Aǵashtyń tamyry tereńge boılaǵan saıyn onyń bıikteı beretinin baıqaımyz. Bul qoǵamǵa da baılanysty damý. El bolyp, memleket bolyp álemge ózimizdiń ulttyq bolmysymyzdy tanytýda tereńnen tamyr alatyn tarıhymyzdyń orny  bólek.

Bıylǵy «Qazaq handyǵynyń 550 jyldyǵyna» arnalǵan  memlekettik  sharanyń el úshin mańyzy aıryqsha boldy. Ásirese, shetelden  kelgen qazaq  baýyrlarymyzdyń  tól tarıhymyzǵa degen qyzyǵýshylyqtary erekshe. Osy rette ál Farabı atyndaǵy QazUÝ-ń JOO deıingi bilim berý fakúlteti, JOO deıingi daıyndyq kafedrasynda oqyp jatqan  sheteldik jáne  dıaspora ókilderimen  qazaq handyǵynyń qurylýyn shırek ǵasyr boıy zerttegen aıtýly ǵalym-tarıhshy B.Káribaevpen mazmundy da qyzyqty  kezdesý bolyp ótti. Kezdesýdi uıymdastyrýshy kafedranyń tárbıe isi jónindegi jaýapty ádiskerler – S.Núsipbaeva, M.Ibragımova. Ǵalym óziniń zertteýindegi mańyzdy málimetterdi, jas urpaq bilýge tıisti eldik máselelerdi jetesine jetkize túsindirdi. Ásirese, B.Káribaev: «HÚ ǵ. qazaq handyǵynyń qurylýy Ortalyq  Azıadaǵy ulttyq sıpaty bar tarıhı proses boldy. Rýlyq, taıpalyq emes, ulttyq sıpat!» – dep atap kórsetti. Stýdent kezinen osy másele tóńireginde derekter jınap, úlken ǵylymǵa bet burýyna naqty qadamdy erte kezde bastaǵan. Qazaq tarıhynyń altyn tamyryn jıyrma bes jyldan asa ýaqyt tereńdeı  zerttegen  talantty ǵalymnyń eńbegi óz jemisin  berdi. Talaı uıqysyz túnderdi ótkizgen, talaı arhıvterdi aqtarǵan izdenisterdiń arqasynda  aýqymdy «Qazaq handyǵy» zertteý eńbegi el ıgiligine qyzmet etti. Avtor bul eńbegin qoltaańba jazyp Elbasyǵa jibergenin, Nursultan Ábishulynyń qolyna tıgende ol kisiniń asa úlken tebirenispen qabyldaǵanyn kómekshileri habarlap, alǵys bildirgenin tilge tıek etti. Bul eńbekti qazaq halqynyń asyl murasy retinde Pragadaǵy  murajaıǵa qoıylǵanyn, endi aldaǵy 2017 jyly bolatyn «EKSPO» kórmesine qoıylatynyn habarlady. 

Elbasy N.Á.Nazarbaevtyń qoldaýmyen «Qazaq handyǵynyń 550 jyldyǵyn» memlekettik deńgeıde atap ótýdegi istiń mańyzy halyq úshin erekshe. Kezdesý barysynda ǵalym osy sharanyń uıymdastyrýshy-keńesshisi retinde elimizde qanshama aýqymdy isterdiń atqarylǵanyn atap aıtyp berdi. Osy sharalardyń basynda ǵalymdar B.Káribaevtiń eńbegine súıenip, negizgi derekkóz  retinde basty nazarda ustandy.  Ǵylymı konferensıanyń ózi Astana men Almatyda  ǵylym-bilim ordalarynda 5 ret, Tarazda 5 ret, Qyzylordada 4 ret, Semeıde 2 ret, Aqtóbede 2 ret osyndaı konferensıalarda bolǵanyn, ondaǵy  qazaq tarıhynyń mańyzdy  máseleler týraly qyzyqty málimetterdi jastarǵa túsindirdi. Munyń syrtynda sporttyq jarystar (at jarysy, kókper, kúres, t.b.), aqyndar aıtysy, merekelik  konsertteri de osy maqsatta ótkendiginen habar berdi.

Bul – bıylǵy jyl el rýhanıatynyń asqaqtaǵan jyly bolǵanyn kórsetedi. Bul – qazaq halqynyń tórge shyqqany, halyqtyń mártebemizdiń  aspandaýy dep túsindik. Kezdesýge kelgen jastar kókeılerindegi suraqtaryn qoıdy, ǵalym ár suraqty  yntamen tyńdap, túsinikti ári muqıat jaýap berip otyrdy. Jastarǵa ózi de tarıhı máseleler tóńireginde suraýlar berip, eki arada tartymdy dıalog ornady.  Kezdesý sońy avtordyń aıtýly eńbegine qoltaańba jazǵyzyp alyp, estelikke sýretke tústi. Álemniń ár túkpirinen kelgen qazaq balasy kezdesý áserinen rýhtanyp, qazaq perzenti bolyp týǵanyna  maqtanysh sezimi keýdelerine sımaı bara jatqandaı, janarlary ushqyn ata, rızalyqpen tarap jatty.

Janna Ádilhanova,

Ál-Farabı atyndaǵy Qazaq UÝ-diń JOO deıingi bilim berý fakúltetiniń aǵa oqytýshysy.