemeli ındýstrıalyq-ın­novasıalyq damý» baǵdarlamasy aıasynda 680 mıllıon teńgege baǵalanǵan joba «Aty­­raý» áleýmettik-kásipkerlik korpo­ra­sıasy» AQ pen «Jiger» sharýa qojalyǵy bastamasymen júzege asýda. Alǵashqyda qus fabrıkasyna Reseıden ákelingen 58 myń balapan arnaıy kútimge alynyp, jetildi. Aǵymdaǵy jyly sáýir aıynda «Almaly qus» fabrıkasynyń alǵashqy ónimderi oblys ortalyǵy men Mahambet aýdanynyń saýda sórelerine qoıyldy. Búginde oblys­taǵy eki qus fabrıkasy jylyna 100 mıl­lıon jumyrtqa óndiredi. Atyraý obly­syndaǵy suranys 80 mıllıon jumyrtqany qurasa, halyqtyń suranysy­nan artylǵan jumyrtqa kórshiles aımaqtardyń naryǵy­na shyǵaryldy.
Qus fabrıkasynyń atqarýshy dırek­tory Vıktor Pastyń aıtýynsha, qazirgi kúni qus fabrıkasynda táýligine 52 myń dana jumyrtqa óndiriledi. Fabrıka ónimi búginde oblys ortalyǵyndaǵy bazarlar men apta saıyn uıymdastyrylatyn aýyl sha­rýa­shylyǵy jármeńkelerinde jáne aýdan­nyń saýda oryndarynda satylymda. Jumyrt­qanyń ár danasy 15 teńgeden. Bul – syrttan keletin jumyrtqadan eki teńgege arzandaý jáne sapaly ári otandyq ónim. Halyq pen qus fabrıkasy arasynda deldal qyzmetin boldyrmaý maqsatynda «Jiger» sharýa qojalyǵy óz dúkenin ashý­dy jospar­laýda. Keshendi sharýashy­lyq aldaǵy ýaqyt­ta jylyna 10 myń tonna taýyq etin saýda oryndaryna jetkizýdi jos­parlap otyr. Jal­py, qus fabrıkalary tolyq ónim qýa­tyna jetýi úshin úsh nemese tórt kezeńdi jo­balaýdy júzege asyrady. Sonyń nátı­jesinde, fabrıka ónimi molaıa túsedi. 
Atyraý aımaǵy aýyl sharýashylyǵyna tyń serpin beretin qus sharýashylyǵy jo­ba­larynyń sátti bastaýy jergilikti kásip­kerlerdiń densaýlyqqa paıdaly bódene ósirýge nıet etýimen jalǵasyn tabýda. Qa­zirgi tańda Mahambet aýdanyn­da «Jumyrtqa jáne et óndirý baǵytyndaǵy   10 myńdaı bódene fermasy» jobasynyń qurylysy júrip jatyr. 
«Atyraý» áleýmettik-kásipkerlik kor­porasıasy» AQ osy jobaǵa 40 mln teńge qarjy bólse, ózge qarajat esebin «Atyraý-Bódene» JSHS ózi qarjylan­dyrady. Jobanyń jalpy quny – 90 mln teńge. Aǵym­da­ǵy jyly paıdalanýǵa berilýi jos­par­­lan­ǵan bódene fermasy jylyna 700 myń dana bódene jumyrtqasy men 2 tonna bódene etin óńdeıtin bolady. Jobany aǵymdaǵy jyl aıaǵyna deıin iske qosý josparlanýda. Saıyp kelgende, aımaqta jańa jobalardyń ashylýy jergilikti jerdegi jumyssyzdyqty boldyrmaýǵa sep­tigin tıgizýde. 
Aımaqta atqarylyp jatqan irgeli is­ter memlekettik baǵdarlamalardyń elimizdiń ekonomıkasyna ǵana emes, áleý­met­tik áleýetine qosar úlesimen erekshelenýde. Munaıly óńirdegi aýyl sharýashylyǵy salasyndaǵy tyń jobalardyń jergilikti kásipkerler tarapynan júzege asyrylýy, otandyq ónim óndirip qana qoımaı, ony eksportqa shyǵarýǵa jasalyp otyrǵan nyq qadam. Álemdik naryqtaǵy aýyrtpa­shylyqtarǵa qaramastan, taýar óndirýshi jergilikti kásipkerler birigip, otandyq óndiristi damytý arqyly, eksportqa shy­ǵarýdy kózdep otyrǵany elimizdiń DSU-nyń múshesi bolyp, básekege qabiletti bo­lýy­men tuspa-tus keldi. Bul elimizdi álem el­derine otandyq óndirýshi retinde keńi­nen tanytýǵa orasan múmkindik berip otyr.

Derekkóz: Aıqyn-aqparat