ميلاندا وتكەن قپو ب.ۆ. كومپانياسىن بىرلەسىپ باسقارۋ بويىنشا كوميتەت جينالىسى كەزىندە وبلىس اكىمى التاي كولگىنوۆ "بقو بەرەزوۆتىقتاردى كوشىرۋ تامىزدىڭ ورتاسىنان كەشىكپەي باستالۋى كەرەك."، - دەگەن مىندەت قويدى دەپ حابارلايدى Qamshy.kz. ءوڭىر باسشىسى اتاپ وتكەندەي، بيىل وبلىستا جول، تۇرعىن ءۇي، الەۋمەتتىك نىساندار سالۋ سىندى 41 جوبانى جۇزەگە اسىرۋ جوسپارلانىپ وتىر. ولار جەر قويناۋىن يگەرۋشىلەر تاراپىنان جۇرگىزىلمەكشى.

-قپو ب.ۆ. كومپانياسىنىڭ 2017 جىلعا ارنالعان الەۋمەتتىك-ينفراقۇرىلىمدىق اۋدارىمدارى ەسەبىنەن وبلىس كولەمىندەگى جالپى ۇزىندىعى 70 شاقىرىم بولاتىن جولداردى جوندەۋ، سونىڭ ىشىندە ورال قالاسىندا 19 شاقىرىمى، دەپو كوپىرىن قايتا سالۋ جوسپارلانعان.

جەر قويناۋىن يگەرۋشىلەردىڭ قارجىلارى ءۇش كوپ پاتەرلى ءۇيدىڭ (273 پاتەر)، ءبىر ورتا مەكتەپ پەن دەنە شىنىقتىرۋ-ساۋىقتىرۋ كەشەنى، اقساي قالاسى مەن ءبورلى اۋىلىندا قوس بىردەي بالاباقشاسى قۇرىلىسىنا، ورالدىڭ ءۇش كوشەسى مەن اۋەجايعا دەيىنگى جولدى جارىقتاندىرۋدىڭ بەتون تىرەكتەرى مەن اۋە جەلىلەرىن جەراستى جەلىلەرىنە اۋىستىرۋ، قۋات ۇنەمدەيتىن شامدار ورناتۋ، الەۋمەتتىك نىساندار جوندەۋ، ينجەنەرلىك جەلىلەر تارۋعا، جول سالۋعا باعىتتالدى. بۇدان باسقا ءبورلى اۋدانى ارالتال اۋىلىندا 100 تۇرعىن ءۇي قۇرىلىسى اياقتالادى.

بارلىق جوبا ۋاقتىلى جانە ساپالى تۇردە ورىندالۋى كەرەك،-دەدى التاي سەيدىر ۇلى.

جيىن بارىسىندا سونداي-اق، قپو ب.ۆ. تاراپىنان ساتىپ الۋ كەزىندە جەرگىلىكتى قامتۋ كولەمىن ارتتىرۋ باعىتىنداعى جۇمىستاردى بەلسەندى جۇرگىزۋ جونىندە دە كەلىسىمگە قولجەتكىزىلدى. 2016 جىلدىڭ قورىتىندىسى بويىنشا قاراشىعاناق جوباسىنداعى قازاقستاندىق قامتۋ كولەمى 51،6 پايىزعا جەتىپ، 530 ملن. اقش دوللارىن قۇرادى.